VOV4.M’nông - Aƀaơ lam dak hôm e rlău 26 rbăn kon hŏk ta 42 n’gor, nkual ƀon têh mô hŏ tâm rlong tốt nghiệp THPT. Aơ lah ăp nuĭh F0, F1, F2 mô lah dôl gŭ ta ntŭk nkhah êng, ncheng n’gang yor khuch bah srê Covid-19. N’gâng kan ntĭm nti mhe geh sam ƀŭt njuăl UBND ăp n’gor, nkual ƀon têh mpeh tâm Trung ương mpeh nău ƀư rơh tâm rlong tốt nghiệp THPT rơh 2. Tĭng nĕ, rơh 2 bah rơh tâm rlong tốt nghiệp THPT 2021 mbra dơi ƀư tâm ăp nar 6 n’hanh 7/8 an ăo kon hŏk mô hŏ tâm rlong mô lah mô dơi jêh rơh tâm rlong rơh 1 mhe rlău. Nău nchih bah Đài TNVN ôp Groi kruanh N’gâng kan ntĭm nti Nguyễn Hữu Độ mpeh nkô̆ nău aơ:

Groi Kruanh N’gâng kan ntĭm nti Nguyễn Hữu Độ

          - Ơi Groi kruanh n’gâng kan Nguyễn Hữu Độ ! Ta năp nu nău chôt srê nar lơ jêr jŏt, dăn wa an gĭt n’gâng kan ntĭm nti mbra geh m’hâm trong mkra gay đăp mpăn nău dơi an ăp kon hŏk mô hŏ dơi râng tâm rlong tốt nghiệp THPT rơh 1 ơi wa ?

         Groi kruanh n’gâng kan Nguyễn Hữu Độ:  Dơi lah tâm nău jêr jŏt srê dŭt âk n’hanh rêng hvi kơt aƀaơ, rnoh nuĭh geh ntưp ji hao tât hang rbăn nuĭh tâm du nar, N’gâng kan ntĭm nti an saơ nău ƀư tâm rlong rơh 2 lah du nău dŭt n’hâm jêr jŏt. Bôl ndrĭ, rơh 1 lĕ dơi ƀư đah rlău 96% rnoh kon hŏk râng tâm rlong, rnoh kon hŏk hôm ƀa ƀă râng tâm rlong rơh 2 tĭng nău mbơh bah ăp n’gor lah nklăp rlău 26 rbăn 254 kon hŏn hŏk ta 42 n’gor, nkual ƀon têh. N’hanh đah nuih n’hâm kơt nĕ ri rnoh kon hŏk aơ mbra râng tâm rlong rơh 2. N’gâng kan ntĭm nti mbra ƀư rơh 2 đah nău dơi tŏng ăp đăp mpăn n’hanh an lĕ rngôch ăp kon hŏk mô râng tâm rlong rơh 1 yor ăp nkô̆ nău “êng knŭng nkô̆ nău mplư rlăm ri mbra ƀư tâm rlong rơh 2).

          - Ndrĭ trong nchrăp tâm rlong tốt nghiệp THPT rơh 2 mbra dơi ƀư m’hâm mêh, ơi wa ?

         Groi kruanh n’gâng kan Nguyễn Hữu Độ:  Mpeh trong nchrăp tâm rlong rơh 2 ri n’gâng kan ntĭm nti lĕ mĭn rƀŭn đah 42 n’gor, nkual ƀon têh n’hanh lĕ tâm ban ŭch đah UBND ăp n’gor, nkual ƀon têh tâm nar 5,6, 7/8 n’hanh tĭng nĕ ăp N’gâng kan lĕ mbơh đah UBND ăp n’gor n’hanh aƀaơ N’gâng kan ntĭm nti lĕ dơn du đêt sam ƀŭt mbơh bah Kruanh UBND ăp n’gor, nkual ƀon têh geh srê dăn đă tâm rlong ta nar 5, 6, 7. Yor rĭ, N’gâng kan ntĭm nti lĕ geh sam ƀŭt tâm ban ŭch nău ƀư rơh tâm rlong tốt nghiệp THPT rơh 2 tâm nar 5, 6, 7/8/2021 n’hanh tĭng nĕ dôl đă ăp ntŭk ƀư ăp nău geh tât kỹ thuật.

         Na nê̆ an geh sam ƀŭt nchih săk na nê̆ bah tĭng oh n’hanh geh nu nău mpeh nău rgâl đah hội đồng tâm rlong. Ntĭt nsa geh dŭt âk n’gor knŭng geh 1, 2 oh tâm rlong rơh 2, geh n’gor geh 100 oh ri dơi njuăl an ăp n’gor êng gay n’hŭch âk hội đồng tâm rlong an pơng tâm di. Ăp oh kon hŏk geh nău ŭch kơt nĕ, tĭng nkô̆ nău tâm ban ŭch đah 2 hội đồng ri n’gâng kan ntĭm nti mbra tâm ban ŭch n’hanh pă an phần mềm gay ndâk ƀư mrô báo danh, jrô tâm rlong gay ăp oh dơi râng tâm rlong du trong uĕh ngăn. Aƀaơ, N’gâng kan lĕ na nê̆ geh sam ƀŭt đă đah ăp ntŭk mbơh trong ƀư tâm rlong bah ăp ntŭk gay đăp mpăn đah srê n’hanh đăp mpăn đah ndơ ƀư.

          - Đah ăp ntŭk geh nu nău srê dŭt jêr jŏt, rnoh nuĭh ji hao hang rhiăng, đê̆ đŏng hang rbăn du nar ri n’gâng kan ntĭm nti geh trong ƀư m’hâm mêh ?.

         Groi kruanh n’gâng kan Nguyễn Hữu Độ:  Đah ăp ntŭk ma srê jêr jŏt ri n’gâng kan geh nău mĭn êng lah săk soan nuĭh nti lah bôk năp, jêng knŭng ƀư rnôk dơi geh đăp mpăn ngăn. N’gâng kan dak si ri lĕ geh ntĭm ƀư tâm nău dơi, n’ăp geh kon hŏk F1, F2 gay đăp mpăn. Bôl ndrĭ, gay đăp mpăn lĕ rngôch tâm nău srê lah nsum kơt nĕ, rêng hvi tâm ntŭk gŭ rêh kơt nĕ, jêr joi F0 ri dŭt jêr jŏt ngăn. Jêng đah ăp ntŭk mô dơi ƀư yor nkô̆ nău jêr ngăn ri dơi dăn đă gay n’gâng kan geh trong ntop kơl an ăp oh. Dơi tĭng trong uănh săch kơl an ăp oh. Yor đah nu nău aơ geh du đêt n’gor dăn đă an ƀư rơh 3. Yơn lah ngăn ƀư tâm rlong rơh 3 tâm nu nău jêr dŭt jêr jŏt ri nău ƀư geh dŭt jêr đŏng. Jêng n’gâng kan an nkah uănh na nê̆ đah ăp nău kơt nĕ ri dơi uănh kơl an ăp oh n’hanh geh trong gay ntop kơl ăp oh tâm rơh săch nti đại học du trong tâm di đah nău đă aƀaơ.

         - Ơ, dăn lah uĕh Groi kruanh n’gâng kan !

                                     Nuĭh rblang: Y Sưng Phê Ja