VOV4.M’nông:  Bol ma mâp jêr jŏt tă khuch bah nuh srê Covid-19 ta âk n'gor, rơh bầu cử đại biểu Quốc hội khóa 15 n'hanh đại biểu Hội đồng nhân dân ăp gưl năm kan 2021-2026 hŏ geh nău dơi uĕh lăng ndrel đah cử tri hăn sơch rlău 99%, an tay nău nkah uĕh lăng tâm nuih n'hâm cử tri lam dak mpeh rơh bầu cử răp jăp, dơn kan n'hanh blău ƀư mhe. Ndrĭ ntŭk lah nău tă ơm gĭt kan rhuăt luh nău tă ơm gĭt bah rơh bầu cử dja?

            Uănh tay rơh bầu cử Quốc hội n'hanh Hội đồng nhân dân mhe aơ, kruanh Quốc hội Vương Đình Huệ, Kruanh Hội đồng bầu cử gưl neh dak lah rjăp, rơh bầu cử dja ƀư di luật, mpêt nkrem, đăp mpăn n'hanh ngăn lah "Nar rgum lam neh dak".

 “N'gor geh rnoh âk nuĭh hăn sơch n'hanh dŭt đêt rlău 98%. Rnoh âk nuĭh hăn sơch kơt nê̆ lah dŭt uĕh lăng hôm ntop lah he hŏ sơch tŏng 500 đại biểu Quốc hội. Geh ăp n'gor kơt Bắc Giang lah ân ƀư tay 4.300 thŭng phiếu jê̆, gay rhŏ an kônh wa gŭ srang ngai êng ta jay n'hanh gŭ rgum êng đŏng"

Tâm nô nău nuh srê tât krit nji, yơn rlău 99% cử tri hăn sơch, nău nê lơn ma an saơ nuih n'hâm tâm rnglăp rnoi nuĭh, lơn ma jêr jŏt ntul rlong, lơn ma saơ suan dăng bah nuĭh ƀon lan. Yor kơt nê̆, nău tă ơm gĭt nti bôk năp bah rơh bầu cử Quốc hội n'hanh Hội đồng nhân dân ăp gưl năm kan 2021- 2026 lah nău nsing nơm, du nuih n'hâm tâm ban ŭch n'hanh nău gĭt êng dơn kan bah ƀon lan:

Bol ma tâm nău rêh krit nji nuh srê Covid-19, yơn ntŭk mhe bah rơh bầu cử lah ăp nuĭh dâk tâm rlong đại biểu quốc hội n'hanh đại biểu hội đồng nhân dân hŏ rgâl trong rgŏ jă rơh bầu cử. Rgâl bah hôm ma hăn rgŏ jă mâp na nê̆, ăp nuĭh dâk tâm rlong rgâl jêng nkre mâp na nê̆ nkre pơk sŏng dăng bah ngai, nkre hŭch rnoh âk mâp ăp tơ̆ hăn na nê̆ đah trong ntĭm nti bôk năp. Ăp n'gor hŏ ntrôl dăng dŏng công nghệ, mât uĕh nău dơh bah ăp  ndơ nkoch trêng nău lư, loa pơk ngơi bah ăp ntŭk dăch ngai. Tâm ntŭk tơm nuh srê, 2 n'gor Bắc Giang n'hanh Bắc Ninh geh tât khuch dŭt hô yơn hŏ geh âk trong ƀư blău mhe, rgop khlay ƀư jêng geh nău dơi bah rơh bầu cử. Bắc Giang geh tât rlău 4 rbăn thŭng phiếu kơi ntop tay, lah rnoh kơi ntop geh tay thŭng phiếu dŭt têh lam dak, ăp rmôt bầu cử hŏ "hŏ hăn goh tĭng mpông lăp tĭng jay" gay ăp nuĭh cử tri mô dơi hăn tât ntŭk bầu cử hôm dơi ti he nơm nklăch êng phiếu sơch. Kruanh Ủy ban nhân dân n'gor Bắc Giang, Lê Ánh Dương lah rjăp: Nău tă ơm gĭt kơt nti mha êng bah nău rđău kan Đảng, Ngih dak, Quốc hội lah tơm ndơ khlay bôk năp đăp mpăn geh nău dơi rơh bầu cử âk  jêr jŏt ntul rlong kơt rơh bầu cử mhe aơ:

“Nău ƀư bầu cử mpôl hên mĭn tât ăp trong nkra an nkual an  gŭ rgum êng, nkual dôl geh an gŭ srang ngai êng lam rêh jêng kon nuĭh, nkual mpă wêl n'hanh an ăp cử tri gŭ tâm nkual an gŭ rgum êng tâm ban kơt nkual an gŭ srang ngai êng lam rêh jêng kon nuĭh. Rlău ma thŭng phiếu tơm n'gân ta ntŭk nklăch phiếu ri nuĭh kan tâm rmôt bầu cử ndjôt thŭng phiếu tât ăp ntŭk ma cử tri mô dơi luh bah nkual an gŭ rgum êng ri hôm tĭng ƀư dơi nău dơi bầu cử bah he”.

Nău kloh rvah mpeh nău lư bah tâm rkhăch sơch nuĭh, nchih mbơh săk nuĭh dâk tâm rlong, sŏk nău rgop cử tri mpeh nuĭh dâk tâm rlong gay sơch dơi ăp  nuĭh tâm rlong di lah nău tă ơm gĭt nti khlay tâm rơh bầu cử dja. Tĭng wa Ngô Sách Thực, Groi kruanh Ủy ban Trung ương MTTQ Việt Nam ri: ăp nkô̆ nău  khlay tât nuĭh dâk tâm rlong dơi mbơh gĭt kloh rvah hŏ kơl nuĭh ƀon lan sơch tŏng 500 đại biểu quốc hội:

“Ăp nuĭh dâk tâm rlong dơi sơch nsing kalơ rnoh di tĭng quy định bah Luật bầu cử đại biểu, Luật Tổ chức Quốc hội n'hanh nsing kalơ ntĭm nti mbrô 36 bah Ban tổ chức Trung ương, Nău ntrŭnh bah Bộ Chính trị geh tât pah kan bầu cử. Tâm nê, rlău ma 5 rnoh di tĭng nău way luật kơt: rnoh di mpeh du nuih n'hâm tĭng đah neh dak, Hiến pháp; ăp rnoh di mpeh nău dơi kan, nuih n'hâm uĕh  lŏng, ngăch dăng n'hâm suan, nău dơi , nău geh gŭ rêh, mât nău tâm  boh đah cử tri,... lah rjăp nău ăp đại biểu lah ân geh han săk, nănh lah, dâk leo lor tâm trong tĭng ƀư jăp gung trong, trong nchrăp, trong kơl pháp luật”.

Du nău tă ơm gĭt kan khlay dơi rhuăt luh bah rơh bầu cử dja hôm lah nău kan nsum đah Hội đồng Bầu cử gưl neh dak, ăp Ủy ban bầu cử n'gor nkual ƀon têh đah ăp nhih pah kan thông tấn báo chí tâm bơi du năm rlău aơ. Nê lah nău hôm đăp mpăn mbơh kloh, geh nău tâm ban, tâm tĭng nău kan  nchrăp an rơh bầu cử. Mât uănh nău khlay kan bah Mặt trận Tổ quốc ăp gưl n'hanh ăp nhih pah kan lăp kơl kan nsum tâm nău ntrŭt  nsôr nuĭh ƀon lan, cử tri lam dak râng tâm ăp rêng ƀư rơh  bầu cử. Lôch nê, njêng nău nsing nơm, rhơn nđơr đah rơh  bầu cử, n'hao nău gĭt êng, nău dơn kan chính trị bah nuĭh ƀon lan rêng rdâk njêng bôk nău kan neh dak, n'gâng kan ăp gưl. Wa Bùi Văn Cường, Tổng Thư ký Quốc hội, Chủ nhiệm Văn phòng Quốc hội, Chánh Văn phòng Hội đồng bầu cử gưl neh dak lah rjăp:

“Pah kan nkoch trêng geh âk rgâl mhe n'hanh geh nău tam âk, mpôl kan nkoch trêng hŏ dơi nchrăp na nê̆. Trong ƀư nkoch trêng hŏ dơi nchrăp n'hanh rnoh âk tơ̆ nkoch trêng hŏ dŭt uănh khlay rgum tơm, tơm khlay. Nău nê njêng luh rhơn nđơr lam dak, rhơn n'hao êng săk an cử tri n'hanh ƀon lan lam dak. Ta aơ he saơ ăp kruanh rđău kan Đảng, Ngih dak rnôk tĭng ƀư nău dơi ƀon lan ri dơi ăp nhih pah kan nkoch trêng nău lư nkoch trêng du trong dŭt năn ngăch, ring tam nuih n'hâm ntrŭt ntrôl gay he an ƀư rơh bầu cử geh nău dơi".

Nău dơi bah rơh bầu cử Đại biểu Quốc hội khóa 15 n'hanh đại biểu Hội đồng nhân dân ăp gưl năm kan 2021-2026  hŏ an saơ nuih n'hâm rnoi nuĭh, nău lăp kan lĕ n'hâm suan, nsing kalơ nuih n'hâm lĕ ma trong kan chính trị, way chrat ang bol ma tâm rnôk nuh srê, jêr jŏt. Nău du nuih n'hâm n'hanh nău gĭt dơn êng nău kan bah bơi 70 rkeh cử tri lah tơm ndơ khlay rgop tâm nău dơi bah rơh bầu cử yor du nău mĭn mô rgâl "Jêr rbăn tơ̆ ƀon lan du ntôr ƀư lôch jêh đŏng"./.

Lại Hoa, VOV1- Nuĭh rblang: Điểu Thân