VOV4.M’nông - Tâm 2 năm 2020-2021, n’gor Dak Lak rlău rơh srê nsum đah 2 rơh ntoh nuĭh ji Covid-19 n’hanh âk ntŭk srê dâr pưm ko. Hăn ndrel đah ăp nai dak si, cán bộ dak si n’hanh ăp rmôt kan dơi kan, phóng viên âk ngih pah kan báo chí ta n’gor Dak Lak lĕ mô rvê jêr jŏt, ŏk r’ah, phing klach, hăn lor ntŭk srê, mbơh nu nău ngăch ăp nu nău srê n’hanh nsrôih njrăng n’gang. Nău uĕh ngăn tâm rnoh phóng viên hăn lor nĕ lah ăp phóng viên bu ur. Đah nău janh, dăng, n’hanh ngăch prăl, ăp nuĭh uĕh ntơr ang bah ntŭk báo lĕ rgop ƀư n’hŭch klach rvê đah ntŭk srê

         Năm 2020-2021, rmôt Nam Trang (VOV Tây Nguyên), Kim Oanh, Hoàng Tuyết (Báo Dak Lak), Hải Yến (Đài PT-TH Dak Lak (DRT) saơ uĕh na nê̆ đah băl kan yor hăn pah kan tâm ăp ntŭk srê phing klach kơt srê dâr pưm ko n’hanh Covid-19. Săk bu ur, khân pơng nchrăp ndrel rmôt kan ŏk r’ah rnôk măng nar, tâm kho ao n’gut mbâl, đah ăp ntŭk chợ bôk năp, ăp jay ndeh, mô lah ăp nkhah êng, gay gĭt ăp nău mbơh ơm ngăn mpeh nu nău srê. Uănh nđôi băl kan tă bah ăp nău nchih mhe nkoch n’hanh trong hăn pah kan nkoch tâm mạng xã hội, nkoch ăp mông nar ŏk r’ah n’hanh ăp nău uĕh m’ak, djăt băl kan ngơi pơk sŏng dăng đah nkual nchoeng n’gang, phóng viên Nguyễn Thảo (VOV ta Gia Lai) rngot:

         “Ta aơ, gâp n’hanh âk băl kan dŭt ŭch nău kan, yơn hôm e rhơn rmôt yuh Trang ta Dak Lak. N’gul măng ma ăp yuh nĕ hôm e pah kan ta nkual nchoeng n’gang, ntŭk ma ăp nuĭh klach ntưp Covid-19 n’hanh geh nkhah êng lĕ du mpôl”.

Ăp bu ur phóng viên hăn lor ntŭk bôk năp njrăng n’gang srê

         Săk rnglăy măng nar leo săk bah 4 hê bu ur phóng viên, mô knŭng rhiăng nău mhe ntoh lư mpeh nu nău srê, mpeh ăp nău nsrôih bah nău kan dak si ndrel ăp ngih pah kan dơi kan, ma hôm âk nău nchih jŏng tâm di đah nuĭh đah ăp nău nkoch bah ăp doanh nghiệp, ăp rơh kơn nuĭh ƀon lan, ndrel rlet rlău ăp nar njê ŏk. Đah ăp nău mô lap, ŏk r’ah jêh ăp nău nchih mpeh srê, phóng viên Kim Oanh-báo Dak Lak gơm ngơi:

         “Mpeh báo Dak Lak ri geh oh n’hanh Hoàng Tuyết ƀư mpeh dak si. Ăp nău nchih nuh srê kơt mpôl oh ƀư, yơn an sŏk âk săk, yor lah sŏk săk nơm âk ir ri nuĭh bên mbra rvê tay mpôl oh hăn kan ta nkual srê âk ir. N’hêl na nê̆ ri ŏk r’ah, yơn nău klach dơi dêr dŭt âk yor tĭng ăp nău ntrŭnh njrăng n’gang srê rhăt jăp ngăn, dơi n’gang n’gut kơt ăp nai dak si n’hanh nuĭh kan dak si tâm nkual srê”.

         Nai dak si Nay Phi La, Kruanh N’gâng kan dak si, Groi Kruanh Ban ntĭm rđău njrăng n’gang srê Covid-19 n’gor Dak Lak an gĭt, tâm trong njrăng n’gang srê đah dŭt âk nău jêr, pơng n’hanh băl kan saơ geh nău tâm pă n’hanh tâm yô̆ bah ăp phóng viên n’hanh âk nuĭh ƀon lan, ngăn lah ăp bu ur nuĭh ƀư báo hăn ndrel kơt Kim Oanh, Hoàng Tuyết, Hải Yên, Nam Trang. Wa Nay Phi La nkoch:

         “Nău cán bộ dak si hăn tât nkual srê geh ăp phóng viên-nuĭh ƀư báo hăn ndrel, jêng mpôl hên saơ nơm mô rngot. Ăp nuĭh báo nsrôih, kâp gay năl tay nău mbơh an di na nê̆, ƀư đŏng rmôt dak si n’hanh ăp nuĭh pah kan ta ntŭk dơi ntrŭt nsôr”.

         Kôp poăn Nam Trang, Kim Oanh, Hoàng Tuyết, Hải Yến lah ăp nuĭh me dôl mât kon jêt. Hăn tâm ăp ntŭk srê mô dơi geh nuĭh kơp tât ăp nău rvê. Yơn lah, kơt âk phóng viên, nuĭh báo, khân pơng wât nơm lah rse nthoi mbơh nău mhe, geh nău kan đah ăp nău rêh jêng. Nuh srê lơ klach, ăp phóng viên pah kan dak si lơ hăn tât jâng gay geh nău mbơh ơm, ngăn ngên. Phóng viên Nam Trang, Đài TNVN nkual Tây Nguyên nkoch:

Ăp bu ur phóng viên tĭng rjăp nu nău gay mbơh ngăch

         “Oh geh lah đah Oanh, Tuyết n’hanh du đêt băl kan ndrel: He dăn n’gor du jrô êng gay gŭ ta nĕ, mô sĭt jay, mô hăn quán, mô tât ngih pah kan ? Ôp lah ndrĭ dơm, yơn mpôl oh gĭt da dê, ăp ndoh ndơ-ngih wâl ta n’gor kơt mô dơi an nchrăp nkhah êng, njrăng srê Covid-19. Nău njrăng n’gang srê mbra hôm e dŭt jŏ. Lĕ rmôt, ăp băl hôm e kon jêt, mô dơi ntlơi ta nĕ gay gŭ ntŭk êng. Ndrĭ jêng mpôl oh tâm ban ŭch lah hăn ăp ntŭk srê kơt ăp cán bộ dak si, ƀư tĭng ăp nău way đăp mpăn-mât njrăng êng săk nơm kơt ăp cán bộ dak si hôm e ƀư. Đah dak si lĕ pă bok put mbung, kho ao n’gut dŏng du tơ̆, nta an dŭt n’hâm gay phóng viên pah kan nơih ngăn, jêng đăp mpăn. Mpŏng ơm lĕ srê”.

         Bôl an lah geh âk nău rvê, yơn lĕ rmôt hôm e răm rhơn bah kơi bok put mbung. Lôch 3 khay bah năp khân pơng hôm e tâm pă nău rvê n’hanh nău răm đah bok put mbung kơt nĕ. Srê Covid-19 Dak Lak lĕ rlău 21 nar mô saơ ntoh nŭih ji mhe, srê dâr pưm ko lĕ dơi nking n’gang, Nam Trang-Kim Oanh lĕ dơi nchih âk lơn mpeh pâl nđaih-nkual ƀon têh Buôn Ma Thuột; Hải Yến an âk mông nar nchih mpeh rmôt Tahen-Công an. Rmôt bu ur phóng viên tâm ntĭnh băl kan tâm nău ngơi gơm răm m’ak. Khân pơng lah kâp lĕ srê gay tâm mâp mpôl bok put mbung, sŏk rup nkoch ăp păng rup uĕh răm bah nuĭh bu ur, gay joi tay nău rêh bah nơm. Khân pơng lah ndrĭ, yơn ăp nuĭh saơ, khân pơng dôl tâm ăp nar khay uĕh ngăn bah nău rêh, rlet rlău ntul rlong đah nău têh  dăng, rêh uĕh, tâm rnglăp n’hanh nsing nơm./.

         Nuĭh rblang: Y Sưng Phê Ja