VOV4.M’nông - Mô hŏ tât n’gul khay tay, rlău du rkeh kon hŏk ta lam dak mbra ntơm tâm rơh tâm rlong tốt nghiệp trung học phổ thông năm 2021. Tât rnôk aơ, ăp ntŭk ta lam dak lĕ ƀư ăp nău kan nchrăp an rơh tâm rlong aơ, tâm nĕ dŭt n’hâm n’hao lĕ nău kan bah nuĭh kruanh ăp ntŭk ntĭm nti, ăp n’gâng kan, nău kan, kruanh ta ntŭk, rƀŏng tât nău ŭch ƀư du rơh tâm rlong đăp mpăn, rhăt jăp.

         Tât rnôk aơ, ăp ntŭk lĕ ndâk nƀư Mpôl ntĭm rđău rơh tâm rlong tốt nghiệp Trung học phổ thông năm 2021 bah n’gor, pă kloh nău kan an tĭng ntŭk kan geh tât, tâm nĕ N’gâng kan ntĭm nti dơn kan rdâk ƀư ăp nău nchrăp ƀư tâm rlong di đah nu nău srê Covid-19. Du đêt ntŭk kơt Hải Phòng, Dak Lak,... hôm e ndâk ƀư Mpôl ntĭm rđău tâm rlong gưl nkuăl, nkual ƀon têh gay ntop kơl an trong kan ƀư tâm rlong bah ăp ngih sam ƀŭt ta ntŭk. Tâm rnôk kop srê, rlău ma ăp ntŭk tâm rlong na nê̆, ăp n’gor, nkual ƀon têh nchrăp ndâk ƀư ăp ntŭk tâm rlong êng an kon hŏk nuĭh F1 gay đăp mpăn nău dơi an ăp oh. Ăp ntŭk dơi nchrăp tŏng ăp ndoh ndơ, ngih wâl n’hanh ăp ndoh ndơ njrăng n’gang srê.

         Wa Nguyễn Văn Long, Groi kruanh N’gâng kan ntĭm nti n’gor Gia Lai an gĭt, n’gor geh rlău 14 rbăn kon hŏk dăn râng tâm rlong, dơi ƀư ta 39 ntŭk tâm rlong. N’gor lĕ ndâk ƀư trong tâm rlong tốt nghiệp THPT đah 4 gưl gay rdâng đah srê Covid-19. Aƀaơ ndrel đah ƀư ôn tay an kon hŏk, n’gor n’hao trong kan nkoch trêng, ơm pă nău mbơh an cán bộ, nai, nuĭh kan n’hanh kon hŏk, me bơ̆ mpeh nu nău nuh srê ndrel ăp nău ntĭm đă bah ngih pah kan dơi kan mpeh njrăng n’gang srê.

         “N’gâng kan ntrĭm nti lĕ ntĭm rđău an ăp gưl, ăp ntŭk kan mhe ƀư ăp nău kan an rơh tâm rlong di trong ntrŭnh, di trong nchrăp, nkre đăp mpăn ăp nău đă njrăng n’gang srê tâm nău srê covid geh jêr. Tâm nĕ geh 4 trong ƀư tâm rlong tâm ban đah 4 gưl nu nău srê. Rơh tâm rlong hôm e dơi ƀư tĭng trong chrăp nsum bah n’gâng kan ntĭm nti, N’gâng kan lĕ geh sam ƀŭt đă ăp kon hŏk râng rơh tâm rlong, cán bộ uănh tâm rlong n’hanh ăp nuĭh kan pah kan tâm rơh tâm rlong an ƀư tĭng mbơh săk soan an nai dak si lor 7 nả rnôk rơh ƀư tâm rlong. Jêh nĕ njuăl lĕ ăp nău mbơh sĭt ăp ntŭk râng tâm rlong, ăp rkŭm tâm rlong gay rblang, mkra tay”.

         Ngoay tâm âk ntŭk geh rnoh kon hŏk dăn râng tâm rlong tốt nghiệp âk ngăn lam dak, đah rlău 88 rbăn kon hŏk, wa Lê Hoài Nam, Groi Kruanh N’gâng kan ntĭm nti nkual ƀon têh Hồ Chí Minh an gĭt, N’gâng kan lĕ an ăp sam ƀŭt ntĭm ƀư tâm rlong tât lĕ ăp ngih sam ƀŭt ta nkual, ăp ntŭk tâm rlong n’hanh nchrăp ăp ndơ đah ngih wâl, ndoh ndơ kơt nuĭh kan gay rhŏ an rơh tâm rlong, bôl prăk dŏng an rơh tâm rlong hoach dŭt âk yor an đăp mpăn njrăng n’gang srê:

         “Mpôl hên lĕ ƀư trong mkra n’hanh nkual ƀon têh ntuh kơl an prăk gay năp ăp ndoh ndơ njrăng n’gang srê ta 160 ntŭk tâm rlong aơ, pă rlău 1 rmen ndơ dak rao ty, kơt bok put mbung n’hanh tŏng ăp du jrô tâm rlong geh dak rao ty, jêh nĕ uănh duh dăk, ƀư tĭng di “5K’.

Ta rƀŭn nchră pơk sŏng dăng mpeh trong kan ƀư rơh tâm rlong tốt nghiệp THPT năm 2021 mhe dơi n’gâng kan ntĭm nti ƀư đah 63 n’gor, nkual ƀon têh mhe aơ, kruanh n’gâng kan ntĭm nti kơp dơn nău nchrăp na nê̆ bah ăp ntŭk nchrăp ƀư tâm rlong. Lah rjăp nău khlay lam lĕ rơh tâm rlong, Groi Kruanh n’gâng kan ntĭm nti Nguyễn Hữu Độ dăn đă đô̆ng ăp hội đồng tâm rlong nchrăp ngih wâl, lơn lah nuĭh kan kon nuĭh tŏng ăp nău rêh n’hanh gĭt blău gay ƀư tâm rlong tŏng ăp đăp mpăn, rhăt jăp n’hanh di trong ntrŭnh:

“Săch nuĭh, jao nău kan. He sŏk nău kan khlay ƀư rơh tâm rlong ngăn ngên lah di rjăp, uĕh nâp, tŏng ăp tâm ban ri săch di nuĭh ƀư du nău kan dŭt khlay. Ăp nuĭh geh nău rêh, gĭt blău, geh đah nău kan, rhăt jăp tâm rnôk ƀư n’hanh lơn lah săch nuĭh djôt bôk, ngăn lah ăp ngih sam ƀŭt ntŭk tâm rlong, jêh nĕ ăp kruanh-Kruanh mpôl uănh tâm rlong Kruanh mpôl chấm tâm rlong. Yơn nuĭh kruanh ma ngăch dơh ri tâm rlong ngăch dơn”.

Nchrăp an nău ƀư rơh tâm rlong tốt nghiêph THPT năm 2021, N’gâng kan ntĭm nti ndrel ăp ntŭk lĕ nsrôih nchrăp, tŏng ăp di ngăch. Yơn lah dăch aơ, srê Covid-19 nu nău geh âk trong jêr. Ndơn tay ăp nău blău ơm bah năm e, N’gâng kan ntĭm nti ndrel ăp ntŭk ƀư rơh tâm rlong tốt nghiệp THPT năm aơ tĭng di trong nchrăp, yơn knŭng ƀư rơh tâm rlong tốt nghiệp tâm 2 nar 7 n’hanh 8 khay 7 ta ăp ntŭk đăp mpăn n’hanh ăp kon hŏk mô geh tâm F0, F1, F2. Wa Mai Văn Trinh, Cục trưởng Cục mât uănh uĕh nâp, N’gâng kan ntĭm nti an gĭt:

“Tât dăch nar aơ, lah geh âk ntŭk an ƀư nchăng n’gang mô lah nkhah êng kon nuĭh tĭnh ntĭm đă bah Thủ tướng Chính phủ gay njrăng n’gang srê Covid-19 ri rơh tâm rlong nar 7-8/7/2021 knŭng ƀư an ăp ntŭk đăp mpăn n’hanh an ăp kon hŏk mô geh tâm F0, F1, F2. Kơt nĕ, jêng lah, N’gâng kan ntĭm nti mbra ndrel ăp ntŭk ƀư tay rơh tâm rlong tal 2 an ăp nuĭh kon hŏk mô hŏ dơi tâm rlong ta rơh tâm rlong bôk năp”.

Đah trong kan săch nti đại học, cao đẳng, lơn lah, đah ăp kon hŏk uănh săch lăp ăp ngih sam ƀŭt đại học, cao đẳng đah trong dŏng săk bah rơh tâm rlong rơh tốt nghiệp THPT năm 2021, N’gâng kan ntĭm nti mbra ntĭm rđău ăp ntŭk ntĭm nti đại học nkra di mpeh trong ƀư, nả, rnoh an săch gay đăp mpăn nău dơi an kon hŏk uănh săch đah trong dŏng jêh tâm rlong tốt nghiệp THPT năm 2021 tâm âk rơh êng êng. N’gâng kan ntĭm nti mbra ndâk ƀư đề tâm rlong an ăp rơh tâm rlong êng êng đăp mpăn nău tâm ban mpeh rnoh jêr gay đăp mpăn nău dơi an kon hŏk râng tâm rlong ta ăp rơh tâm rlong êng./.

Nuĭh rblang: Y Sưng Phê Ja