Ntơ săk facebook “H'Tuyết ndơ tanhe cheh Jrai”  geh rbăn nuĭh uănh, lah du ntŭk mbơh n’hơ, kơl an yuh Tuyết ta tổ 10, nkuăl têh Phú Thiện, nkuăl Phú Thiện geh tăch bâh 70 tât 100 ndơ ƀư, nău geh tât bar pe jât rkeh prăk ăp khay. Yuh Tuyết an gĭt, ta ntŭk mpông lăp yuh geh an ăp ntŭk máy kachoh boh n’hanh kachoh mbân ao bâh bok tanh che, yuh way livestream nkoch ăp nău rêh jêng, geh rnôk lah nkre mprơ nkre tâm ngơi gay ma geh âk nuĭh uănh. Bok tanh Jrai geh chuh kachoh jêng ăp ntil ao dai, mbân gay ma nsoh ta rơh ngêt sông, ao ghile bu klô, mô lah ao mbân ƀư ueh mhe an oh jê̆, tĭng di đah nău ŭch bâh năch, nău ŭch năch đă kachoh. Bâh nĕ, yuh geh pă nău kan an 4 nuĭh kachoh, đah rnoh prăk khay 6 rkeh prăk/khay n’hanh rvăt  ntil bok tanh cheh bâh ăp nghệ nhân ta xã Ia Sol, nkuăl Phú Thiện tâm âk năm aơ. Yuh H’Tuyết nkoch.

 “Gâp sŏk rup quay phim pơk trực tiếp ma Facebook, Zalo bâh nĕ âk năch bu gĭt tât gâp n’hanh joi rvăt. Nuĭh rĭ njoăl nău nchih dăn rvăt ndơ. Săk gâp nơm rĭ geh dơn nău bu rvăt bâh Facebook, Zalo gay ma kơt nti ăp oh yuh êng ƀa ƀơ kơt ta Dak Lak, Lâm Đồng, Kon Tum..Gâp dŭt lah ueh ăp nuĭh lĕ geh njêng mạng xã hội. Bâh geh mạng xã hội kơl an gâp geh nti tay âk nău gay ma n’hao nău blău kan. Bâh geh mạng xã hội ma âk nuĭh gĭt tât n’hanh dăn rvăt ndơ gâp, geh năch tâm dak n’hanh dak bah dih ôp rvăt”.

Nău ueh bâh ndơ tanh cheh Gia Lai lĕ geh nuĭh Thiết kế Minh Hạnh- Giám đốc mĭn kan bâh công ty Việt Mốt, nuĭh ndơ̆ ao dài, bok sut bâh ăp nkual mpeh mper tâm dak tât âk dak ta lam ntur neh, mât uănh n’hanh mbơh n’hơ. Dŭt khay 10/2023 mhe nơh, tâm bôk nău nghệ thuật “Gia Lai ơi”, yor UBND n’gor Gia Lai ƀư, rơh bôk năp ndơ tanh cheh bâh nuĭh Jarai, Bahnar lĕ geh nuĭh thiết kế Minh Hạnh ƀư jêng ăp ntil ndơ nsoh ueh êng lah mbân, ao dai, geh 4 bôk nău” bôk năm, khay mih, djang, sial puh. Ta nĕ, mô dơn ndơ cheh ndrang, ma rup ntoh lư êng Tây Nguyên kơt lah ngih rông, tơm si têh mpơl rup gui ta dak me n’hanh ăp duk lôk ma si, geh ƀư tâm ntrup ueh ta bok sut, jêng ăp ntil ndơ nsoh ueh êng. Nuĭh ƀư thiết kế Minh Hạnh an gĭt nău nchrăp ƀư an ndơ tanh cheh bâh ăp mpôl rnoi đê̆ nuĭh ta Gia Lai tât ntŭk tăch rgâl lam ntur neh gay ma ndaka nsơm ƀon nău kan way ơm tâm n’gor hun hao.

“Khân păng tanh dŭt jêr, nău cheh ndrang bâh khân păng geh nău khlăy tâm nău rêh, dŭt ueh ngăn. Nău kan bôk năp bâh hêhn lah ŭch ndơ̆ nău khlăy ntil ndơ tanh cheh hao âk. Nău aơ đah mpôl hên lah dŭt dơh dơm, yor ndơn ma ƀon lan geh tanh cheh đah brai tổng hợp rĭ hên nsrôih jĭm ndrel đah bok tanh cheh geh ăp bok tanh cheh ma bok sut. Nĕ lah nău kan ƀư an nău khlăy bâh ntil ndơ tanh cheh hao khlăy lơn”.

Aƀaơ, n’gor Gia Lai dôl geh mbơh ƀư âk nău kan gay ma ndâk nsơm, mat rbăy n’hanh ryơk rnê ăp nău khlay văn hóa way ơm, ntop ƀư ueh tay an văn hóa ăp mpôl rnoi Tây Nguyên.

Tâm nĕ, mât rbăy, mât nâp nâl geh uănh năl ndrel đah nău sŏk dŏng nău khlăy mpeh văn hóa, tăch rgâl, kơl an nuĭh tanh cheh mbra dơi hun hao wăng sa. Wa Nguyễn Thị Thanh Lịch- groi kruanh UBND n’gor Gia Lai an gĭt.

 “Mpôl hên ŭch ryơk rnê ăp nghệ nhân, ntĭm nti tay an rơh ba kơi an ăp băl mom gay ma mât nău way ơm, ndrel đah nău mĭn kan. Tal 2 lah hên ŭch mbơh tơih, gay ma ăp nuĭh kan mĭn uănh văn hóa, ăp nuĭh kan mĭn kan, nuĭh thiết kế ndơ nsoh gay ma ƀư an ndơ tanh cheh jêng drăp ndơ geh nău khlăy mpeh wăng sa, hun hao wăng sa an ƀon lan rnoi đê̆ ta n’gor Gia Lai.