VOV4.M’nông - Chính phủ mhe an Nghị quyết 68 đah du đêt nău kơl nuĭh pah kan n’hanh dŏng pah kan mâp jêr jŏt yor srê Covid-19 đah khlay 26 rmen prăk. Tâm rnôk srê geh nar lơ jêr jŏt, ndơ ntop kơl aơ lơ dơi geh âk nău mpŏng mbra kơl doanh nghiệp, nuĭh pah kan rlet rlău jêr jŏt. Yơn lah, âk nuĭh rvê, đah nău dơh lơn, dơh gĭt lơn ndơ ntop kơl lor, ndơ ntop kơl aơ dơi an kơt nău mpŏng ŭch ? Kim Thanh ôp wa Phạm Quang Tú, Groi Kruanh ngih dak Rmôt kan Oxfam ta Việt Nam wăr nău aơ ?

 - Ơi wa, mhe aơ, Chính phủ mhe an Nghị quyết 68 mpeh du đêt nău ntop kơl nuĭh pah kan n’hanh dŏng nuĭh pah kan mâp jêr jŏt yor srê Covid-19 đah khlay 26 rmen prăk, geh 12 nkô̆ nău n’hanh rmôt nuĭh dơi dơn nău kơl. Wa mĭn lah m’hâm mpeh ndơ ntop kơl aơ ?

                   Wa Phạm Quang Tú: “Năp lor, Rmôt kan Oxfam rnê Việt Nam ƀư tĭng tay ndơ ntop kơl rơh 2 đah ăp nuĭh lah nuĭh pah kan n’hanh doanh nghiệp geh khuch yor srê Covid-19. Nău aơ ƀư nău kơl uĕh bah Chính phủ Việt Nam ntop kơl tay ăp nuĭh geh khuch yor srê đah nuih n’hâm lĕ n’gluh an “Mô an geh nuĭh ntlơi bah kơi”. Mpôl hên uănh lah prêh nuĭh dơi dơn nău kơl rơh aơ dơi pơk hvi n’hanh lơn lah kơp dơn Chính phủ lĕ ndơ̆ rmôt nuĭh pah kan dah rŏng tâm Nghị quyết bôl tĭng nău nchrăp mbơh an bôk năp bah N’gâng kan Lao động-Thương binh n’hanh Xã hội ri nuĭh aơ mô di lah nuĭh dơi ndơ̆ tâm nău nchrăp bôk năp. Aơ lah nuĭh jêh uănh nđôi n’hanh mĭn njêng bah mpôl hên, aơ lah nuĭh geh khuch n’hanh mô tŏng âk ngăn. Yor rĭ nău Chính phủ lĕ ndơ̆ rmôt nuĭh aơ tâm sam ƀŭt dơi dơn lah nău ntrŭnh di n’hanh dŭt dơi rhơn”.

         - Ndrĭ wa, nău năl ăp nuĭh ŭch dơi ntop kơl rơh 2 an dơi ƀư tĭng mhâm wa gay lĕ rngôch ăp nuĭh tŏng ăp dơi gĭt ngăch ngăn, dơh ngăn kơt nkô̆ nău Nghị quyết nkoch ?

         Wa Phạm Quang Tú: “Nghị quyết 68 lĕ nkoch kloh ăp nuĭh hôm, yơn lah hôm e du đêt nuĭh tay tĭng mpôl hên mô hŏ dơi geh dâng âk tâm Nghị quyết aơ. Ntĭt nsa kơt nuĭh ƀon lan kan lŏ mir geh khuch yor srê Covid yor geh nău đêt n’hanh nchoeng n’gang tâm nkual geh srê, ndơ lŏ mir bah khân pơng mô dơi tăch mô lah tăch đah rnoh thuk lơn rnoh ntŭk tăch mô lah đêt lơn rnoh nkra njêng bah khân pơng, nĕ lah nuĭh an dơi ntop kơl. Yơn lah, tĭng nău ntrŭnh bah Nghị quyết 68, tât aƀaơ ăp nuĭh lĕ dơi năl n’hanh n’hâm ƀư he năl di ăp nuĭh tâm nghị quyết aơ, Gâp mĭn lah ăp doanh nghiệp geh khuch, nuĭh pah kan geh tâm ton pah kan geh roh nău kan mô lah tăch proăt nău kan ri gâp mĭn dŭt dơh gĭt yor nĕ lah rmôt geh dăn kơt doanh nghiệp geh dăn tăch rgâl, dơi saơ geh khuch khat bah khân pơng. Yơn lah, khlay ngăn lah nuĭh pah kan dah rŏng ri na nê̆ an rgâl hao tâm rnôk uănh mĭn kơt tâm rnôk năl rmôt nuĭh aơ. Yor rhoăt nău blău gĭt ơm bah ndơ ntop kơl bôk năp, dŭt âk nuĭh pah kan dah rŏng, pah kan bah dih tŏng dơi an geh bah ndơ ntop kơl, yơn lah yor sam ƀŭt sam tra an gĭt nău bah nơm, nuĭh di dơi dơn lŏ mô dơi geh”.

Phạm Quang Tú-Groi giám đốc quốc gia rmôt kan Oxfam ta Việt Nam

         Tĭng nău ntrŭnh ta Nghị quyết 68, nuĭh pah kan dah rŏng mbra tĭng ntŭk ƀư tĭng tơm prăk ta ntŭk đah rnoh ntop kơl mô đêt lơn 1 rkeh prăk/hê. Nău aơ dơi tâm di đŏng, hơi wa ?

         Wa Phạm Quang Tú: “Đah rnoh prăk ntop kơl, gâp saơ dŭt đêt. N’hêl na nê̆, tâm rơh ntop kơl bôk năp, âk lơn, dơi lah 1,5-2 rkeh prăk yơn yor sam ƀŭt sam tra jêr jŏt, ntop đah rnoh prăk mô âk jêng geh âk nuĭh pah kan khân pơng mô tŏng sam ƀŭt rhăch nău yor rnoh prăk nĕ mô di mô lah mô tŏng âk gay ntop kơl rnăk wâl khân pơng n’hanh nkôp đah prăk mpeh nar ƀư sam ƀŭt rhăch nău, sam ƀŭt dŭt âk jêng khân pơng mô ndơ̆ sam ƀŭt rhăch nău tay. Nĕ lah nkô̆ nău ntĭt nsa ma ndơ kơl rơh bôk năp đah nuĭh pah kan trơn gŭ âm, rnoh ntop kơl n’hanh an prăk dŭt đêt. Lah knŭng geh khuch lah dơi ntop kơl ri mbra dơh lơn n’hanh dơh đŏng. Kơt nĕ, n’gâng kan ƀon lan ta ntŭk n’hanh ăp ngih pah kan way kan trok dơn ƀư tĭng nău kơl aơ kơt nsing nơm lơn tâm rnôk ƀư. Yor kơt nău blău ơm an saơ, tâm rnôk ƀư ndơ ntop kơl bôk năp, âk cán bộ n’gâng kan ta ntŭk n’hanh ngih pah kan way kan uănh nău aơ khân pơng dŭt rvê đah nău kan dơi năl di mô lah di nuĭh đŏng ?

         - Nuĭh pơk hvi hăn ndrel ăp nău rvê mpeh nău geh nuĭh rlăm, tĭng wa an geh n’hâm trong ƀư gay n’hŭch nău aơ mêh wa ?

         Wa Phạm Quang Tú: “Gay n’hŭch nău aơ, nău dăn đă bôk năp lah trong ƀư pah kan ăp nău kan, pah kan tĭng rmôt pah kan kơt UBND xă, phường, rmôt kan nsum mpôl, mặt trận tổ quốc, tổ dân phố. Jêng lah an ƀư kan nsum, tâm uănh nu nău n’hanh năl tay nău mbơh đah ăp ngih pah kan geh tât dơn trok êng êng. Kơt nĕ ta bôk  năp pơng mbra n’hŭch geh nău mô lap mplư rlăm yor đêt nuĭh mô lah rmôt kan nĕ. Yor rnôk he jao an du đêt nuĭh mô lah rmôt kan, lah mô geh nău uănh nđôi, tât râng uănh nđôi bah rmôt êng ri mbra mô săk rnglăy n’hanh geh nău mplư rlăm dŭt âk. Đah nuĭh pah kan lăp gŭ, an uănh nđôi tâm rgâl nu nău đah ntŭk geh pah kan hăn n’hanh ntŭk geh nuĭh pah kan tât, đah trong nĕ mbra ƀư an nu nău he du tơ̆ tay dơi uănh nđôi 2 ding, tâm trŭp n’hanh sŏk sa tal 2 dơi hŭch. Nău khlay tay lah N’gâng kan Lao động-Thương binh n’hanh xã hội ndâk njêng sam ƀŭt sŏng dăng, tĭng mông nar ngăn, jêng rnôk geh ăp nuĭh pah kan dăn dơn ntop kơl bah ndơ ntop kơl aơ, mbơh dâl nuĭh nĕ mbra ta năp măt. Kơt nĕ, he mbra ntlơi ăp nuĭh mplư rlăm gay sŏk sa êng”.

         - Ơ! Dăn lah uĕh wa !

                   Nuĭh rblang: Y Sưng Phê Ja