Rơh tâm rlong Wâr cà phê Việt Nam mbra ƀư ta lơ 10/3/2025, mbơh jêh n’hanh an ndơ nkhôm tâm lơ 13/3/2025, dơ rơh ƀư Lễ hội ka phê Buôn Ma Thuột rơh tal 9. Nuĭh râng rơh tâm rlong lah nuĭh ƀon lan Việt Nam bah 18 năm deh let lơ, dôl rêh n’hanh pah kan ta Việt Nam. Ăp nuĭh tâm rlong mbra rlet rlău ăp nkô̆ nău tâm rlong, geh: gĭt tât grăp cà phê rlăy dŏng gay ƀư wâr; ƀư bên đah măy wâr; ndơ̆ trong nchrăp wâr n’hánham ƀŭt nkoch kah ndơ; ƀư wâr...

Wa Trịnh Đức Minh-Kruanh Hiệp hội cà phê Buôn Ma Thuột an gĭt, n’gor Dak lak dôl nsrôih hun hao Buôn Ma Thuột jêng nkual ƀon têh cà phê bah lam ntŭr neh, bah meng nău mĭn lah mpeh têh hvi rnoh neh, rnoh ndơ ri uĕh kah, ƀô kahcà phê jêh nkret njêng an dơi dŭt uănh tât. Bah lôch jêh bâh rơh tâm rlong bôk năp, ta rơh tâm rlong năm aơ, Hiệp hội geh âk rgâl mhe tay gay ăp nuĭh wâr kĭn dơi mbơh nău blău bah nơm. Nkre, geh ăp ndơ ka phê nkret njêng jru geh uĕh kah ngăn, ntô̆ n’hao ăp nău khlay mhe bah cà phê tâm rnôk wâr. Wa trịnh Đức Minh an gĭt:

"Rơh tâm rlong năm aơ mpeh trong ƀư, mpeh nău ƀư têh lơn, hvi lơn, geh nău nsum mpôl âk lơn. Tal 2, chấp điểm ka chok cà phê dơi châm tĭng rup gui mhe tĭng nău tâm di bah SCA (hiệp hội cà phê Kah lam ntŭr neh) n’hanh CQI (Viện chất lượng cà phê-ta Hoa Kỳ). Tal 3 lah jă nuĭh way kan dak bah dih gưl têh uănh lah uĕh kah cà phê geh nău jru ntoh lư mpeh cà phê gay wăch rgum âk nuĭh ŭch cà phê đah ntŭk têh cà phê

Việt Nam lĕ hăn lor mpeh cà phê Robusta kah bah lam ntŭr neh ri an geh âk nuĭh way wâr cà phê blău ngăn lam ntŭr neh. Aơ lah mpŏng ŭch bah kruanh Hiệp hội cà phê Buôn Ma Thuột, ntŭk ƀư tơm rơh tâm rlong wâr cà phê Việt Nam 2025. Jêh 2 khay rgŏ jă, rơh tâm rlong n’hanh lĕ dơn geh nău mbơh bah 36 nuĭh tâm rlong tât bah 13 n’gor n’hanh nkual ƀon têh dăn râng, tâm nĕ n’gor Dak lak n’hanh nkual ƀon têh Hồ Chí Minh geh âk nuĭh dăn tâm rlong ngăn.

Nău êng bah rơh tâm rlong aơ nkôp đah ăp rơh tâm rlong wâr lam ntŭr neh lah dŏng cà phê Arabica n’hanh Robusta Việt Nam. Nuĭh tâm rlong an ƀư wâr ndơ Pour Over (du trong mpli I ty kơt trih ƀô kah bah cà phê) n’hanh mpli phin. Ndrel đah nĕ, an gĭt 3 nău blău ơm: uănh lah kah cà phêrlăy, wâr n’hanh mpli. tâm nĕ, dôl uănh ngăn nău chấm điểm ka chok cà phê mbra dơi chấm tĭng rup gui mhe tĭng tâm di bah SCA Hiệp hội cà phê kah lam ntŭr neh n’hanh CQI (Viện Chất lượng Cà phê-ta Hoa Kỳ).

Tĭng wa Lê Đức Huy, Groi Kruanh Hiệp hội cà phê Buôn Ma Thuột, rơh tâm rlong Wâr cà phê Việt Nam mô knŭng lah ntŭk rgum ăp nuĭh ŭch, dŭt n’hâm đah cà phê gay nkoch nău nti, nău blău ơm, jêng ntŭk boăt nthoi geh soan wăch rgum, rêng hvi nău ŭch, nău rŏng đah cà phê ma hôm lah trong n’hao khlay bah cà phêViệt Nam. Wa Lê Đức Huy an gĭt:

"Gay hun hao nâp nâl ntŭk tăch mô knŭng hen hun hao tăch ma hôm hun hao nău ŭch. Việt Nam lĕ mĭn lah he lah dak tăm cà phê Robusta têh ngăn bah lam ntŭr neh n’hanh he lĕ hăn lor mpeh cà phê Robusta kah bah lam ntŭr neh ri he an geh nuĭh way wâr cà phê blău ngăn lam ntŭr neh.

Dơi lah, rơh tâm rlong wâr cà phê Việt nam 2025 lah du nău ƀư ngăn ngên n’hanh geh nkô̆, ntrôl nău hun hao bah nău kan ka phê tĭng trong way ƀư n’hanh nâp nâl. Aơ mô knŭng lah di an ntô̆ n’hao ăp nuĭh way wâr blău ma hôm lah du njoat hăn khlay tâm rnôk ƀư n’hao prêh cà phê Việt Nam.

Bah meng rơh tâm rlong Wâr cà phê, tâm rnôk Lễ hội cà phê Buôn Ma Thuột rơh tal 9 năm 2025, Hiệp hội cà phê Buôn Ma Thuột hôm ƀư tay ăp nău gay wăch rgum năch kơt: Rơh tâm rlong Art Amazing Cup 2025 an ăp băl ŭch ƀư mpli ka phê nghệ thuật, tâm lơ 11/3 n’hanh Talkshow đah bôk nău “Buôn Ma Thuột ntŭk tât bah cà phê lam ntŭr neh” đah âk nuĭh nkoch rblang nsing nơm.