VOV4.M’nông – Bah khay 7 tât dŭt năm aơ mbra geh đêt ngăn 50% nuĭh bah 18 năm deh let lơ dơi chuh vaccine njrăng n’gang Covid-19. Aơ lah nău mbơh dơi N’gâng kan dak si n’hanh N’gâng kan mât njrăng bri dak ndơ̆ ta rơh rƀŭn bôk năp bah Ban ntĭm rđău nău kan chuh vaccine njrăng n’gang Covid-19 năm 2021-2022 ƀư ôi 2/7 ta Hà Nội. Tĭng nĕ, nău chuh dơi ƀư bah khay 7 năm aơ tât khay 4 năm 2022, tâm nĕ đêt ngăn 50% nuĭh bah 18 năm deh let lơ dơi chuh njrăng n’gang tâm năm 2021 n’hanh tât lĕ khay 3 năm 2022 geh rlău 70% rnoh nuĭh dơi chuh. Nău kan chuh njrăng n’gang dơi ƀư lam dak đah bơi 19.000 ntŭk chuh gŭ du ntŭk n’hanh hăn ăp ntŭk. Tâm nĕ, kơl lor ăp n’gor nkual ƀon têh dôl geh srê, geh âk nkual công nghiệp. Tâm n’gor, nkual ƀon têh, kơl lor chuh lor an ăp nuĭh nkual dôl geh srê. Lah rjăp nău kan chuh njrăng n’gang têh ngăn bah bah sa ơm tât aƀaơ, Kruanh n’gâng kan dak si Nguyễn Thanh Long an gĭt, N’gâng kan mbra tâm rgop rjăp đah N’gâng kan mât njrăng bri dak n’hanh ăp ntŭk bah nău wơt dơn, rdêng, mât prăp, tâm pă vaccine, lơn lah tŏng ăp đăp mpăn chuh ta rnoh âk ngăn.

Nŭih rblang: Y Sưng Phê Ja