Mbơh tơih ta rơh rƀŭn nchră, kruanh n’gâng kan kế hoạch n’hanh ntuh kơl Nguyễn Chí Dũng an gĭt, nău wăng sa rêh jêng khay 9, n’hanh 9 khay năm 2023 geh ndâk nsơm tay ngăch, nkre lah nchŏng ngluh 10 nău ntoh lư tâm nĕ lah na nê̆: Hun hao ndâk nsơm ngăch, ăp khay ba kơi âk lơn ăp khay ba năp, uănh nsum 9 khay hao 4,42%, ta rmôt dak hun hao ngăch tâm nkual n’hanh lam ntur neh.

Ăp n’gâng kan, trong kan ndâk nsơm âk, hun hao đăp mpăn, ngăn lah trong kan công nghiệp an geh hao tay kơt ơm. Ta rơh rƀŭn nchră, nuĭh leo kan ăp n’gâng kan ăp ntŭk kan rnê âk nău leo kan, ntĭm đă leo kan răng dăng, groi uănh bâh chính phủ, Thủ tướng chính phủ ngăch doh rklaih ăp nău kŏ văk bâh ăp ntŭk. Nglôch lôch rơh rƀŭn nchră, Thủ tướng Chính phủ Phạm Minh Chính lĕ nchŏng na nê̆ nău dơi geh, nkô̆ nău kŏ khan, mô hŏ geh ƀư n’hanh nău tă blău leo kan. Tâm let năp tay Thủ tướng đă ăp gâl kan, ăp n’gâng kan, ăp ntŭk an geh nchrăp na nê̆ ăp trong kan, nău leo kan, trong kan tâm rdâng na nê̆, răng dăng, săk rnglăy, an geh nsrôih tĭng nău kan lĕ rngôch lah đăp mpăn nău wăng sa têh, mât njrăng bah lạm phát, ntrôl dăng hun hao, mât đăp mpăn nău rêh jêng bâh ƀon lan, mât đăp mpăn chính trị- rêh jêng, đăp mpăn nău rêh jêng.