VOV4.M’nông: N’gâng kan Nga mhe ntoh nau mbơh mra uănh nau lơh mplơng, jêh rnôk NATO mprơh luh dak 8 nŭih kan bah ntŭk kan dak Nga tâm ntŭk gŭ kan aơ ta Brussel, Bỉ đah nkô̆ nau lah “sĩ quan tình báo mô geh mbơh nau”. Nau kan aơ dôl ma ƀư jêng du nau jâk jru tâm nau tâm boh bah Nga-NATO hŏ dôl ma tŭp tâm nau mô ueh. Ăp nau ton lah rjăp lĕ bah 2 ding dôl ma ntrŭt nau tâm boh duh jêr mhe ndrel nau mpŏng ŭch ndâk tay nau tâm nchră lơn ma mô ueh. Bah năp nê, Tổng thư ký NATO Jens Stoltenberg lah rjăp, 8 nŭih kan bah rmôt kan Nga geh ân luh dak hŏ geh ăp nau kan mô tâm di đah nau kan bah khân păng. Ăp nŭih mbơh nau dak ba dih uănh dơn, bol ma nau tâm boh Nga-Phương Tây dôl ma mô ueh, yơn mô di mô geh nau ueh gay ma rgâl. Nau nê ân saơ jêh rnôk nau dun bah Nga, Tổng thư ký NATO ton lah NATO mra ƀư nau tâm nchră geh nau khlay đah Matxcơva, geh n’ăp ma nau tâm nchră Hội đồng Nga-NATO./.

Nŭih rblang: H’Thi