Tâm jrâu khám mrô 02, Nai dak si Võ Hồng Khắc, Khoa vật lý trị liệu Ndâk tay n’hâm soan, Ngih dak si Tâm Thần n’gor Dak Lak, Phường Thành Nhất, n’gor Dak Lak,  khám, mbơh nau ndrel nchih pă mbơh ntil dak si ngêt ân nŭih ji. Nai dak si Khắc mbơh, săm ân nŭih trơi mô dơi nsing tâm nau tă geh ơm ntrŭnh ma knŭng nơm nsing tâm nau tă geh blau êng ndrel nau mêt uănh tă bah jŏ, nau khuch ri mro geh tât ngăn:

            ‘Bah nau săm ji ri ŭch phung hên ân geh tĭng êp krêp ma nŭih ji, ăp jrâu nŭih ji gay ma uănh, khám, mêt uănh. 8h ôi ăp nar, phung hên hăn tât ăp jrâu bĭch gay ma uănh, ôp bu lĕ sa ôi jêh lah mô, lĕ ngêt dak si jêh lah mô, hôm geh nau mpơl gui mô lah nau nkah gĭt geh nau mhe oi đŏng lah mô. Tâm rnôk hăn kham, uănh, ri âk nŭih ji mô dơi njrăng ôh nau ƀư bah nơm ri ma nơm geh nŭih ji bu dong nơm đŏng lah mô jrăng nâp”.

            Ngai ma Khoa Vật lý trị liệu ndâk tay n’hâm soan nklăp 50 mét, ngih jong geh  nking nkra đah bah dih ma loih lah ntŭk gŭ bah ăp nŭih ji bu klô bah Ngih dak si Tâm Thần n’gor Dak Lak. Tâm trôm n’gar loih, điều dưỡng Phan Đình Tài dôl ma veh huyết áp ndrel kơl an du hê nŭih ji ngêt sa si ân tâm di. Tâm săng nglik nô hôm ơm  ntŭk khap geh nŭih ji kăp tâm năm e:

            ‘Lơ 4/8/2025, rnôk gâp hăn veh huyết áp ân du hê nŭih ji bu klô, ri păng nê mô blau njrăng săk păng tât kăp ngăn tâm săng nglik gâp, nkhêk n’ăp kho, ao gâp đŏng. Gâp kŏ geh nau klach đŏng. Jêh rnôk nâp tay n’hâm soan, ndrel geh ăp nŭih dê kơl têk, rdâng, ri gâp hăn tơh kho ao, rao kloh  ntŭk sôt jêh ri rlu rlau du mlâm ri mơ lŏ hăn ƀư tay nau kan”.

            Rlau 20 năm săm ji tâm Khoa Vật lý trị liệu, ndâk tay n’hâm soan, Ngih dak si Tâm Thần n’gor Dak Lak, nô Nguyễn Văn Tôn, tâm xã Đray Bhăng, n’gor Dak Lak, geh nai dak si Khắc ndrel điều dưỡng Tài nsôih mât chăm, uănh tĭng ăp nar. Nô nê geh mơng ngêt âk ir ndrănh, n’hâm soan bôk rngok mô hôm nkah, ri ma geh rnôk nau ƀư bah nơm mô hôm tâm di.

Nô mô hôm nkah dŭm bri tŏ geh ăp nai dak si, điều dưỡng kơl mât, njrăng, rdâng nau ƀư bah nơm, nô Tôn ân lah, lah mô geh nau ŭch ndrel nuih n’hâm ueh tâm nau kan bah nai dak si, nklăp lah rnôk aơ nô mô gĭt moh nau tât ma nơm ơm. Tâm nau rhơn nau ji bah nơm bah oi, nchrăp geh hăn sit, nô Tôn nkoch lah:

            ‘Gâp saơ nŭih nai dak si ta ngih dak si aơ gơih ngăn, nsôih tâm ăp nau kan, tâm nê geh nai dak si Khắc ndrel điều dưỡng Tài mro hăn khám, mât chăm dŭt ma ueh ndrel bonh đă gâp âk ngăn. Gâp ŭch nơm mra dơi ât ndrănh, ndâk tay bôk rngok n’hâm soan gay ma ơm sĭt ma rnăk vâl”.

            Ngih dak si Tâm Thần n’gor Dak Lak geh ndâk tâm năm 2008, geh dĭng lĕ 100 nsưng bĭch, săm ân 100 nŭih ji, năm 2025, êng rlau 20 rbăn nŭih geh khám, ngih dak si hôm mât, săk ân 17 rbăn nŭih geh ăp nau mpơl ji kơt lah bôk rngok mô hôm nkah, rvê hô ir ndrel jêng trơn bah dih trong hăn lă lêng, tĭng Bôk nau kan bah neh dak mpeh dak si. Âk nŭih hŏ bah, sĭt ma rnăk vâl rnơm geh nau săm bah ăp rmôt nai dak si ndrel nŭih pah kan. Yơn lah, yor nau kan bah ngih dak si hôm mô tŏng nŭih kan, nau nkhôm pă, prăk khay ndrel nau mưch tâm ntŭk rêh jêng. Nau dak si Nguyễn Thị Luyến, Groi Giám đốc Ngih dak si đă du đê̆ nau kan gay ma n’hao lơn tay nau săm tam bah khám, săm ji tâm rơh tât:

            ‘Rnôk aơ, UBND n’gor Dak Lak geh nau kan kơl an rgum dŏng kơl an đah ăp nai dai si, rnoh kơl ntop tay 5% rnoh prăk khay ăp khay, tâm rnôk ăp nŭih êng kơt lah điều dưỡng, kỹ thuật viên lŏ ê saơ geh sa prăk aơ ơm. Tâm rnôk ntŭk ntu pah kan bah ngih dak si Tâm thần, tĭng gâp, ntŭk pah kan hôm jêr, rgănh tâm ban, ndri ma ngih dak si đă UBND n’gor ân geh rgâl nau kan kơl an ân điều dưỡng, kỹ thuật viên ndrel nŭih pah kan ndrel geh sa prăk tâm ban. Bah nê, bonh đă khân păng đăp mpăn tâm krêp ma nau kan, ma nŭih ji, lŏ mât chăm ndrel săm ân nŭih ji ân ueh lơn’.

            Ăp nar rlau, rmôt ăp nai dak si ndrel ăp nŭih pah kan tâm ngih dak si tâm Thần n’gor Dak Lak hôm nsôih rlet rlau ăp rnôk ƀư nau kan geh âk nau rvê, nau rgănh, nau mra tât khuch bah ăp nŭih ji bu mô blau njrăng, bu lơh dong. Bol ma ndri, đah nau kan ndrel nau nsôih ŭch bah nai dak si, khân păng hôm nsôih mât tâm dăch ma nau kan răk chăm, săm ji gay âk nŭih ji ngăch geh bah oi, ndâk nkah nau bôk rngok ndrel sĭt ma rnăk vâl, ƀon lan./.