Mô dơn nar măng đăp dêh bah meng nsưng nuĭh ji, tâm pit mplơ̆ nău rêh an tĭng kon se ji, âk y bác sĩ n’hanh nuĭh kan dak si ta Gia Lai hôm rŭ hôch an ăp ntruh mham bah nơm – gay nthoi jong tay nău rêh an nuĭh ji. Ăp ntruh mham tâm rŏng nê mô dơn âk tơ̆ kơl nuĭh ji, ma hôm mât nău mpŏng an mô đêt rnăk wâl. Ta Nhih dak si kon se n’gor Gia Lai, nuih n’hâm tâm pă nê hôm lơn ma dơi ring lam tay – mô dơn ma nău dơn kan nău kan, ma hôm ma nuih n’hâm bah ăp nuĭh nai dak si.

Yuh Võ Thị Tuyết Nhung, pah kan ta Khoa Tiêu hóa, lah du hê nuĭh ntĭt leo lor ntoh lư. 9 năm krêp dêh đah nău kan, mô dơn mât chăm lĕ nuih n’hâm, săm an ăp kon se ji, yuh hôm âk tơ̆ yur êng mham tâm rnôk geh nău tât jăch ndăn đŏng. Tât aƀaơ, yuh hŏ geh 22 tơ̆ yur êng mham kơl săm ndal, năn kơl rêh âk nuĭh ji jru. Đah yuh, ăp tơ̆ kơl an lah ntop geh tay du nău rêh dơi gŭ tay.

“Ăp rnôk kơl ndal kơt nê ri gâp mĭn lah yur mham gay kơl an khân păng dơm, nsĭt tay du trong rêh an khân păng. Ri ăp rnôk nê ri gâp saơ dŭt rhơn yor gâp hŏ ƀư dơi du nău kan dŭt uĕh an ăp nuĭh êng. Mô dơn geh du hê gâp nsĭt tay ăp nău kan dja tât ăp nuĭh, ma hôm geh sai gâp, me gâp, yuh nô gâp đŏng n’hanh kơt lah bơi lĕ du rnăk gâp râng yur mham da dê. Ăp rnôk kơl săm ndal, ŭch geh moh ntil mham ri mpôl hên mbra yur mham an ăp khân păng.”

Ndrel đah yuh Nhung, yur êng mham hŏ jêng dâk êng đah rmôt cán bộ, nuĭh kan dak si bah nhih dak si kon se Gia Lai. Kruanh rđău kan gưl jrô kan kơt yuh Đỗ Thị Thu Hà an gĭt:

“He mĭn lah du ntruh mham kơl an lah du nău rêh gŭ kơn tay, ri he mĭn nê lah du nkô̆ hôr khlay. Tâm rnôk nê he mĭn săk he mô geh du ntil nău kan têh khlay ôh. Rnôk he saơ du hê nuĭh ji dôl tâm nô nău jăch ndăn ân dơi kơl săm ndal ri he mĭn ta săk he nơm geh nău dơi ri he mbra an dơm”.

Mô lah gưl khoa kơt bác sĩ Rmah Din hŏ dơi âk tơ̆ yur êng mham đŏng, nkoch:

“Lĕ rngôch ăp nuĭh kan ta Nhih dak si kon se dja geh nuih n’hâm yur êng mham kơl nuĭh gay săm ji da dê. Nuih n’hâm n’hanh nuĭh ji lah nău khlay dâk bôk năp, jêng ăp y bác sĩ mô lah ăp điều dưỡng mô lah ăp nuĭh kan dak si êng ƀa ƀă bah nhih dak si n’grŏ tĭng nău yur êng mham gay  kơl nuĭh ji.”

Uănh saơ du bông săm ji chrai mham ơm bah ndŭl me (Thalassemia) I kon ta Nhih dak si kon se Gia Lai, Yuh Nông Thị Tươi, gŭ ta xã Ia Piơr mô bah rngot rhơn bah năp lĕ nuih n’hâm kan bah rmôt y bác sĩ ta aơ. Tâm ăp rnôk geh nău jăch ndăn mô lah ăp rnôk tơm mham jêng kroh khar, ăp y bác sĩ nơm hŏ mô rnam yur êng ăp ntruh mham bah he nơm gay năn kơl săm an ăp kon se ji.

“Ăp mon geh chrai mham ơm bah ndŭl me, n’hanh ăp khay ân lăp ta aơ yur êng mham, ân way yur mham mbro. N’hanh ta aơ way ơm geh tơm mham gay an ăp mon đăp mpăn ngăch dăng n’hâm suan”

Ăp ntruh mham tâm rŏng mô dơn rgop kơl rêh âk nuĭh ji, ma hôm ring lam jru hvi nău mpơl rŏng nuĭh tâm lam nsum mpôl. Nê lah ndơ an saơ n’grêh rêh an nău ntĭm “Nuih n’hâm nuĭh kan dak si tâm ban kơt me mbleh”  rnôk nuĭh tơm kan dak si mô dơn săm ji, ma hôm kơl an nău mpŏng rêh an nuĭh êng, ma ăp nău kan ngăn dơm yơn dŭt n’hâm têh khlay.