VOV4.M’nông – Kêng măng 1/8, Bí thư Thành ủy nkual ƀon têh HCM Nguyễn Văn Nên n’hanh Kruanh n’gâng kan dak si Nguyễn Thanh Long lĕ uănh nđôi ngăch ndâk ƀư ăp ntŭk rgum săm ji Covid-19. N’gâng kan dak si đă ndăn wơt dơn nuĭh ji Covid-19 ta 4 ntŭk rgum săm aơ; jao an Ngih dak si Đại học Y dược nkual ƀon têh Hồ Chí Minh dơn nău way kan ta aơ. Nkual săm an nuĭh ji Covid-19 mbra dơi dŏng bah ăp ndoh ndơ ơm geh bah ngih dak si kơt măy nsôr n’hâm, nsưng ji. Ta năp măt mbra geh 70 nsưng, nchrăp ntop hao 500 nsưng săm ji mbăn.

Kruanh nkual ƀon têh HCM n’hanh N’gâng kan dak si uănh ăp ntŭk ndâk ƀư ntŭk săm ji mbăn

Ntơm bah nar 2/8, ngih dak si mbra ntơm wơt nuĭh ji Covid-19. Mpôl pah kan lĕ tât uănh nđôi Khoa hồi sức tích cực 500 nsưng ta Ngih dak si rdâng săm mrô 16 (Quận 7, nkual ƀon têh HCM), ntŭk ngih dak si Bạch Mai dôl dơi jao nău kan ƀĭt joet. Bí thư Thành ủy nkual ƀon têh HCM Nguyễn Văn Nên lah an n’hŭch dâl sam ƀŭt sam tra hành chính du trong uĕh ngăn, ntop ngăch ngăn ăp ndơ mô tŏng gay ăp ntŭk wơt dơn nuĭh ji mbăn lăp săm.

Nuĭh rblang: Y Sưng Phê Ja