Ôi 7/4, ta nkual ƀon têh Kon Tum, Ban rđău đă yur êng mham n'gor Kon Tum ƀư rơh rgŏ jă Nar lam ƀon lan yur êng mham 7/4 đah nkô̆: "Yur ntruh mham gŭr- kơl nău rêh". Tâm ăp năm rlău aơ, trong leo yur êng mham n'gor Kon Tum hŏ rgop uĕh an pah kan mât chăm n'hâm suan, mât njrăng n'hanh n'hao ngăch dăng n'hâm suan ƀon lan.

Êng năm 2022 mhe aơ lam n'gor ƀư geh 34 rơh yur êng mham, dơn rlău 6.800 đơn vị mham, geh rlău 136% rnoh tât geh Ban rđău đă gưl neh dak rgŏ jă yur êng mham jao. Trong leo yur êng mham hŏ rêng lam hvi lĕ rngôch tât ăp nkuâl, nkual ƀon têh n'hanh nhih pah kan, đơn vị bah n'gor Kon Tum jêng du săk rup uĕh văn hóa. Ban rđău đă rgŏ jă rơh yur êng mham n'gor Kon Tum n'gluh tât tâm năm 2023 rgŏ jă geh 1.500 nuĭh đăng ký yur êng mham n'hanh leo ƀư dơn 7.200 đơn vị mham tŏng an nău ŭch geh dŏng mham bah nhih dak si n'gor gay kơl săm an nuĭh ji.

Ôi 7/4, ta nkual ƀon têh Buôn Ma Thuột, Rnâng kan rđau nau rgŏ jă yur mham kơl an n’gor Dak Lak ƀư Bôk nau kan “Nar lam ƀon lan râng yur mham kơl an” năm 2023 đah nkô̆ “Du ntruh mham-kơl an du nau rêh”. Bôk nau kan rgum rlau 600 nŭih lah cán bộ, công chức, viên chức, tahen tât râng yur an. Bah nê rgum geh 459 đơn vị mham.

Wa Ayun H’Hương, Kruanh Hội chữ Thập đỏ n’gor Dak Lak mbơh, ăp năm êp aơ, rnoh ntŭưk kan, rmôt kan, ngih máy, công ty, ngih săm ƀŭt ƀư ăp nau kan yur mham nar lơn ma âk bah ntrong kan kơt Lễ hội Xuân hồng, nar pơh gur, nau kan gur...Ăp nar yur mham kơl an pơk trong nơih ân âk nŭih geh rgop nau leo nau rêh ân ăp nŭih ji dôl ŭch mham. Bôk nau kan nkah 23 năm nar lam ƀon lan yur mham lah rnôk gay nkoch mbơh, n’hao lơn tay nkô̆ nau, nau khlay bah nau yur mham kơl an nŭih, rêng trĕ nau yur mham kơl an tâm ƀon lan./.