VOV4.M’nông: Kruanh Trung Quốc Tập Cận Bình n'hanh Tổng thống Nga Vladimir Putin hŏ geh rơh hop pơk sŏng dăng tâl bar lôch 6 pơh. Bar kruanh rđău kan lah rjăp, n'hao dăng tâm boh lhăt đah Nga- Trung Quốc mbra nsĭt tay suan ntrôl uĕh an băl mpôl lam ntŭr neh. Ta rơh hop bar ding hŏ tâm ban ŭch rlăch dun nău lăp rglah nău kan êng bah dak êng n'hanh mpơl nău rlăch dun ăp trong rmal êng du ding. Nău mbơh dja dơi ndơ̆ luh tâm rnôk kruanh rđău kan ăp dak rmôt G7 ndơ̆ luh nău mbơh nsum lah rjăp nău khlay bah nău đăp mpăn n'hanh bah tâm lơh tâm su ta yơn dak lêng Đài Loan. Nkre kuăl đă Trung Quốc uănh khlay nău dơi kon nuĭh n'hanh ăp nău dơi dah rŏng tơm geh tât nkual mât êng Tân Cương n'hanh Hồng Kông. Bah meng nê, Tổng thống Vladimir Putin lah rjăp đŏng, nău tâm boh đah Nga n'hanh Trung Quốc geh nău khlay tâm nău mât đăp mpăn, nkra ăp nkô̆ nău lam ntŭr neh, rnôk roh đăp mpăn chính trị nar lơn ma hô./.

Nuĭh rblang: Điểu Thân