VOV4.M’nông: Tĭng nău nchrăp bah Bộ Giáo dục n'hanh Đào tạo, rơh thi tốt nghiệp THPT năm 2021 ƀư ntơm bah nar 7 tât 9- 7 bơi tât. Rơh thi năm aơ ƀư tâm rnôk nuh srê COVID-19 geh nău tât krit nji jêng lĕ rngôch ăp rêng nchrăp bah rơh thi ân đăp mpăn njrăng n'gang nuh srê. Ta nkual Tây Nguyên, tâm bah ri aơ nơh, n'gâng kan ntĭm nti ăp n'gor hŏ ntrôl ngăch gay ƀư lôch jêh bôk nău kan an kon se nti jrô 12, ƀư ôn thi an lĕ rngôch ăp kon se thi tâm di, geh nău dơi.

Ta năp nău tât krit nji bah nuh srê Covid-19, n'gâng kan ntĭm nti n'gor Dak Lak dôl nsrôih an ƀư âk trong ôn tập, kơl kon se nti jrô 12 nchrăp an rơh thi thi tốt nghiệp THPT an dŭt uĕh. Năm aơ, Dak Lak geh rlău 19.800 nuĭh đăng ký rơh thi. Tâm nê, geh rlău 4.700 kon se đăng  ký thi gay kơp dơn tốt nghiệp, 14.400 oh thi tốt nghiệp gay sơch lăp nti Đại học, Cao đẳng. Ta năp nô nău nuh srê Covid-19 tât krit nji, rnôk n'gor Dak Lak hŏ năl geh nuĭh ntưp nuh srê Covid-19, n'gâng kan  ntĭm nti Dak Lak hŏ lor nchrăp ăp trong nkra gay ôn tập n'hanh ƀư rơh thi an dŭt tâm di đah nău ngăn geh ƀư rơh thi.

Đah kon se nti jrô 12, Sở Giáo dục n'hanh Đào tạo hŏ rđău đă ăp nhih nti nsing tâm trong nchrăp ntĭm nti lor rdâk njêng trong nchrăp, rgum lĕ rngôch mpôl kan ƀư ôn tập thi tốt nghiệp THPT. Tâm nê, ăp nhih nti tâm pă kruanh rđău kan uănh tĭng môn mô lah tĭng jrô nti; rgŏ jă, nkhôm rnê năn ngăch đah ăp nuĭh, ăp mpôl ƀư jăp; nkah, lah ăp nuĭh, ăp mpôl thơ tha, mô jăp dơn kan tâm trong ƀư ôn tập. Bol ma geh tât khuch bah nuh srê Covid-19, yơn kon se nti jrô 12 tâm lam n'gor hôm hăn nti kơt ơm nkre đah nti pơk sŏng dăng bah ngai n'hanh n'gâng kan ntĭm nti n'gor Dak Lak hŏ nchrăp ăp trong nkra, ôn tâp tâm rnôk nuh srê Covid-19, rnôk geh nău tât khlay lah dŏng dĭl. Wa Phạm Đăng Khoa, Giám đốc Sở Giáo dục – Đào tạo Dak Lak an gĭt:

“Mpôl hên dôl rđău đă rkiăt ăp nhih nti tâm nkô̆ nău ƀư ôn tập, nkre dôl nsrôih nsŏng kơl đah UBND n'gor mpeh nău njêng ƀan rđău đă thi gưl n'gor, an ƀư trong nchrăp rơh thi, hăn ôp uănh ntŭk dŏng thi gay rơh thi ƀư đăp mpăn, răp jăp, di nău way gay săk tam rơh thi dơi âk lơn rlău năm nti 2019- 2020".

Mhe aơ, UBND n'gor Lâm Đồng hŏ geh si ƀŭt ŭch an kon se nti phổ thông, học viên, sinh viên ăp nhih nti ta n'gor ƀư rơh thi học kỳ 2 n'hanh ân ƀư lôch jêh bah năp nar 21/5. Dŭt jêh rơh thi dja, ăp kon se nti, học viên, sinh viên ta n'gor rlu nti tay gay njrăng der nuh srê Covid-19. Êng đah kon se nti jrô 12, UBND n'gor Lâm Đồng đă Sở Giáo dục n'hanh Đào tạo ntĭm nti ƀư ôn thi tốt nghiệp trung học phổ thông ma trong pơk sŏng dăng.

Đah ăp ntŭk jêr jŏt, nkual rnoi mpôl đê̆, mô tŏng ăp drăp ndơ dŏng, kỹ thuật gay ôn thi pơk sŏng dăng bah ngai ri ƀư ôn thi rgum yơn ân puh nkhĭt kaman, jrô nti, ndơ ntrŭp dŏng ntĭm nti lor rnôk kon se nti tât nhih nti. Tâm rnôk kon se nti hăn tât nhih nti, mô rgum rlău 30 kon se nti/jrô nti n'hanh wăn bok put mbung, puh nkhĭt kaman, mbơh ngăch dăng n'hâm suan, gŭ srang ngai êng, đăp mpăn ăp quy định mpeh njrăng n'gang nuh srê.

Ta rơh hop bah Ƀan rđău đă gưl neh dak rơh thi Tốt nghiệp THPT năm 2021 mhe aơ, Thứ trưởng Bộ Giáo dục n'hanh Đào tạo Nguyễn Hữu Độ, Kruanh Ƀan rđău đă dăn đă tâm ăp mpôl hăn ôp ŭanh ân geh nău kan nsum bah mpôl kan dak si. Aơ lah nău đă dŭt khlay, yor rơh thi năm aơ ƀư tâm rnôk nuh srê Covid-19 tât krit nji jêng lĕ rngôch ăp rêng ƀư rơh thi ân đăp mpăn njrăng n'gang nuh srê. Nău lư bah wa Nguyễn Đức Cường, Chánh Thanh tra Bộ Giáo dục n'hanh Đào tạo, rơh thi, năm aơ hôm dơi mât đăp mpăn, ndơn mban geh nău rgâl an tâm di đah nău dơi geh rơh thi tâm nô nău nuh srê krit nji. Tĭng nê, rhuăt luh nău tă ơm gĭt kan bah rơh thi năm 2020, pah kan hăn ôp uănh, treng nđôi lĕ rngôch ăp rêng ƀư rơh thi năm 2021 dơi ƀư bah trung ương tât lĕ rngôch ăp n'gor. Đah ăp n'gor geh rnoh nuĭh râng thi âk, ăp rơh thi ta năp ntoh âk nkô̆ nău năm aơ mbra dơi ƀư hăn rsong uănh, ôp uănh lhăt ntơm bah rêng nchrăp an rơh thi. Wa Nguyễn Đức Cường, Chánh Thanh tra Bộ Giáo dục n'hanh Đào tạo an gĭt:

“Mpeh pah kan chấm thi ri aơ lah nău rgâl an dŭt tâm di, tĭng quy định bah Luật Thanh tra ri năm aơ rgâl bah hôm ma ƀư hăn rsong uănh pah kan chấm thi du bông ƀư chấm thi ma nău hôm ƀư hăn treng nđôi pah kan chấm thi tâm du bông hội đồng chấm thi đŏng. 63 mpôl hăn treng nđôi bah Bộ ta 63 hội đồng chấm thi tâm du bông chấm thi gay đăp mpăn geh nău di. Ăp mpôl hăn dja ri mpôl hên hôm rgum ăp mpôl kan bah Bộ n'hanh ăp giảng viên đại học”.

  Tĭng nchih rgum bah Bộ Giáo dục n'hanh Đào tạo, tât aƀaơ hŏ geh rlău 1 rkeh nuĭh đăng ký râng thi tốt nghiệp trung học phổ thông năm 2021, tâm nê geh rlău 41 rbăn kon se nti bah dih. Tâm rnoh rlău 1 rkeh nuĭh râng đăng ký râng thi tốt nghiệp THPT năm aơ, geh rlău 222 rbăn nuĭh râng thi dơn sơch tốt nghiệp, rlău 33 rbăn nuĭh râng thi gay ma dơi sơch lăp nti. Rnoh nuĭh râng thi gay nkre mĭn uănh kơp dơn tốt nghiệp nkre gay dơi sơch lăp hăn nti tay lah rlău 758 rbăn kon se, âk 74%. Rnoh kon se nti sơch bài thi khoa học xã hội hôm âk lơn đŏng rđĭl đah rlău 541 rbăn kon se nti./.

Nuĭh rblang: Điểu Thân