VOV4.M’nông – Kêng măng 28/6, Mpôl ntoh măt Quốc hội n’gor Dak Lak khóa 14 ƀư rƀŭn nchră n’glôch jêh nău kan năm kan 2016-2021. Mpôl ntoh măt Quốc hội khóa 14 bah n’gor Dak Lak geh 9 nuĭh ntoh măt. Tâm nĕ geh 4 nuĭh ntoh măt tă bah Trung ương mbơh, 5 nuĭh ntoh măt tă bah n’gor mbơh. Bah bôk năm kan tât aƀaơ, Mpôl ntoh măt Quốc hội n’gor lĕ ntĭm rđău ƀư tơm n’hanh tâm rgop đah ăp ngih pah kan geh tât ƀư 20 rơh rƀŭn nchră sŏk nău rgop tâm 56 nău nchrăp ƀư Luật, Bộ luật.

An nkao an ăp nuĭh ntoh măt Quốc hội n’gor Dak Lak khóa 14

Nău ƀư mâp nuĭh ƀon lan tâm năm kan dơi mpôl ntoh măt uănh mĭn rgâl mhe tĭng trong ngăn ngên. Mpôl kan lĕ ƀư 140 rơh rƀŭn nchră mâp nuĭh ƀon lan, đah rlău 23.000 nuĭh ƀon lan râng n’hanh 2.950 nuĭh rgop ntoh ngơi. Ndrel đah nĕ, Mpôl ntoh măt Quốc hội n’gor Dak Lak lĕ uănh mĭn tât trong kan đăp mpăn nău rêh jêng, ngăn lah đah rnăk wâl dơi kơl, rnăk wâl geh soan đah cách mạng, rnăk ƀon lan rnoi mpôl đêt geh nău rêh dŭt jêr jŏt, nkual jru ngai... Tâm 5 năm bah năp, Mpôl ntoh măt Quốc hội lĕ nsrôih rgŏ jă ƀư chop khâl, ndâk njêng du đêt ndơ ƀư ngăn ngên rhŏ an nău rêh ƀon lan ta n’gor đah dĭng lĕ rnoh prăk rlău 6 rmen prăk.

Nŭih rblang: Y Sưng Phê Ja