VOV4.M’nông: Măng 19/11, nau nkah ăp nŭih ƀon lan lĕ khĭt tâm rơh srê Covid-19 geh tâm ntŭk tơm nê lah Ngih rƀŭn Thống nhất, nkuăl ƀon têh Hồ Chí Minh ndrel Công viên Thống Nhất, nkuăl ƀon têh Hà Nội. Tâm ntŭk ƀư tơm tâm Ngih rƀŭn Thống Nhất, nkuăl ƀon têh Hồ Chí Minh, ăp rđau kan Đảng, Ngih dak geh tât tâm nar rƀŭn gay mpoh kthup, leo nkao nkah ăp nŭih băl mpôl, kônh wa, ƀon lan, tahen tâm lam dak hŏ khĭt yor srê Covid-19.

Ntoh măt Đảng ndrel Ngih dak, wa Đỗ Văn Chiến, Bí thư Trung ương Đảng, Kruanh Uỷ ban MTTQ Việt Nam ntoh nau rngot klâng ngăn, pă ăp nau rngot ngăn tât đah ăp nŭih lĕ khĭt tâm rnôk srê Covid-19. Wa Chiến lah rjăp, yor srê hô ir, khuch ngăn ri ma bol ma geh nau nsôih, yơn geh âk nŭih rnôk khĭt ê geh ƀư nau nchrăp kan tĭng nau vay, nau mơng.

Tât lơ 19/11, lam dak kơp dơn geh 23 rbăn nŭih khĭt yor srê Covid-19, tâm nê nkuăl ƀon têh Hồ Chí Minh geh rlau 74% đah 17 rbăn nŭih khĭt. Srê Covid-19 hŏ lơh roh âk ntil ndơ, lơh jêng nau khuch bah ăp nau ji, nau rngot. Nkah ăp nŭih khĭt kŏ lah nau nkah đah ăp nŭih hôm rêh mpeh nau khuch bah srê ji. Rnôk aơ, nau tâm lơh ma srê Covid-19 hôm ơm, nơm ân geh nsôih rlau ma ntơm, mô dơi geh ƀư thơ tha mô njrăng./.

Nŭih rblang: H’Thi