Ntŭk ơm yău Tháp Nhạn n’gor Dak Lak êp nar Lễ vía Bà geh dŭt âk bu năch. Yuh Tống Thị Hải Yến, năch pâl nđaih tât bah Phú Thọ an gĭt, gâp mhe geh du trong hăn rlău 180km bah Buôn Ma Thuột jêng dŭt ji ŏk. Du đêt năch tâm rmôt lĕ ntlơi tour, mô tŏng soan gay hăn lôch trong ôi tât bri, kêng măng mâp dak lêng; ôi ngêt cà phê Ban Mê, kêng măng uănh san hô Hòn Yến. Yuh Yến an lah, nklăp n’gul ăp ntŭk tât tâm ƀah, trong hăn mô uĕh jêng mông nar ât nău hăn njưch lĕ mông nar pâl nđaih.

 Aơ lah rơh bôk năp gâp tât ta aơ ri gâp saơ nkual neh aơ dŭt uĕh, kon nuĭh đêp rmên, nău rhŏ uĕh đŏng. Yơn hôm e âk ndơ geh ơm, mô dưi ntuh kơl uĕh, mô geh âk nău rhŏ gay mât jâng bu năch. Lah hun hao uĕh ri ntŭk aơ hôm dŭt âk ndơ geh.

Pâl nđaih Dak Lak hôm bri nđik, uănh lah nsum bah âk doanh nghiệp lữ hành. Ăp njăr trong ngai, ndơ mô tŏng trong jru ƀư nău uĕh hŭch. Bah nkual têh Buôn Ma Thuột ta mpeh bah lơ tât dak lêng mpeh bah dâng nhâp nar ngai rlău 180km. Bah Buôn Ma Thuột tât ăp ntŭk pâl nđaih jêt lơn, kơt N’glău Lắk, Buôn Đôn ngai rlău 50km. Yuh Phạm Bích Hạnh, ntoh măt du công ty pâl nđaih ta Nkual ƀon têh Hồ Chí Minh an gĭt:

Njăr trong hăn dŭt ngai, năch mbra dŭt ji ŏk lah hăn ƀư ngăn bah bah dâng nhâp nar hăn bah lơ bah Dak Lak. Lah rgâl ntung trong ri rnoh năch sĭt ta aơ mbra dŭt uĕh.

Wa Trần Hữu Phước, ntŭk kan pơk dŏng tour dak bah dih trong Việt-Lào an lah, tâm ƀah têh, ntung trong boăt nthoi mô tâm ban ƀư nău rdâk nkra ăp tour tâm rgop đah bri n’hanh dak lêng hôm e âk jêr jŏt:

Aƀaơ ăp njok trong ma nthoi đah yôk têh bri krŏng n’hanh ăp n’gor duyên hải miền Trung dôl hôm e mô uĕh.

Ndrel đah nău ntung trong, pâl nđaih ta Dak Lak dơi uănh lah hôm e dŭt mô tŏng trong jru. Năch pâl nđaih tât ăp ntŭk uănh nsong ta Dak Lak, chŭp rup jêh nĕ ngăch ntlơi hăn. Ăp nău ƀư văn hóa ta âk ntŭk hôm geh nău nsơ mpla, mô geh tâm rgop mô geh ăp nău rhŏ jŏ nar rlu rlău, jêng Dak Lak jêng ntŭk “ngai ri yô̆-dăch ri yô̆”. Wa Dương Quốc Tuấn, ntĭm năch pâl nđaih way hăn trong Tây Nguyên-duyên hải Miền Trung an gĭt, nău tâm ban, nsum nsum ta âk ntŭk tât lah nău mô uĕh ngăn bah Dak Lak.

Wăng sa măng ri hôm e dŭt đêt, đêt geh ntŭk pâl yor nău geh êng he mô ƀư wăng sa măng kơt Thái Lan. Hôm đah bri dak ri aƀaơ năch bu rgop nău lĕ rngôch kơt tâm ban mpeh ăp ntŭk si tăm, yor ăp ntŭk tâm pă lah coppy tâm ban lĕ rngôch, mô hŏ uĕh ngăn.

Jêh nglăp nsum, Dak Lak lĕ geh dak lêng, pơk luh mpŏng hao têh an pâl nđaih tât bri-ŭm dak lêng. Yơn lah, rnoh đah nău geh an saơ du na nê̆ dŭt jêr. Tâm rơh rlu lễ 30/4 n’hanh 1/5 mhe rlău, sŏk geh pâl nđaih Dak Lak rlău 520 rmen prăk, geh nklăp n’gul Gia Lai, tâm ban du gâl 3 Lâm Đồng n’hanh tâm ban nklăp du gâl 5 Khánh Hòa. Nău jêt mô dăng bah pâl nđaih Dak Lak hôm e saơ ta uĕh nâp ntung trong ngih wâl rlu rlău, rnôk knŭng geh 2 ntŭk geh tâm di 5 saơ; 4 ntŭk geh 4 sao, 9 ntŭk geh 3 sao. Ăp ntŭk pâl nđaih ntoh lư ngăn bah Dak Lak, kơt Bản Đôn, N’glău Lắk, Bảo tàng, N’glău Ea Kao... dŭt đêt rgop tâm hao jêng nsum bah n’gor.

Tĭng wa Nguyễn Thị Ngọc Anh, Kruanh Rmôt Bu ur doanh nhân n’gor Dak Lak, pâl nđaih sinh thái-nsum mpôl lah geh âk bah n’gor, yơn doanh nghiệp knŭng janh ntuh kơl jêt yor neh pâl nđaih ma n’gor an manh dôl nchâp khlay neh tăch rgâl nău rhŏ. Lah dak Lak mô dôh rklaih ăp wăk kol aơ, pâl nđaih ta n’gor dŭt jêr rgâl hao nu nău jêt mô dăng aƀaơ hin.

Dŭt âk nău kơl mpeh ntŭk ntô gŭ âm, neh ntu n’hanh ăp nău ntrŭnh geh tât dôl jêng mpêr n’gar đah nuĭh ntuh kơl dŭt n’hâm. Lah nău kơl mô tŏng soih kloh ri jêr geh ăp nău nchrăp ƀư pâl nđaih têh ma knŭng geh hun hao jêt chrai dơm.