Sở Văn hóa, Thể thao n’hanh Pâl nđaih Lâm Đồng ƀư Tâm nchră ký ton tâm boh nkoch trêng nău lư năm 2026 đah bơi 30 nhih pah kan báo chí geh phóng viên, văn phòng way gŭ kan ta ntŭk, tâm nê geh Nhih pah kan way gŭ kan Radio nău ngơi Việt Nam nkual Tây Nguyên.

Tĭng nău tâm ton, ăp nhih pah kan báo chí rgum nkoch trêng lôch jêh geh hun hao wăng sa- rêh jêng kon nuĭh, njrăng n’gang neh dak- rnă njrăng; ăp trong nchrăp, trong kơl têh bah Đảng, Ngih dak n’hanh bah n’gor; Nghị quyết Đại hội Đảng bộ n’gor Lâm Đồng lor bôk năp, năm kan 2025–2030; Nghị quyết Đại hội XIV bah Đảng; pah kan bầu cử đại biểu Quốc hội khóa XVI n’hanh HĐND ăp gưl năm kan 2026–2031; ndrel ăp nghị quyết têh jong bah Trung ương mpeh khoa học – công nghệ, rgâl mbrô n’hanh lăp rgum dak bah dih. Lah ta rnôk tâm nchră, wa Nguyễn Văn Lộc, Giám đốc Sở Văn hóa, Thể thao n’hanh Pâl nđaih n’gor Lâm Đồng an gĭt, n’gor mbra nta trong dơh gay ăp nhih pah kan báo chí tât nău lư, hăn ôp joi nău lư; nkre sở ƀư bôk trong ntĭm nti, ntrŭt ntrôl ăp n’gâng kan, UBND ăp xã, phường, đặc khu tĭng ƀư jăp nău way ntơh ngơi n’hanh mbơh nău lư an báo chí.