VOV4.M’nông - Ta năp nu nău jêr jŏt bah srê Covid-19 n’hanh geh rêng lăp srê tă bah n’har bri, rmôt n’har bri ăp n’gor Tây Nguyên lĕ mbơh ƀư rmôt kan, ƀư hăn uănh nđôi jêng du trong njrăng nâp nâl tâm trong kan njrăng n’gang srê.

         Kon Tum lah n’gor trong n’har bri jong ngăn ta nkual Tây Nguyên, đah 292 km jong rlău 13 xă, ta 4 nkuăl, kâng n’har đah dak băl Lào n’hanh Campchia. Aƀaơ, rmôt n’har bri n’gor Kon Tum dôl mât 66 ntŭk nking n’gang đah tŏng ăp rnoh nuĭh, ƀư uănh nđôi trong n’har măng nar. Tâm nkual, rmôt n’har bri nkoch trêng an nuĭh ƀon lan gŭ rêh, tuch tăm ta nkual n’har bri sĭt pah kan njrăng n’gang srê, nkre tâm rgop rchăng luh lăp mô tâm di nău way; nkoch trêng, ntĭm nti cán bộ, tahen tĭng nău mbơh 5K, uănh njrăng mro, nchrăp lah geh nu nău rgâl. Đại tá Lê Minh Chính, Bí thư Đảng ủy, Chính ủy Tahen n’har bri n’gor Kon Tum an gĭt:

         “Mpôl hên mât rjăp ăp ntŭk kâp uănh ta njok trong n’har bri, ngăn lah ăp nkual njônh bah kơi 2 đah mpông n’har bri n’hanh ăp trong har, trong pơk luh lăp; tâm rgop rjăp tahen n’har bri đah rmôt dân quân rnâng kan bah n’gâng kan ntĭm rđau tahen n’gor n’hao ntop kơl tâm rnôk ƀư tĭng nău kan. Nkre, mpôl hên ntĭm rđau ƀư uĕh trong kan nkoch trêng an cán bộ tahen n’hanh nsum mpôl nuĭh ƀon lan ta nkual n’har bri gay an ăp nuĭh n’hao nuyih n’hâm njrăng, mô thơ tha tâm trong njrăng n’gang srê, ƀư tĭng uĕh 5K. Ăp nău ƀư hăn nsum luh lăp bah dih dơi uănh nđôi rjăp da dê”.

Rmôt tahen n’har bri n’gor Kon Tum nkoch trêng an nuĭh ƀon lan nkual n’har bri mpeh njrăng n’gang srê n’hanh nking n’gang luh lăp bah dih mô tâm di nău way

Ndrel rnôk aơ, ƀư tĭng nău kan njok 90 km trong n’har bri kâng n’har đah n’gor Rattanakiri, dak Campuchia, đah 1 mpông n’har bri n’hanh âk trong har, trong pơk luh lăp, rmôt tahen n’har bri n’gor Gia Lai dôl mât 24 ntŭk njrăng n’gang srê Covid-19 njok n’har bri. Ndrel đah nĕ 10 rmôt hăn uănh nđôi pah kan măng nar gay saơ, nking n’gang nău ƀư luh lăp mô tâm di nău way.

Ta mpông n’har bri Quốc tế Lệ Thanh (nkuăl Đức Cơ), đah trong puh rao âk rwăch, rgâl nuĭh ƀĭt ndeh, rmôt n’har bri tâm rgop đah ăp rmôt soay luh lăp ndơ, nai dak si tŏng ăp nău kan luh lăp ndơ. Tâm nkual, ăp pôih tahen n’har bri tâm rgop đah bu ranh ƀon, nuĭh dơi nsing nơm nkoch trêng nuĭh ƀon lan rlu ăp nău ƀư khâl nuĭh bên ta lĕ 2 đah n’har bri, nkre phong ăp nău ƀư tih, geh nău mpôn mo luh lăp mô tâm di nău way. Đại úy Phan Thanh Hà, Groi Kruanh Pôih Pôih tahen n’har bri Ia O (N’gâng kan ntĭm rđau tahen n’har bri n’gor Gia Lai) dôl pah kan ta nkuăl n’har bri Ia Grai an gĭt:

“Pôih tahen n’har bri Ia O dôl mât du ntŭk njrăng n’gang luh lăp mô tâm di, 1 ntŭk njrăng n’gang srê Covid-19 n’hanh 1 rmôt hăn ăp ntŭk; tâm rgop đah ăp ngih pah kan dơi kan ƀư hăn uănh nđôi nkual n’har bri, ntŭk pôih dơn mât uănh, gay ơm saơ nu nău luh lăp bah dih mô tâm di nău way gay geh trong nking n’gang, njrăng srê tă bah n’har bri; an ntŭk kan tâm nu nău têh ngăn njrăng n’gang srê n’hanh ƀư tĭng rjăp nău way 5K; cán bộ, tahen mât rnoh nuĭh, tŏng ăp kâp njrăng rdâng lơh”.

Hôm n’gor Dak Lak geh trong n’har bri rlău 74 km hăn rlău 2 nkuăl Ea Súp n’hanh nkuăl Buôn Đôn, êp kâng n’har đah n’gor Mundulkiri, dak Campuchia. Thượng tá Nguyễn Minh Tuyên-Groi Chỉ hủy trưởng N’gâng kan ntĭm rđau Tahen n’har bri n’gor Dak Lak an gĭt, aƀaơ, ăp pôih tahen n’har bri lĕ n’hao nău ƀư uănh nđôi, nău nsrôih nking n’gang mô an nău lăp sĭt mô tâm di njok 4 xă, ta 2 nkuăl n’har bri. Knơm nuih n’hâm mĭn njrăng n’hanh ƀư tĭng rjăp ăp trong kâp njrăng, uănh nđôi, nar bah năp, rmôt tahen n’har bri lĕ saơ n’hanh nking n’gang ơm âk nuĭh luh lăp bah dih mô tâm di nău way:

Rmôt tahen n’har bri Tây Nguyên lĕ jêng trong njrăng n’gang srê njok hang rhiăng km trong n’har bri

“Tâm rnôk yan wai, gung trong hăn nsong đah 2 ding dŭt dơh, mpôl hên mât 6 ntŭk nâp nâl, 12 rmôt uănh nđôi hăn ăp ntŭk tŏng ăp uănh nđôi nsum măng nar, nsrôih nhŭp kân ăp nuĭh hăn rlău n’har bri mô tâm di bah Campuchia sĭt Việt Nam. Mpôl hên rgŏ jă ƀon lan tĭng rjăp ăp nău ƀư n’har bri, mô hăn nsong n’har bri, ƀư tĭng rjăp ăp trong njrăng n’gang srê, mât uănh rjăp ăp nuĭh. Ta ngih pah kan ntŭk kan, mpôl hên đă wăn bok put mbung, n’hanh ƀư tĭng nău mbơh 5K bah n’gâng kan dak si đăp mpăn trong njrăng n’gang srê geh săk rnglăy uĕh”.

Đah nsrôih têh, n’hanh âk trong ƀư n’hanh nuih n’hâm nchrăp rdâng, mĭn lor, rmôt tahen n’har bri njok hang rhiăng km trong n’har bri ta Tây Nguyên dôl jêng mpêr n’gar nâp nâl, rchăng n’gang srê Covid-19; nta nơih uĕh ngăn gay ăp ntŭk nkre njrăng n’gang n’gang srê, nkre mât uĕh ăp nău ƀư wăng sa-rêh jêng./.

Nuĭh răk rblang: Y Sưng Phê Ja