Pơh văn hóa – pâl nđaih Điện Biên n’hanh ăp n’gor Tây Bắc ta nkual ƀon têh Hồ Chí Minh hŏ ntơm pơk măng nơh  đah ăp rêng kan văn hóa, lịch sử, pâl nđaih khuh n’gôr, săk ntơr. Nău kan ƀư ntơm bah aƀaơ tât nar 6/12, đah ăp nău kan kơt: Tâm nchră nkoch n’hơ, ntrŭt ntrôl ngăch pâl nđaih; tăm kao ban; bôk nău kan njroh mprơ tâm nđŭr đah nkô̆ Điện Biên - Tây Bắc - nkual ƀon têh Hồ Chí Minh buăt nthoi n’hanh hun hao; ntroh hăn văn hóa trong nkual ƀon têh đah nkô̆ “Điện Biên – săk ntơr rgum wăch".

Du bông ăp nar ƀư pơh lễ lah pla n’hơ rup bah lơh dơi Điện Biên Phủ năm 1954 tât lơh dơi lam lĕ  rngôch năm mhe 1975. Ta rơh ntơm pơk, nuĭh ƀon lan nkual ƀon têh Hồ Chí Minh n’hanh năch dak bah dih dơi n’glăp săk he tâm ntŭk gŭ rêh văn hóa nkual yôk prêh, rlong gĭt văn hóa nsum mpôl bah ăp rnoi mpôl đê̆: Thái, Mông, Hà Nhì, Dao; rlong saơ gĭt nău way ôp brah Tằng Cẩu bah rnoi Thái - Sơn La n’hanh ăp nău kan pla n’hơ, nkoch mbơh mpeh văn hóa, pâl nđaih, tăch rgâl, tuch tăm bah n’gor Điện Biên, Sơn La.