VOV4.M’nông: Jêh rnôk N’gâng kan ntĭm nti mbơh rnoh điểm tốt nghiệp THPT năm 2021, du đê̆ ngih săm ƀŭt Đại học ntơm mbơh điểm sàn gay săch. Năm aơ, điểm thi Tốt nghiệp THPT hao tâm ăp môm thi. Ndrel ma nê, ăp ngih săm ƀŭt Đại học hŏ ân nau dơi geh lăp âk đŏng ân ăp nau kan êng, kơt: xét học bạ, xét điểm nau blau ƀư, bài thi geh tâm di đah lam ntur neh…ri ma rnoh xét điểm thi tốt nghiệp THPT mra mbơh lah geh hao rđil âk năm bah năp. Phung hên geh nau tâm nchră đah Groi giáo sư, tiến sĩ Nguyễn Thu Thuỷ, Kruanh n’ghâng kan ntĭm ntu mpeh nau aơ.

Ơi wa Nguyễn Thu Thuỷ, năm aơ, âk ngih săm ƀŭt Đại học lŏ ƀư âk ntrong nau săch lăp, ntrŭnh rnoh điểm thi tốt nghiệp THPT kŏ geh ân lah âk lơn rđil đah năm bah năp, ri nau aơ mhâm geh tât rnoh điểm chuẩn đại học?

PGS.TS Nguyễn Thu Thuỷ: Kơt nau mbơh tă bah N’gâng kan ntĭm nri hŏ mbơh bah năp, nê, rnoh điểm thi tốt nghiệp THPT năm 2021 hao tâm âk môn. Tâm nê, rnoh bào thi geh âk điểm kŏ hao âk đŏng tâm ăp môn kơt Tiếng Anh, ngữ văn, Giáo dục công dân, sinh học…

Điểm chuẩn săch đah nau geh thi tốt nghiệp THPT ta aơ lah điểm geh lăp bah ăp ngih săm ƀŭt nsing tâm ăp nau kơt lah nau tă geh bah rơh thi tốt nghiệp THPT (điểm ăp môm thi THPT lah nau geh rgum ah ăp rmôt xét điểm) nau dơi ân geh săch, rnoh kon se đăng ký săch lăp nti tâm di nau nti, du bôk nau nau ntĭm nti.

Điểm trung bình âk, rnoh bài thi geh điểm 8 hao gŏ lơ âk, ntrong điểm hvi lơn ri ma nau săch mra nơih lơn, ăp ngih săm ƀŭt nơih tâm nau kan săch nau đăp mpăn nau lăp nti. Êng điểm bah du đê̆ môn thi âk lơn rđil đah năm 2020, ri ăp ngih săm ƀŭt Đại học hŏ dŏng âk rnoh ân tâm ban đŏng ân nau kan êng kơt xét học bạ, điểm uănh nau blau, bài thi geh blau kơt lam ntur neh…ri ma rnoh gay ma xét điểm thi tốt nghiệp THPT mra n’huch đŏng. Aơ lah ngoai tâm ăp nkô̆ ƀư điểm săch lăp đại học năm aơ geh âk lơn rđil âk năm bah năp nê.

Kon nti ân lah, rnoh jêr, nơih mô tâm ban đah ăp môn tâm nau rgum nê mra jêr ngăn ân kon se tâm nau săch nau ŭch, mhâm nau ay nchrăp mpeh nau aơ êh?

PGS.TS Nguyễn Thu Thuỷ: Quy chế săch kon se lăp nti rnôk aơ ân ăp kon se êng nau dơi đăng ký xét tuyển mô geh nchrăp ôh rnoh ŭch lăp, rmôt ăp nau nti lah du nau ŭch hôm. Ăp ngịh săm ƀŭt nsing ngăn tâm điểm tă bah lơ jur dêh gay ma xét tuyến, yơn mô geh nsing tâm ăp nau ŭch gay ma xét tuyến, knŭng geh âk kon se ndrel du rnoh điểm dêh dơm, ndrei ăp kon se nê dơi đăng ký xét tuyến đah âk nau rgum du nau nti. Ndri ma kon se ân săch ăp môn ma nơm geh âk điểm ndrle geh nau dơi. Đah nau kơt tĭng CNTT tâm nau săch lăp ĐH, CĐ, kon se geh âk nau dơi lơn, âk tŏ gay ma rgâl nau ŭch du ntrong tâm di, tâm ban ngăn nsing tâm nau geh thi THPT bah nơm.

Ơi wa, năm aơ, ăp ngih săm ƀŭt ĐH âk nau nti ri ăp nau săch lăp đah nkô̆ nau nchâp âk lơn rđil ăp năm bah năp. Nau aơ, geh đŏng nau khuch tât nau săch lăp điểm thu tốt nghiệp THPT đŏng?

PGS.TS Nguyễn Thu Thuỷ: Tâm nau nchrăp săch lăp nti rnôk aơ đah nar lơn ma geh âk ngih săm ƀŭt ntĭm mbơh tâm nau ƀư săch êng mô lah ƀư thi tĭng rmôt ri rnoh nau dơi ân an ăp nŭih săch lăp nti êng mô lah ƀư tĭng rmôt ri rnoh ân an ăp nŭih geh ân săch lăp đah điểm thi tốt nghiệp THPT n’huch rđil đah ăp năm bah năp, ngăn lah nau kan ndrel geh tâm nau mbơh hŏ gĭt lor.

Tĭng nau kơp ân saơ, năm 2021 ăp ngih săm ƀŭt ân ăp nau săch êng êng lơn rđil ăp năm. Yơn lah, nau săch tĭng nau ƀư êng êng nsing tâm ăp nau kơt lah rnoh geh, rnoh kon se đăng kí săch lăp, rnoh ntŭk bu săch, rnoh kon se geh dơi lăp gay ma nti…ndri ma nau săch lăp lah du mrô mô gĭt lor. Kon se rnôk hŏ geh săch đah nau kan êng ma geh lăp nti ndrel geh năl lah lăp nti mra mô râng nau ân geh sẵch tâm ăp ngih săm ƀŭt êng ndrel ăp nau kan êng tay ôh. Ăp ngih săm ƀŭt mra nchih moh săk ăp kon se geh năl lah lăp nti bah ntrong mbơh ndrel ăp kon se aơ mô râng săch rơh 1 đah nau geh bah rơh thi tốt nghiệp THPT ndrel ngăn lah mra khuch đŏng tât nau dơi săch lăp bah nau aơ tĭng nau kan điểm thi tốt nghiệp THPT.

Ndri moh nau ay bonh đă ma kon se gay ma geh nau dơi kơt nau ŭch tâm rnôk săch lăp đại học tâm năm aơ?

PGS.TS Nguyễn Thu Thuỷ: Điểm thi tốt nghiệp THPT năm aơ âk lơn đê̆ rđil đah năm bah năp, geh âk nau lah kon se geh 25, 26 điểm ma mô dơi lăp ĐH lah mô geh nau blau nkah, uănh ngăn rnôk săch lăp nau ŭch nti. Kơt lah kon se mô dơi thơ tha đah điểm ma nơm geh gay ma rgum tâm du đê̆ ăp nau nti geh nau ntul rlong âk ngăn bah du đê̆ ngih săm ƀŭt. Rnôk rgâl nau ŭch lăp nti, ri kon se ân geh uănh ngăn, mô yor nau saơ điểm nơm tâm ban ma điểm bah nau nti aơ tâm năm e ma đăng ký ma mô săch nau êng êng, yor lah điểm âk ngăn tâm nau geh kơp nsum, yơn mô di lah nau êng bah du đê̆ kon se. Đah ăp kon se geh nau dơi âk điểm ri ân geh ntop nau nơm ŭch, gay dơi săch nau kan ma nơm ŭch yơn ân geh âk ngih săm ƀŭt êng êng gay ma n’hao nau dơi gay ma geh lăp nti.

Ơ, dăn lah ueh wa Nguyễn Thu Thuỷ, Kruanh N’gâng kan ntĭm nti mpeh nau tâm nau nchră nar aơ./.

Nŭih rblang: H’Thi