Tâm ngih săm ƀŭt THPT Trần Đại Nghĩa, nkuăl n’har bri Buôn Đôn, rmôt Văn học nghệ thuật n’gor Dak Lak ƀư bôk nau kan “Ăp plơk săm ƀŭt pơk-ntô̆ n’hao mpar hao”. Ta aơ ăp kon se geh ƀư ăp nau tâm n’ur, mpla n’hơ săm ƀŭt, răk săm ƀŭt ndrel nau pâl ueh bah nau vay răk, njêng ăp nŭih tâm ăp nau nchih n’ơn bah ăp nau ƀư tâm ơh ndrel ăp nau ƀư njroh mprơ khuh răm.

            Rnôk aơ, Hội Văn học nghệ thuật n’gor Dak Lak hŏ pă ân ndrôm săm ƀŭt ân ngih săm ƀŭt THPT Trần Đại Nghĩa ndrel mbơh ndrôm săm ƀŭt “Nau nchih Văn học Nghệ thuật, Báo chí ntĭm nti ndrel ƀư tĭng nau mĭn, nau rêh, nau kan Hồ Chí Minh” yor rmôt nơm săch ƀư. Ndrôm săm ƀŭt aơ mlâm rlau 300 plơk, rgum ăp nau nchih bah văn nghệ sĩ, nhà báo tâm Dak Lak tâm âk nau kan, kơt Mỹ thuật, âm nhạc, nklih rup, văn xuôi, thơ ndrel báo chí. Ăp nau nchih lah du nau nkoch, rup ueh mpeh nau rêh, geh aka nau ntĭm nti ueh mpeh nau kan, nau mĭn, nau rêh bah Kruanh Hồ Chí Minh. Nhà thơ Nguyễn Tiến Sỹ, tâm nkuăl ƀon têh Buôn Ma Thuột, nkoch:

            ‘Mpeh nau kan ntĭm nti tĭng nau rêh bah Wa lah du nau joi kơt nchih geh âk ngăn. Gâp vay rgum tâm nkô̆ nau ơm, nau ueh kăl e ndrel nuih n’hâm cách mạng, ngăn lah tâm rnôk neh dak lăp tâm rnôk rach năm mhe. Rơh rlau aơ geh du đê̆ nau nchih nkoch mpeh nau ơm bah rnoi mpôl, geh 3 nau ndrĭng geh in tâm ndrôm săm ƀŭt bah Hội Văn học nghệ thuật geh leo uănh tâm rnôk aơ”.

            Kŏ rnôk aơ đŏng, ta Thư viện n’gor Dak Lak ƀư bôk nau kan săm ƀŭt rup “Ƀon ƀư nau kan vay ơm Việt Nam” bah Helena Vân. Ndrôm săm ƀŭt rgum rlau 150 rup mpeh ăp ntŭk ƀon ƀư nau kan jong ngai bah 3 mpeh Bắc-Trung-Nam. Ăp nkô̆ nau nchih nsing tâm bar nau ngơi Việt-Anh. Nŭih nklih rup Helena Vân mbơh, bah ndrôm săm ƀŭt aơ, yuh ŭch nkah ăp nau nkoch ơm ueh bah ăp ƀon lan đah nau ang, nau ueh:

            ‘Ntơm bah âk păng rup bah ăp ƀon lan ƀư nau kan êng êng, gâp rgum joi ndrel săch luh ăp ntil rup ueh ma ƀon lan dôl ƀư roh rui hêng, hôm đê̆ ngăn ăp rnăk vâl ndrel ăp nŭih dôl mât. Gâp ŭch mra geh pơk rêng hvi lơn ndrôm săm ƀŭt aơ ndrel dơi geh pă ân ăp thư viện neh dak, thư viện bah ăp n’gor gay ăp nŭih mra dơi tât ta nê răk, manh săm ƀŭt gay ma ndâk nau kan ndrel ŭch geh âk nŭih gĭt tât lơn đah ăp ƀon lan ƀư nau kan dôl ma geh roh rui hêng aơ”./.