VOV4.M’nông - Rnoh nuĭh ntưp Covid-19 ta Dak Lak dôl hao klach rvê. Geh ƀon kơp dơn tât 34 nuĭh ntưp knŭng tâm 1 pơh. Rlău ma nkô̆ nău srê ntưp, mbơh dơi mô ngăn ƀư nău kan dak si jêr uănh nđôi, ri nău nkhah êng ta jay lah dŭt klach rvê. Lơn lah mpôl nĭh bah nkual srê sĭt ƀon nar lơ âk, ƀư nău ntoh luh srê nar lơ âk, joi đă ăp ntŭk tâm n’gor an geh trong rhoăt ngăch gay mkra, n’hao lơn tay săk rnglăy trong kan njrăng n’gang srê.

         Pơh bah năp, ta Dak Lak geh tay nkuăl M’Đrak kơp dơn nuĭh ntưp SARS-CoV-2 bôk năp tâm rơh srê aơ. Nuĭh aơ bah nkual ƀon têh HCM sĭt lĕ dơi nkhah êng 1 pơh ta jay, ta thôn 16 xă Ea Riêng. Ban ntĭm rđău njrăng n’gang srê Covid-19 bah xă lĕ tâm pă 5 rmôt, uănh nđôi nău tĭng nkhah êng ta jay bah 164 nuĭh. Wa Trần Thị Thanh, Kruanh Ngih dak si xă Ea Riêng an gĭt, lĕ rngôch ăp nuĭh tŏng di nău đă da dê dơi nchih tâm nău ntrŭnh nkhah êng bah Kruanh UBND xă, kơt ký ton nkhah êng, năp dak si puh rao kaman, test ngăch tĭng nar ta ngih dak si. Du rnăk geh nuĭh khah êng geh yông sam ƀŭt mbơh njrăng gay ƀon lan dơh uănh nđôi. Ndrĭ yơn, tĭng wa Trần Thị Thanh, hôm e âk nău tih ƀư geh ntưp rêng ma nău mkra, hôm e mô tŏng bah dih nău geh bah xă:

          Mpôl nuĭh bah nkual ƀon têh HCM n’hanh ăp n’gor jêr jŏt đah srê Covid-19 sĭt ƀon Dak Lak nar lơ âk, mbơh lor geh nuh srê nar lơ âk. Ntơm bah nău mbơh mô ngăn, mô nkhah êng, du hê nuĭh kan jay ndeh ta Buôn Ma Thuột lĕ ntưp an rlău 10 nuĭh, n’hanh nuĭh kan aơ lah nuĭh geh khuch hô ngăn, rnôk lĕ 5 nuĭh tâm rnăk wâl ntưp chôt srê da dê. Jêh nĕ dâl, 1 hê êng, bôl lĕ mbơh rjăp, ký ton nkhah êng ta jay gŭ ƀon Ea Bhok, xă Ea Bhok, nkuăl Cư Kuin, yơn jêh nĕ srê lĕ ntưp rêng lam ƀon, đah bơi 40 nuĭh ntưp. Ƀon Khóa, xă Cư Pui, nkuăl Krông Bông, bah du hê nkhah êng ta jay ma ntưp an 14 nuĭh. Wa Trần Hồng Thái, Kruanh thôn Tân Đông, xă Ea Kênh, nkuăl Krông Pak, an gĭt, thôn dơi uănh nđôi, rjăp đăp mpăn nuĭh nkhah êng mô dơi luh jay, yơn nău groi nđôi nkhah êng tâm rnăk wâl dơm, lah nău jêr jŏt:

  Yông nău mbơh nkhah êng ta xă Ea Kênh, Krông Pắch, Dak Lak

       “Tâm du rnăk ma F1 nkhah êng ri nuĭh tâm jay mbra F2. F1 mô luh bah dih jay, yơn ăp nuĭh kiău ma, ăp F2 hôm e luh bah dih. Ndrĭ nău nkhah êng kơt nĕ geh đăp mpăn đŏng lah mô, ri lĕ trong chính trị hôm e rvê đah nău aơ”.

          Rơh srê Covid-19 rơh tal 3 aơ ta n’gor Dak lak, geh rlău 50 nuĭh F0 lah tu tơm ntưp bah đêt nuĭh plơ̆ sĭt bah nkual srê bah dih n’gor, an saơ nău klach têh ma Dak Lak dôl rdâng. Wa Nay Phi La, Kruanh N’gâng kan dak si n’gor Dak Lak an gĭt, lah mô nking n’gang ăp trong ntưp kơt mhe rlău, nău kan dak si ta ntŭk mbra dŭt âk.

         “Bah 1 hê F0 ri mbra geh tay đêt ngăn 100 tât 150 nuĭh F1 n’hanh rlău 300 nuĭh F2, kơt nĕ, trong kan joi, uănh năl mbra mbak jâk an nău kan dak si. Yor nê, ndrel mbak jâk joi jŏ ri srê ntưp lơ ngăch”.

Mpôl nuĭh bah mpeh bâh dâng sĭt Dak Lak ta Quốc lộ 14

           Bôl lĕ geh trong nchrăp tâm rgop đah nkual ƀon têh HCM n’hanh ăp n’gor mpeh bah dâng kơt Đồng Nai, Bình Dương gay njŭn phung pah kan sĭt ƀon, yơn tât aƀaơ Dak Lak hôm e mô hŏ dơi ƀư. Tâm rnôk nĕ, hang rbăn nuĭh bah ăp n’gor mpeh bah dâng dôl rlơ̆ Quốc lộ 14 sĭt tay đah ndeh măy êng. Mhe aơ ngăn, tâm măng 29/7, geh nklăp 700 nuĭh hăn ndeh măy bah Đồng Nai sĭt Dak Lak. Gay tŏng ăp đăp mpăn an nuĭh aơ, rmôt kan dơi kan an njŭn lôch du njăr trong. Tâm rnôk nĕ, trong nchrăp bah UBND n’gor Dak Lak mbra wơt 500 nuĭh ƀon lan bah nkual srê sĭt n’gor. Tâm nĕ, n’gor pă kloh ăp nuĭh kơl lor dôl mâp jêr jŏt ta ăp nkual nchoeng n’gang. Knŭng tâm đêt nar, mbơh lĕ rngôch bah ăp ntŭk n’hanh ăp trong mbơh tâm website, lĕ geh nklăp 10.000 nuĭh tâm ăp nkual srê dăn sĭt ƀon. Bôl ndrĭ, tĭng wa H’Yim Kdoh, Groi Kruanh UBND n’gor Dak Lak, aƀaơ n’gor dôl rgum nkhĭt rdêl srê, jêng jêr pă ƀư tĭng nău wơt nuĭh ƀon lan bah ăp n’gor.

         “Aƀaơ n’gor dôl ƀư tĭng Ntĭm đă 16 jêng dŭt wăk kol. Tal 2 tay lah nu nău srê tâm n’gor geh nu nău dŭt n’hâm jêr jŏt tay, kơt nĕ dŭt jêr gay tŏng ăp đăp mpăn an nuĭh ƀon lan sĭt. Aƀaơ n’gor dôl rgum dŭt n’hâm ăp nuĭh an trong kan săm, mât uănh, groi nđôi ăp nuĭh ji n’hanh F1, F2”.

         Aƀaơ, nkual ƀon têh Buôn Ma Thuột n’hanh du đêt ntŭk bah n’gor Dak Lak dôl an nchoeng n’gang tĭng Ntĭm đă 16. N’gor kơl lor nchăng n’gang srê ta ntŭk jêng mô dơi thơ tha nău wơt nuĭh ƀon lan sĭt bah nkual srê. Ăp ntŭk aơ hôm e ƀư ăp trong gay wơt mpôl nuĭh dôl sĭt êng đah ndeh măy sĭt ƀon. Rnôk lĕ sĭt ƀon, bôl tĭng ăp nău ntrŭnh kơt mbơh săk soan, nkhah êng ta jay, yơn đah nău ngăn bah ăp rnăk ri ngih pah kan dơi kan dŭt jêr jŏt uănh nđôi. N’hêl na nê̆ an saơ, groi nđôi rjăp ntơm bah dih, ntrôl dăng uănh năl mham, joi nuĭh lah nău mô hŏ tŏng nking n’gang ntưp rêng. Âk rnăk wăng sa jêr jŏt, nău dơi nkhah êng jêt, n’hanh ngăn lah, nău wât njrăng n’gang srê mô âk, dôl lah du trong l’hoi an ơm dơi n’gor mkra. Jêng lah, bah dih nău 5K njrăng n’gang srê, an uănh rjăp, kơl gay nuĭh nkhah êng ta jay dơi ƀư tĭng 3 êng, lah ngêt sa êng rlŭ ngan êng, ntŭk gŭ bĭch êng; n’hanh ăch chrach êng.

                   Nuĭh rblang: Y Sưng Phê Ja