N’ha hŭm lah ntil n’ha way geh hon êng, way geh hon ta pĭt dak me, ta ntŭk lĭt. ƀon lan Bahnar way tôch biăp aơ ăp khay. Biăp geh tôch ta ơm ôi rnôk hôm nkŭr nse, geh sa srat n’hanh kah. Dŭt kah ngăn lah nkŭr nse, n’ha rêh. Biăp lôch geh tôch sĭt rao kloh, an sơh. Wa Y Giang ta ƀon Plei Tơngia, phường Đăk Cấm, n’gor Quảng Ngãi nkoch nău gâm sa biăp aơ. “Biăp n’ha rhŭm srat tôch ơm ôi, hôm mbĕ dak ngom, mơ geh srat, geh nău njŭng êng. Rnih an geh ntrăm lor yuh môi, kâp an dak rgŏ rĭh tĕ rnih lor, an lêk vir vâr mbro mơ bah rchoăl rnih, biăp mơ kah”.

         Rnih dŏng pai biăp aơ way lah phe mô lah rnih mbo. Rnôk gâm, dak duh geh gâm lor, kâpo rgŏ tĕ mbrơi mbrơi vâr tâm ban gay ma biăp mô geh rchoăl. Lôch nĕ mơ bu an n’ha biăp ba kơi, tĕ du đê̆ boh bôt ngot an tâm di. Tĭng rnăk vâl, mbra dơi gâm nkre đah ka, klo mô lah poăch, yơn biăp aơ pai êng du ntil lah kah đŏng.

Nău khlăy ta biăp pai aơ lah nău ƀô kah nău njŭng nkre srat dơh sa ngăn. Wa Y Lat, ƀon Plei Tơngia, phường Đăk Cấm, n’gor Quảng Ngãi an git. "biăp  pai aơ lah ndơ sa way bên bâh nuĭh Bahnar bâh kăl e hôm. Ndơ sa kanŭng geh biăp rhŭm srat lah du rnăk le geh ndơ sa kah hôm. Lah geh du đê̆ poăch mô lah ka gâm nsum rĭ ndơ sa lơ ma kah lơn. Lah biăp pai aơ an geh gâm mbrơi, mô geh ndăn, vâr mbrơi rĭ mơ kah ngăn”.

         Tâm nău rêh ta ntŭk rêh jêng, biăp pai n’ha rhŭm srat way geh tâm rơh ngêt sông rnăk vâl lôch du nar pah kan ŏ r’ah, mô lah tâm ăp rơh tâm mâp nsum ta ƀon. Biăp pai geh an ta nklang ăp nuĭh gŭ văr nĕ sa nsum, ndrel tâm ngơi tâm nkoch bri. ndơ sa mô dơn kơt nĕ ma hôm nha geh rong ueh săk soan, ma hôm nha tâm rnglăp đah ăp nuĭh tâm rnăk vâl n’hanh ntŭk gŭ rêh.

Aƀaơ, bol ma nău rêh bâh ƀon lan Bahnar lĕ geh âk nău rgâl, âk ndơ sa mhe, yơn biăp pai n’ha rhŭm srat hôm nha geh mât kơt du nău way bên ueh êng tâm nău rêh.