N’hâm suan lah tơm ndơ dŭt khlay bah kon nuĭh n’hanh lah jâng nsing khlay an nău hun hao jŏ jong bah neh dak. Tâm nô nău mhe đah âk ntul rlong mpeh nuh srê, rnoh nuĭh ranh âk, ntŭk gŭ rêh n’hanh rgâl mpeh trong gŭ rêh, nău n’hao ngăch dăng n’hâm suan ƀon lan jêng nău dơn kan jăch ndăn. Nghị quyết 72-NQ/TW nar 09/9/2025 bah Bộ Chính trị mpeh “Du đêt trong nkra đăt ndal, n’hao âk mât chăm êng n’hanh n’hao ngăch dăng n’hâm suan ƀon lan” njêng luh lah njuat hăn têh jong, mpơl trong uănh têh jong n’hanh nău nsrôih dăng bah Đảng tâm trong kan dak si.

Tâm lvang năm 2026–2030, Nghị quyết 72 n’gluh rnoh tât rgum tơm lah rdâk njêng lam rêng kan dak si geh nău tâm ban, săk tam n’hanh lăp rgum, đăp mpăn ăp nuĭh ƀon lan dơi geh rhŏ dŏng mât chăm n’hâm suan đah prăk dŏng tâm di, ngăn ngăn:

- N’hao dăng n’hâm suan, bôk rngok, lhung jong săk n’hanh jong năm rêh bah nuĭh ƀon lan. Tât năm 2030, rĭng hao prêh bah kon se n’hanh druh ndăm rchong ntơm bah 1-18 năm deh dŭt đêt 1,5cm; jong rêh rĭng tât 75,5 năm deh, tâm nê rnoh năm rêh n’hâm suan ngăch dăng dŭt đêt 68 năm.

- Hŭch bah mbăk anh jâk kop ji n’hanh mât kân ăp ndơ geh ma nău jêng khuch tât n’hâm suan. Rnoh âk geh chuh n’gang ăp vắc-xin tâm bôk nău kan chuh n’gang tơm khlay geh tât rlău 95%. Rnoh âk nuĭh way râng rsong hăn ngăch dăng n’hâm suan hao tay 10%. 

Mât kân âk ăp ndơ geh ma nău khuch tât ngăch dăng n’hâm suan kơt ndrănh, bia, mhât n’hanh tât bah neh, dak, n’hâm sial...

- Nuĭh ƀon lan dơi tât đah ntŭk rhŏ dŏng dak si săk tam, rƀŏng tât mât chăm n’hâm suan lam lĕ rngôch.

- Ntơm bah năm 2026, nuĭh ƀon lan dơi but săm n’hâm suan tât leh mô lah but săm dơm ăp năm 1 tơ̆, dơi nchih ƀư siƀŭt n’hâm suan điện tử gay mât uănh n’hâm suan tĭng bông nuĭh, tĭng kơn mbăk anh jâk prăk dŏng dak si. Tât năm 2030, nuĭh ƀon lan dơi an bĭch dơm nhih dak si tĭng n’glĕ nău dơi dŏng bảo hiểm y tế tĭng trong tor lor.

- 100% nhih dak si gưl xã dơi ntuh kơl drăp ndơ, ntrŭp dŏng dak si, nuĭh kan tĭng nău dơn kan; tât năm 2027 geh dŭt đêt ntơm bah 4-5 bác sĩ. N’hao rnoh âk but săm ji ma bảo hiểm y tế ta nhih dak si gưl xã geh tât rlău 20%.

- Tât năm 2026, rnoh âk nkrum bảo hiểm y tế tât rlău 95% rnoh nuĭh, tât năm 2030 geh nkrum bảo hiểm y tế lam ƀon lan; ƀư tay ăp ntil bảo hiểm n’hâm suan.

Uănh tât năm 2045:

- Nsrôih ntŭk gŭ rêh săk uĕh; ăp rnoh ngăch dăng n’hâm suan bah ƀon lan, rnoh nkrum lam rhŏ dŏng mât chăm n’hâm suan khlay ban dah ăp dak hun hao tâm nkual n’hanh lam ntŭr neh. 

- Nuĭh ƀon lan rĭng jong rêh geh tât rlău 80 năm deh, tâm nê rnoh năm n’hâm suan ngăch dăng hao rlău 71 năm deh, lhung jong săk, suan dăng, rnoh rĭng prêh bah druh ndăm tâm ban đah ăp dak geh ndrel rnoh hun hao. 

- Lam trong kan dak si têh blău mhe, tâm ban, geh nău tam, jŏ jong, sŏk njrăng n’gang nău ji ƀư ndơ an lor bôk năp, tŏng an nău ŭch geh mât chăm n’hâm suan nar lơn ma âk ntil bah nuĭh ƀon lan.

Gay tât ăp rnoh bah lơ nê, Nghị quyết 72 n’gluh ăp rnoh tât dơn kan, trong nkra geh nău đăt ndal, lah:

1. Rgâl mhe nău mĭn n’hanh dâk kan tâm trong rđău đă, mât bôk kan, tĭng ƀư pah kan mât chăm n’hâm suan n’hanh n’hao ngăch dăng n’hâm suan ƀon lan.

2. Ngăch lôch jêh trong tĭng, rgum n’hao nău dơi dăng mât chăm lam trong kan dak si, lơn lah dak si njrăng n’gang lor, dak si tâm dâng, ntik n’hao suan dăng bah y học cổ truyền.

3. N’hao nuih n’hâm uĕh lŏng nuĭh kan dak si, hun hao tơm nuĭh kan dak si săk blău âk, ăp kôp, tŏng an nău di nuih n’hâm bah nuĭh ji n’hanh lăp rgum dak bah dih

4. Ntrôl ngăch rgâl geh prăk kan dak si n’hanh hun hao geh nău dơi, jŏ jong trong kơl bảo hiểm y tế

5. Đăt ndal hun hao khoa học, công nghệ, rgâl blău ƀư mhe n’hanh rgâl mbrô lam lĕ rngôch tâm mât chăm n’hâm suan.

6. Ntrôl dăng hun hao dak si bah dih ngih dak, rgum n’hanh dŏng geh nău tam ăp tơm ndơ an hun hao dak si

Nghị quyết 72 geh nkô̆ khlay mha êng tâm trong nchrăp hun hao neh dak. Ăp dak ŭch geh hun hao jŏ jong tât rnôk nuĭh ƀon lan ngăch dăng dơm. Ntuh kơl an dak si lah ntuh kơl an nău rêh let năp tay, an tơm nuĭh kan – ndơ n’gâng tơm bah hun hao wăng sa n’hanh rgâl mhe nău rêh jêng.

Nghị quyết mô dơn nkra ăp nchiăng khan, mpăng đêt bah lam trong kan dak si aƀaơ ma hôm njêng luh đăt ndal mpeh nău mĭn n’hanh nău dâk kan đŏng. Nău rgâl dăng bah “săm ji” tât “mât chăm n’hâm suan lam lĕ rngôch”, bah nău ndrât ndal, bah nău săm jêng njrăng lor lah njuat hăn khlay, tâm di đah trong rƀŏng hun hao bah lam ntŭr neh.

Nkre, Nghị quyết 72 rgop rdâk nâp tay nău nsing nơm bah ƀon lan tâm lam trong kan dak si, n’hao săk geh nău rêh n’hanh rnoh rhơn răm neh dak. Aơ lah ndơ khlay kơl Việt Nam n’hao suan dăng tâm rlong n’hanh ntŭk gŭ kan têh  khlay lam ntŭr neh.