VOV4.M’nông: Rơh rlau aơ, nau ntŭng kăl si, nchuăn rdeng si tuh dôih geh âk ngăn tâm 2 n’gor Kon Tum ndrel Gia Lai. Âk jêt ha bri tâm nkuăl n’har bri Ia Hdrai, n’gor Kon Tum geh ntŭng kăl gay ma sŏk geh tuch tăm, yơn ê geh du rmôt kan tơm mât njrăng bri ndơn nau kan. Hôm tâm nkuăl jru nkuăl K’Bang n’gor Gia Lai ri bri tơm dổi têh, khlay geh bu kăl gay ma sŏk kđar. Knŭng geh nar, rmôt n’gâng kan hŏ saơ 50 mét khối si hĭ geh rdeng luh bah bri.

Ta Tiểu đoàn 726, tâm xã n’har bri Ia Dal, nkuăl Ia H’Drai, n’gor Kon Tum geh 17 ha bri hŏ geh bu kăl gay ma sŏk geh ƀư mir. Tâm nkuăl aơ tơm si geh bu kăl âk ngăn. Têl ta aơ ân saơ, tơm si têh, geh rnoh dŭt khlay geh bu kăl koh blon, ot jêng kđar ntrơn hăn ntŭk êng. Tâm rnoh neh 17 ha aơ, nŭih ƀon lan hŏ tăm bum blang ndrel điều. Wa Nguyễn Quốc Tuấn, Kruanh n’gâng kan mât njrăng bri nkuăl Ia H’Drai lah rjăp, rnoh neh 17 ha aơ tâm nau mât njrăng bah công ty cổ phần Cao su Sa Thầy:

 ‘ Tĭng nau kơp bah rmôt mât njrăng bri năm 2014 ndrel nau geh bah bri năm 2020 ri rnoh neh aơ lah mpeh Công ty Cổ phần Cao su Sa Thầy mât njrăng hŏ ntrơn jêng tăm tơm cao su”.

Tơm si bu kăl su tâm bri

Kơt ri, tĭng n’gâng kan nkuăl Ia H’Drai ri 17 ha aơ tâm rnoh 6000 ha, công ty cổ phần cao su Sa Thầy manh, tâm ban ma nau bri hŏ geh ntrơn, ndăn tơm si lor ma jao neh ân ntŭk kan. Aơ lah nau gay ma n’gâng kan xã Ia Dal, ntŭk kan mât njrăng ndrel UBND nkuăl Ia H’Drai lah rjăp 17 ha bri geh kăl aơ mô di lah bri. Yơn lah, wa Đỗ Thanh Nam, Tổng Giám đốc Công ty lŏ lah rjăp, neh mô geh nau mât bah công ty:

  ‘Rnoh neh 17 ha aơ lah neh bah dih rnoh neh bah công ty mât, lah mô di lah neh bah công ty. Ngăn lah kơt nê, knŭng geh nau vĭ vĕ dơm. Rnoh neh aơ mô di lah neh công ty mât. Gâp lah rjăp kơt nê”.

Kan 17 ha bri tâm xã Ia Dal, nkuăl Ia H’Drai, n’gor Kon Tum lơh kăl gay ma sŏk neh tăm hŏ geh Bí thư n’gor uỷ Kon Tum Dương Văn Trang rđau đă ntơm bah khay 6. Yơn lah, bơi tât du khay ma aơ, nau geh bah ăp mrôt kan mbơh rklaih ri ê geh nau kloh ơm.

Hôm tâm nkuăl Kbang, n’gor Gia Lai rmôt n’gâng kan mhe saơ nklăp 50 mét khối si khlay hŏ geh kăl ndrel rdeng luh bah bri. Tâm Tiểu khu 25, neh bah Công ty TNHH du ntŭk kan neh mât njrăng bri Đăk Roong, geh âk tơm si dổi ndrel tơm n’ho prêh rlau 10 mét, blon têh 80 cm tât du mét ma n’gul hŏ geh bu kăl chôt. Tâm ntŭk nê hôm ăp tơm geh bu kăl chôt ta ntŭk hôm knŭng nkhop ndrel ma n’ging chông. Hôm blon si ri geh bu ntŭng leo luh. Ăp tơm mhe, tơm ơm ân saơ kơt nê, nau ntŭng kăl si tih dôih ta aơ hŏ geh âk ngăn tâm rơh rlau aơ. Wa Nguyễn Minh Sự, Giám đốc Công ty TNHH du ntŭk kan mât njrăng bri Đăk Roong, nkuăl Kbang mbơh:

  ‘Nau ngăn rnôk aơ, nŭih ƀon lan geh nau ŭch nkra ngih gŭ ndrel ngih rgum rƀŭn, geh nŭih khĭt tâm ƀon, bu kŏ lăp tâm bri gay ma kăl si. Nau ma ƀpn lan ta aơ lah mô dŏng tơm si kro gay ma ƀư bong, ân geh sŏk tơm si ndrih. Du đê̆ nŭih bu ndăn nau kan aơ gay ma kăl, gay ma leo tăch. Dŭt jêr tâm nau kan mât njrăng bri”.

Tơm si têh geh kăl leo ntŭk êng

Mô êng knŭng ntŭng kăl si khuch hô, nau kan nchuăn rdeng si ndrel nau kan kơl ân geh nau tâm di nau leo luh tơm si tă bah geh ntŭng kăl si tâm nkuăl Kbang, n’gor Gia Lai kŏ geh ơm. Mhe rlau aơ, tâm xã Đăk Smar, rmôt n’gâng kan nkuăl Kbang hŏ saơ bôk ndeh ô tô Biển số 81C-117.40 rdeng 21,3 mét khối si, geh 15 blon, hộp tơm dổi blon, geh ot nkŭm ma ƀaih mpôn.

Gay ân saơ nau geh tu tơm bah si, ntŭk kan ƀư nau kan Giao Trang (yor wa Hồ Ngọc Dao, gŭ tâm nkuăl têh Kbang ƀư tơm) mbơh n’ha săm ƀŭt lah, ăp blon si aơ geh rvăt bah du ntŭk kan ƀư nau kan tăch rgâl ta Thanh Khê, Đà Nẵng ntơm khay 2/2015. Yơn lah, wa Trương Thanh Hà, Kruanh n’gâng kan mât njrăng bri nkuăl Kbang mbơh, n’ha săm ƀŭt ndrel ma tơm si tâm nê mô geh tơm kơt, ndrel si aơ lah si geh ntŭng kăl tih dôih:

  ‘Kbang lah nkuăl geh rnoh neh bri têh, âk neh bri hôm ơm rnoh tơm si prêh, nê lah ntil ndơ ma ăp phung ntŭng kăl si ŭch. Bah nau kan bah rmôt mât njrăng bri tâm rgop nsum ma ăp n’gâng kan cảnh sát mêt uănh, tơm si, n’gâng kan tâm nkuăl nsôih ƀư ân kloh ăp nŭih hăn ntŭng, tăch rgâl si tih dôih, nsôih rklaih tĭng di pháp luật, mô lah, lah geh nau leo phong dôih, phung hên đă ân geh leo mhal nkah bah năp âk nŭih, gay ƀon lan bu uănh saơ, nkri lơi nŭih êng”.

Têl bu kăl tơm dổi têh ta Kbang

Tĭng UBND nkuăl K’bang, n’gor Gia Lai, 6 khay rlau aơ, ăp rmôt kan tâm nkuăl saơ 40 tŏ ntŭng kăl si, n’gul tâm rnoh nê lah ntŭng kăl si tih dôih. Wa Nguyễn Văn Dũng, Kruanh UBND nkuăl mbơh, nkuăl dôl ntrŭnh âk nau kan gay ma mât, njrăng bri ân geh săk tam lơn, ma nau geh ri âk rjăp. Nkuăl kŏ kơp dơn du đê̆ nau mbơh bah ƀon lan, nkoch nau tât bah cán bộ mât njrăng bri kơl an ân nŭih ntŭng kăl si ndrel dôl ma ntrŭnh nau ƀư ân klọh:

 ‘Ê geh nau ân saơ geh nau kơl an bah nŭih ƀư cán bộ kơl ân nŭih ntŭng kăl si đŏng lah mô, yơn ta aơ geh nau mpơl tâm nau kan mô mât rjăp tâm nau kan mât njrăng bri bah nkuăl. Đah nau dơi lah nŭih dâk bôk bah nkuăl, phung hên nsôih mhal ân rjăp ăp nŭih cán bộ ndrel nŭih ntŭng kăl si, nchuăn rdeng si tih dôih. Ndrel ma đă n’gâng kan mêt uănh năl gay ma leo mhal ăp nau tih nê ân ntrơn tât ntŭk kan bu mêt uănh”.

Jêh rnôk nau tih mpeh ntŭng kă si đah nau geh năl lah săm ƀŭt ƀư rlăm, ăp rmôt kan n’gâng kan nkuăl Kbang, Gia Lai mro saơ âk ntŭk bri geh ntŭng kăl, âk tơm si jŏ năm geh bu kăl lơi/ Rnoh tơm si geh khuch bah rơh mêt uănh mhe rlau lah rlau 50 mét khối./.

Nŭi rblang: H’Thi