Nar dăch aơ, Khoa Nhi tổng hợp Ngih dak si đa khoa nkual Tây Nguyên djôt dơn tay âk nuĭh ji lah kon se ntưp jâng ty mbung. Wa Hoàng Thị Chuyên ta xă Đắk Liêng, n’gor Dak Lak geh mon bu klô 4 năm deh dôl săm ta aơ an gĭt, ta năp nĕ rnăk wâl saơ mon geh duh hô, jâng ty luh âk rplay chăng dak, rwăt dak bah duh an mon ngêt yơn mô bah. Rwê, rnăk wâl lĕ ndơ̆ mon tât ngih dak si săm.

Mon duh ŏk rgănh, geh khĭt brŭt tay. Mon mô dơi ngêt sa, ji mon nhĭm, jâng ty luh mŭn jêng ji n’hanh ngêt dak ri hok, bĭch lêt rgănh tay. Gâp dŭt rwê.

Yuh H’Duyên Byă, xă Cư Pui, n’gor Dak Lak geh kon bu klô ntưp ji jâng ty dôl săm ta Khoa Nhi Ngih dak si đa khoa nkual Tây Nguyên rlău 1 pơh aơ, rwê.

Hăn ngih dak si geh 8 nar jêh nĕ n’hanh aƀaơ mon bah oi âk hôm. Nar bah năp lah mon dŭt hô, mô dơi ngêt sa mro, yor sôt ok mbung.

Nai dak si Lê Thị Bích Phượng, Khoa Nhi tổng hợp, Ngih dak si Đa khoa Nkual Tây Nguyên mbơh, bah bôk khay 3, rnoh nuĭh kon se ji jâng-ty-mbung lăp ngih dak si ngăch, geh nar djôt dơn rlău 10 nuĭh. Jêh uănh xét nghiệm mham an saơ nău ntoh bah Enterovirus 71-ntil kaman geh khih âk, ƀư hao klăch rgâl mbăn, lơn lah ta kon se bah dâng 5 năm deh:

Năm aơ tĭng xét nghiệm bah Ngih dak si mpôl hên dơi gĭt saơ tuýp EV71 pơng ntưp âk lơn. Ji EV71 ƀư an kon se duh, geh âk nău rgâl klach kơt: rgâl thần kinh, hệ tuần hoàn. Kon se geh duh hô na nao, rhoăt mprâm săk. Geh âk kon se mbăn lơn lah khĭt brŭt, nsôr ngăch.

Mô knŭng ji jâng ty mbung hao, rnoh nuĭh ntưp duh rtoh luh mham rih n’hanh luh mê ta kon se Dak Lak geh trong hao. Ta xă Ea Riêng lĕ djôt dơn ntŭk srê luh mê tâm ngih samƀŭt đah 26 nuĭh ntưp. Ta năp nu nău aơ, nău kan dak si xă lĕ ndăn nchoeng nkual, mkra ntŭk srê, nkre mbơh ƀư ăp trong mkra groi nđôi gay nking n’gang ntưp rêng n’hanh ntoh ta lam hvi. Wa Trương Thị Ngân, cán bộ Ngih dak si xă Ea Riêng, n’gor Dak Lak, an gĭt:

Ngih dak si lĕ tâm pă cán bộ jŭr nkual ntoh srê gay puh rao, răk ntŭk ntô gŭ âm; nkre ntĭm nuĭh ji khah êng ta ngih n’hanh ntơm uănh nđôi, săm ji.

Bah bôk năm tât ababơ, Dak Lak djôt dơn 5 ntŭk srê ji jâng ty mbung đah nklăp 700 nuĭh ntưp ta âk ntŭk; 26 nuĭh ntưp luh mê n’hanh bơi 600 nuĭh duh rtoh luh mham rih, hao ngăch nkôp đah rơh aơ năm bah năp. Gay uănh nđôi nu nău, nai dak si Hoàng Hải Phúc, Giám đốc Ntŭk kop ji n’gor Dak Lak, an gĭt.

Mpôl hên ndâk njêng trong nchrăp tâm ôp tâm nchră N’gâng kan dak si n’gor Dak Lak gay mbơh ƀư ăp trong mkra rĭng, gay uănh nđôi, nking n’gang kop srê mô an rêng hvi ta ntŭk. Lơn lah, mpôl hên lĕ ndâk njêng  mpôl hăn uănh nđôi, groi uănh n’hanh ntĭm, nkoch trêng nuĭh ƀon lan n’hao wât njrăng n’gang srê. Nkre, pă an dak si hóa chất gay puh rao ntŭk ntô gŭ âm, njrăng n’gang srê ntơm bah bôk năp, bah ơm, bah ngai.

Ta năp nu nău kop srê jêr jŏt ta kon se, nău nchrăp njrăng n’gang, saơ ơm n’hanh săm ngăch ƀư tơm khlay gay n’hŭch rgâl nău ji n’hanh nking n’gang ntưp rêng. Bah meng nău nsrôih bah nău kan dak si, ăp rnăk an n’hao wât mât răk, uănh nđôi săk soan kon se, tă bah nĕ ndrel ty uănh nđôi săk rnglăy ăp kop srê, mât njrăng đăp mpăn an nsum mpôl.