Oh Võ Thị Như Ngọc, Bí thư Chi đoàn jrâu 12A1, Ngih săm ƀŭt Lê Quý Đôn, nkuăl ƀon têh Buôn Ma Thuột, n’gor Dak Lak lah ngoai tâm ăp kon se ntoh lư geh lăp Đảng rnôk 18 năm. Aơ lah nau kơp dơn ueh ngăn mpeh ăp nau nsôih tâm nau ntĭm nti bah oh tâm âk năm. Oh Như Ngọc, nkoch:

            ‘Gâp saơ nơm dŭt n’hâm rhơn ngăn. Aơ kŏ lah rnôk gay ma nơm geh nau blau hun hao săk jăn ndrel rêng nau ueh đŏng, nau nsôih bah ăp băl êp nơm tâm ngih săm ƀŭt’.

            Hôm oh Nông Quốc An, kon se nti tâm ngih săm ƀŭt THPT Võ Nguyên Giáp, nkuăl Ea Kar, n’gor Dak Lak, mro nsôih, nchiăr săk nơm, geh kon se nti blau ăp ntil ndrel gơih tâm nau kan Đoàn. Khay 8 năm 2023, Nông Quốc An geh lăp Đảng rnôk dôl hăn nti tâm ngih săm ƀŭt:

            “Tâm ăp năm hôm nti jrâu 12, gâp nsôih râng ăp nau kan bah ngih săm ƀŭt, Gâp rhơn ngăn rnôk nơm lah du gưl tâm rmôt kan bah Đảng. Nuih n’hâm aơ gâp mra lŏ geh hun hao tâm rơh tât’.

            Tĭng wa Nguyễn Tiến Dũng, Bí thư Chi bộ, Hiệu trưởng Ngih săm ƀŭt THPT Võ Nguyên Giáp, geh ndâk năm 2021, ngih săm ƀŭt geh 27 đảng viên. Rnôk ndâk, Chi bộ hŏ kơl an âk ngăn tât nau rnglăp đảng. Mô êng joi ăp nŭih tă bah cán bộ, nai nti, ma ngih săm ƀŭt hôm kơl an nglăp đảng ân kon se nti blau đŏng. Năm nti 2023-2024, ngih săm ƀŭt rnglăp geh 6 đảng viên mhe lah kon se. Gay saơ, săch dơi ăp nŭih geh nau blau, êp nau kan ntĭm nti, ăp oh hôm geh râng ăp nau kan, nau dơi tâm nau rêh gay ma nchiărr nti, nau blau chính trị. Wa Nguyễn Tiến Dũng, mbơh:

            ‘Trong kan ngăn lah hôm tă bah Rnâng kan Đoàn ngih săm ƀŭt, tĭng uănh rnôk hăn nti, nchiăr, rnôk nsôih, rnôk ƀư nau kan bah ăp oh. Ntrong tal 2 lah tă bah nai ntĭm nti, ăp nŭih nai ntĭm nti bộ môm ntĭm nti ăp kon se nê, nkre geh nau blau dơi tâm nau kan đoàn, nau kan druh ndăm. Nkre lah geh nau dơi prêh ngăn tâm nau kan ntĭm nti, gay na hên joi nŭih dơi tâm rnôk ân lăp đảng’.

            Ntơm năm 2020 tât rnôk aơ, lam n’gor Dak Lak hŏ rnglăp geh 368 đảng viên lah kon se nti; êng năm 2024 geh 200 kon se geh lăp Đảng. Tĭng wa Đỗ Tường Hiệp, Groi Giám đốc N’gâng kan ntim nti n’gor Dak Lak, nau geh bonh ngăn aơ lah nau tă blau gay ăp ngih săm ƀŭt lŏ ƀư nau hun hao Đảng tâm kon se, nkre đăp mpăn nau ntĭm nti, nkre râng ăp nau kan gay ma nchiăr nti nau blau chính trị lah du nau đă prêh ngăn ma kon se. Tâm rơh tât, N’gâng kan ntĭm nti mra lŏ tâm rgop ma ăp gưl uỷ Đảng, ngih săm bŭt gay pơk trong nơih, ntŭk ntu kan ân ăp oh. Wa Đỗ Tường Hiệp, mbơh:

            ‘Nau kan nglăp đảng tâm ngih săm ƀŭt geh kơl an. Ngăn lah tâm rmôt lah kon se dôl nti. Ăp đoàn viên blau tâm ngih săm ƀŭt THPT mra geh ntĭm mbơh gay n’hao nau blau mpeh chính trị, nau mĭn ndrel geh nau ŭch mpeh cách mạng gay ntĭm nti gay geh lăp đảng ân ăp oh geh ntrong nsôih jêng tă bah ơm jêh nê hun hao jêh aơ tă”.

            Nau kan nglăp đảng tâm kon se nti mô êng lah nau ŭch bah kon se ma hôm lah nau rbơn êng bah ăp săk kon se lah lah nau ƀư rjăp nau dơi bah rơh mom Dak Lak tâm nau kan ndâk njêng ndrel hun hao ƀon tơm, neh dak. Ăp đảng viên mom geh njêng dơi tă bah ngih săm ƀŭt mra lah ăp nŭih geh bau blau, nau mpŏng ân rơh ndơn ndrel hun hao đảng tâm let năp aơ tay./.