Jă kônh wa n'hanh băl mpôl uănh nău nchih bôk năp tĭng trong link dja:
VOV4.M’nông: Kơt hŏ nkoch ta bôk ntuh nău ngơi bah năp nơh, bri Tây Nguyên hŏ n'hanh dôl lơh n'hang, âk nuĭh tơm bri hŏ pha lah an rong gor dơm rnôk saơ bri geh lơh n'hang. Bri geh lơh yor nuĭh ƀon lan, tă bah doanh nghiệp n'hanh aƀaơ hôm saơ dŭt âk cán bộ hăn lơh bri, rŭn in neh bri, lek joi, kơl an mpôl hăn lơh bri đŏng. Nău jru hô lơn lah tâm rnôk mât njrăng bri ơm hŏ jêr jŏt, tơm ndơ ntuh kơl an bri ơm hŏ đêt ri khân păng hŏ tâm pit hêk, sa khâm, ƀư an nô nău lơn ma châp đêt lơn đŏng:
Bơi 100ha bri mpeh neh bri Công ty TNHH Đỉnh Nghệ, xã Quảng Sơn, nkuâl Dak Glong, n'gor Dak Nông, lôch rlău 10 năm dơi jao, aƀaơ hŏ lưn lĕ. Hôm an tay ta ntŭk dja lah ăp nău tâm pit mô dơi dŭt bah đah nuĭh ƀon lan ta ntŭk hŏ tă tăch rvăt bri đah doanh nghiệp. Du hê nuĭh ƀon lan ta nkual dja nkoch tay mpeh nău krit bah he yor rvăt neh lôch nê geh tâm pit đah doanh nghiệp:
"Ăp nkual neh Công ty klach mô dơi mât ri tăch tay. Rnăk gâp nơm geh rvăt tay bah Công ty Đỉnh Nghệ bah năm 2013 tât aƀaơ. Tât năm 2015 ri công ty ơm hŏ tăch tay an wa Khanh, giám đốc mhe. Ntơm bah năm 2015 tât aƀaơ. Wa Khanh hŏ an geh tâm pit dŭt âk đah ăp rnăk rvăt neh kơt gâp.”
Trong nchrăp kan bah Công ty Đỉnh Nghệ lah ngoăy tâm rnoh dŭt âk trong nchrăp kan "sa bri" ta n'gor Dak Nông, n'hanh lah ngoăy tâm rnoh hang rhiăng trong nchrăp kan tâm ban kơt nê ta Tây Nguyên. Yơn mô dơn nuĭh ƀon lan, doanh nghiệp “sa bri”, mô đêt cán bộ aƀaơ ban saơ hăn lơh bri, rŭn in n'hanh tăch rvăt neh bri mô geh nău way đŏng.
Nkuâl Ea Súp, n'gor Dak Lak lah ntŭk lor bôk năp ta Tây Nguyên ƀư hăn ôp uănh, nchih rgum cán bộ, kruanh mât bôk kan, đảng viên râng rŭn in, dŏng neh bri. Lôch geh mbơh năm 2018 an saơ, bol mhe du n'gul rnoh âk cán bộ, đảng viên bah nkuâl nchih mbơh hŏ geh rlău 1 rbăn 200 nuĭh dôl dŏng neh bri, lĕ rngôch rnoh hvi rlău 2.000 ha. N'hanh nău cán bộ, đảng viên râng rŭn in, tăch rvăt neh bri ta Ea Súp nar lơn ma krit hô. Aƀaơ, nău muĭh kăl n'gang bri, rŭn in, tăch rvăt neh bri mô mpơl geh ƀư tĭng mpôl, geh tĭng rêng, geh bôk tơm nuĭh rgum rvăt âk neh bri gay tăch rgâl, mplư rlăm nuĭh ƀon lan mô gĭt blău. Wa Y Giang Gry Niê Knơng- Groi kruanh UBND n'gor Dak Lak năl lah, nău dja mô dơn geh ta nkuâl Ea Súp n'hanh n'gor dôl rđău đă Công an lăp hăn ôp uănh, rmal nău tih:
"Geh tơm nuĭh bôk ndranh, mpôl tih djơh n'hanh tâm nê geh lĕ ma nău nkoch geh cán bộ he nơm gŭ tâm nê, nchŏng đă nuĭh ƀon lan lăp tâm nkual dja, nkual ri gŭ kâp njrăng, nsŭk nsôr nuĭh ƀon lan rŭn in neh bah ăp nông lâm trường. Mô lah Ea Súp geh nău mbơh geh rlăm ăp nuĭh ta n'gor êng hao, păng djăt ma dâk nchŏng dơm, nchŏng ntŭk aơ, nchŏng ntŭk ri, păng sŏk prăk lôch nê nchuăt roh rklăk. Dŭt âk nuĭh ƀon lan geh rlăm mpeh nău dja. n'gor hŏ rđău đă Công an mĭn uănh, gŭ mĭn geh trong nkra dŭt bah ăp nuĭh tih dja."
Hôm ta nkuâl Krông Bông, ntŭk dŭt duh hô mpeh nău lơh n'hang bri, lơh joi si mô geh nău way n'gor Dak Lak bah bôk năm 2020 tât aƀaơ, wa Lê Văn Long- Kruanh UBND nkuâl uănh năl, geh ăp nău mô kloh rvah, kơl nchŏng an mpôl lơh si bah rmôt cán bộ mât njrăng bri nơm. Yor kơt nê̆, UBND nkuâl hŏ rđău đă Công an nkuâl lăp kan, njêng rmôt ôp uănh êng mpeh nău tih, nkre groi nđôi nău kan bah ăp nuĭh tơm bri n'hanh nhih pah kan dơi kan:
“Tâm bah ri aơ nơh, ăp nău tih lơn âk geh tât kon nuĭh mât uănh. Mpôl hên hŏ rđău đă an Công an nkuâl njêng rmôt ôp uănh êng nău tih, hăn pah kan êng. Rlău ma hăn rsong uănh nsum, mât njrăng nsum, ri mpôl Công an geh nău dơn kan hăn ôp uănh, lăp ta ntŭk bri geh lơh, kâp ndŭ gay năl ăp nuĭh bôk tơm ndranh lơh si, rmal ăp nău tih ntoh luh, kơp lĕ ma groi nđôi ăp mpôl kan dơi kan êng ƀa ƀă uănh gĭt geh nchŏng kơl an mpôl lơh bri đŏng lah mô."
Mô rlu n'glơ̆ ta "sa bri", "sa neh bri", aƀaơ ta du đêt n'gor Tây Nguyên hôm ban saơ âk cán bộ "sa prăk" mât uănh, mât njrăng bri đŏng. Ntĭt kơt Thanh tra n'gor Dak Nông ban saơ geh 12 đơn vị, mpôl kan nchih nsoh dơm 12.600 ha bri gay dơn prăk nkhôm săm mât njrăng bri tâm lư̆n lơ bơi 3 rmen prăk tâm lvang năm 2014-2016; geh 14 mpôl, đơn vị nchih nsoh dơm rnoh hvi neh tăm bri rgâl gay dơi trok tay rnoh prăk hao tât rlău 10,5 rmen prăk tâm lvang năm 2015-2018.
Ta n'gor Gia Lai, Thanh tra n'gor ban saơ âk nău mpơl sa khâm prăk mât njrăng bri. Ntĭt kơt nău tih hao tât rlău 12 rmen prăk, geh nău mpơl sa khâm ta Ƀan mât njrăng bri tu dak nchih sial Ia Grai. Wa Trần Thùy Thanh, Groi Chánh Thanh tra n'gor Gia Lai an gĭt: Tih geh nău mpơl sa khâm lơn âk bah tơm prăk nkhôm săm mât njrăng bri. Ndrel đah nău mƀơk lhoi mât uănh bah n'gâng kan tơm mât ri ăp quy định mpeh mât uănh sŏk dŏng mô hŏ lhăt hŏ nta trong dơh an ăp nuĭh tơm bri dơh sa khâm:
“Prăk nkhôm săm mât njrăng bri mô di lah đêt. Âk Ƀan mât uănh dơi dŏng bah prăk dja dŭt âk yơn ma quy định mpeh sŏk dŏng ri mô kloh rvah. Prăk dja đơn vị mbra dŏng gay đă jao an mât njrăng bri mô lah mbra dŏng gay an nău kan bah đơn vị. Yơn lah mhâm sŏk dŏng, nkô̆ dŏng mô geh lah kloh. Jêng rnôk hăn ôp uănh mpôl hên saơ âk Ƀan mât uănh dah ma rŏng prâk dŏng lêng lang. Ma nău dja mô quy định kloh ri nta trong dơh an sa khâm ntoh luh".
Cán bộ rŭn in neh bri lôch nê ƀư jêng neh tâm di ngăn, mô lah nuĭh tơm bri mbơh nsoh rnoh hvi neh bri, rnoh hvi neh tăm bri, nchih mbơh nsoh ăp ntil ndơ kan gay rhôch prăk mât njrăng bri uănh nsum tay lah ăp nău kan geh mpơl nău tih sa khâm. Bol ma prăk mô lah neh ri nê lah sa khâm da dê, yor nê lah ăp rnoh khlay drăp ndơ mpơl saơ na nê̆, mbra dơi năl rnoh âk, dơi quy định tâm Luật njrăng n'gang sa khâm. Đah rnoh âk hăn ôp uănh mô âk, rnoh tơ̆ ban saơ tâm bah ri aơ nơh he mbra dơi lah mhe mpơl i bôk tâm săk ngâm dơm. N'hanh aơ lah nău dŭt châp djơh, dŭt klach rvê, yor tơm ndơ an mât uănh, mât njrăng bri ơm ma đêt, way tâm nô n
ău pah mât ma hôm geh tâm nsêk, sa khâm ri nău dơi tam mât njrăng bri nar lơn ma jŭr hŭch./.
Nuĭh rblang: Điểu Thân
Viết bình luận