Bu ranh Y Đheh Ayun, 65 năm, rnoi Rđe, tâm ƀon Phơng, xã Ea Tul, nkuăl Cư Mgar, n’gor Dak Lak lăp Đảng rnôk păng 25 năm. Wa geh ƀon lan rnơm ngăn, yor păng mro ngơi ndrel ma ƀư. Tâm ƀon, lah rnăk vâl bu mâp nau văng sa păng lŏ hăn bonh, kơl an bu tơm prăk ndrel ntĭm nau kan. Tâm ăp nar rƀŭn rgum ƀon lan, wa Y Đheh Ayun kŏ dŏng âk mông nkoch tât nau kan ueh, nau kan mhe gay jă ƀon lan kơt tĭng ân hun hao văng sa rnăk vâl. Săk wa nơm kŏ vay tâm rgop ma ăp gưl kan. N’gâng kan tâm xã râng tâm nchră nau ân Bí thư Chi bộ mpeh nau kan đăp mpăn tâm nkuăl. Wa Y Đheh Ayun, nkoch:

            ‘Ntơm bah ntơm tât rnôk aơ, kônh wa tâm ƀon Phơng lah nsum lah mô geh nŭih tĭng, djăt ăp nau nsŭk đă, mplư rlăm bah phung mhik gay ma ndăn kônh wa ta aơ. Tal bar lah nkoch trêng ân kônh wa nơm mât ân ueh nau vay ơm bah rnoi Rđe ta ntŭk”.

            Đah ma bu ranh Y Ngôn Knul, tâm ƀon Tria, xã Ea Tul, nkuăl Cư Mgar, n’gor Dak Lak, 30 năm lah Đảng viên Đảng cộng sản Việt Nam mro nkah păng mpeh nau leo trong tâm nau ƀư nau ntrŭnh, ntrong kan bah Đảng, pháp luật bah Ngih dak. Ăp nar, wa Y Ngôn Knul hôm hăn ăp ngih tâm băl mpôl nơm gay gĭt nau kan, nau mĭn, nau ŭch, nkah, ntĭm oh kon, mon sau tâm rnăk nơm ƀư ueh tĭng pháp luật. Mô êng kơt nê, wa Y Ngôn Knul hôm lah nŭih leo trong tâm nau nkoch mbơh, bonh đă kônh wa tâm rnglăp, tâm ŭch rŏng, tâm kơl an:

            ‘Tâm rơh rlau aơ, hên hŏ nkoch trêng ân kônh wa tâm ƀon tria, ngăn lah ăp ntŭk kơl tâm rjaih ăp nau tâm tâm rkeh tâm rnăk vâl, kơt ur sai, oh kon tâm rnăk vâl. Lor ma tâm rjaih, hên kŏ hăn joi uănh nkô̆ nau, moh ƀư dĭng geh tâm kreh. Tă bah nê hên geh trong rjaih ân nâp. Lah nsum ăp nau tih ri hên rjaih geh nau ueh lăng đŏng”.

            Tĭng wa Lê Quang Bất, Kruanh UBND xã Ea Tul, nkuăl Cư M’gar, tâm ăp ƀon rnoi Rđe, bu ranh lah nŭih geh bu rnơm ngăn gay ma mât nau đăp mpăn nau rêh bah ƀon lan. Rnôk aơ, ndrel ma nau dơi lah đảng viên, khân păng geh âk nau rgop khlay, lah laih ty nthoi jong bah n’gâng kan tâm nau nkoch trêng nau ntrŭnh, ntrong kan pháp luật, hăn leo trong tâm nau ƀư nau ntrŭnh, mât nau ueh ơm yau, rgop nau mât đăp mpăn nau rêh ndrel đăp mpăn tâm ƀon lan:

            ‘Bu ranh ndrel nŭih geh bu rnơm lah nŭih geh nau ngơi dŭt n’hâm khlay ngăn tâm nkuăl rnoi mpôl đê̆. Khân păng geh nau nkoch trêng gay ma nŭih ƀon lan rnơm tâm nau rđau kan bah Đảng, Ngih dak kŏ kơt lah nau ntrŭnh bah pháp luật. Rgop nau mât đăp mpăn mpeh văng sa rêh jêng tâm xã nơm tâm rơh rlau aơ”.

            Gay lŏ ƀư ueh nau dơi bah bu ranh ƀon, nŭih bu rnơm tâm ƀon lan ăp rnoi bah nkuăl. Wa Nay H’Nan, Groi Bí thư Rnâng kan nkual Uỷ Cư Mgar, n’gor Dak Lak, ngơi:

            ‘Nŭih bu rnơm lah ntung njŏ leo mbơh ăp nau nkoch trêng, nau ntrŭnh, nau rđau bah Đảng, Ngih dak tât đah ƀon lan. Khân păng lah ăp nŭih geh gưl uỷ n’gâng kan ƀư nau ntĭm nti, mbơh ăp nau gĭt mhe gay tă bah nê săk khân păng geh n’hao nau gĭt, tă bah nê nkoch mbơh ân kônh wa ƀon lan geh nŭih bu rnơm dôl gŭ rêh. Bah nê gay bonh đă ƀon lan ƀư ueh ăp nau ntrŭnh hun hao văng sa rêh jêng, mât đăp mpăn rnă njrăng, ndâk njêng nau rêh văn hoá mhe, ntơm bah nê nơm đăp mpăn dơi nau hun hao tâm ƀon lan bah nŭih rnoi mpôl đê̆”.

            Dak Lak rnôk aơ geh 942 bu ranh ƀon ndrel nŭih bu rnơm tâm ăp ƀon lan rnoi mpôl đê̆ Dak Lak. Aơ ngăn ngên lah nau rgop khlay tâm nau kan ndâk njêng Đảng, n’gâng kan, ntrong kan chính trị tâm dâng, ntrŭt dăng nau hun hao văng sa, rêh jêng, mât đăp mpăn nau vay ueh ơm bah ăp rnoi mpôl đê̆ tâm nkuăl./.