Ƀư tâm 3 nar, bah lơ 29/11 tât lơ 1/12/2023 ta nkual ƀon têh Kon Tum, n’gor Kon Tum, Nar rgum văn hóa, Thể thao n’hanh Pâl nđaih ăp rnoi nuĭh nkual Tây Nguyên rơh bôk năp, năm 2023 gay ntô̆ n’hao ăp nău khlay văn hóa way ơm uĕh lăng bah ăp rnoi nuĭh nkual Tây Nguyên, nkre mpla nsơ, ntrŭt ngăch pâl nđaih. Nar rgum yor N’gâng kan Văn hóa, Thể thao n’hanh pâl nđaih tâm rgop đah du đêt n’gâng kan, nău kan Trung ương n’hanh 5 n’gor nkual Tây Nguyên, geh: Kon Tum, Gia Lai, Dak Lak, Dak Nông n’hanh Lâm Đồng ƀư. Râng nar rgum geh nklăp 1.000 nghệ nhân, diễn viên, nuĭh tâm rlong n’hanh đại biểu ăp rnoi nuĭh aƀaơ dôl rêh ta 5 n’gor Tây Nguyên.

Ntoh ngơi ta ntơm ƀư n’hanh ntĭm rđău nar rgum, ndơn măt Đảng, Ngih dak, Đại tướng Tô Lâm, Ủy viên Bộ Chính trị, Kruanh N’gâng Kan Công an lah rjăp: Đảng n’hanh Ngih dak he dŭt uănh khlay hun hao lĕ rngôch n’hanh nâp nâl nkual Tây Nguyên. Bah rnôk rgâl mhe tât aƀaơ lĕ an âk nghị quyết, ntĭm đă, n’glôn jêh mpeh nău aơ. Nar 6/10/2022 N’gâng kan Chính trị khóa 13 lĕ an Nghị quyết 23 mpeh hun hao wăng sa-rêh jêng n’hanh đăp mpăn mât njrăng bri dak, rnă njrăng nkual Tây Nguyên tât năm 2030, uănh tât năm 2045, tâm nĕ mĭn lah “Ndâk njêng trong văn hóa Tây Nguyên rgâl hao, geh âk nău uĕh văn hóa rnoi mpôl đêt, tâm ban ŭch âk ntil, ryơk ăp nău khlay văn hóa êng đah ăp rnoi nuĭh, uănh aơ lah n’hâm soan, n’gâng tơm an hun hao n’hanh rgum lăp lam ntŭr neh bah nkual”:

“Rgâl na nê̆ tay Nghị quyết 13 bah Đảng n’hanh trong hun hao văn hóa tât năm 2030, Nar rgum Văn hóa, Thể thao n’hanh pâl nđaih bah ăp rnoi nuĭh nkual Tây Nguyên rơh bôk năm 2023 mbra ngăn ngên jêng ntŭk rgum, rêng hvi, lah di an ƀon lan ăp rnoi mpôl đêt Tây Nguyên tâm nđŭr, tâm mâp, tâm rgâl nău blău ơm, rgop mpla nsơ rup ndah, kon nuĭh, nău uĕh têh n’hanh văn hóa ăp rnoi nuĭh bah nkual Tây Nguyên tât băl mpôl tâm dak n’hanh lam ntŭr neh, pơk hvi dơi wơt dơn ntuh kơl, wăch rgum hun hap pâl nđaih nkual Tây nguyên lah nsum, n’gor Kon Tum lah êng”.

Jêh gưl ntơm ƀư geh dŭt têh uĕh, gưl Hội đah bôk nău Nghệ thuật geh bôk nău “Đại ngàn Tây Nguyên-Tinh hoa hội tụ” n’glơi an âk nău răm n’hanh uĕh tâm nuih n’hâm nuih ƀon lan n’hanh năch. Ndrel đah nklăp 600 nghệ nhân, diễn viên, nuĭh tâm rlong ăp rnoi mpôl đêt 5 n’gor nkoch mbơh ăp nău uĕh ntĭt mpơl văn hóa geh âk ntơr uĕh Tây Nguyên, tâm Ntơm ƀư, rơh bôk năp ƀon lan dơi uănh gôh gâr hội “Âm vang núi rừng Tây Nguyên” yor bơi 100 tahen Mpôl ƀư lễ Công an nhân dân, Bộ tư lệnh Cảnh sát Cơ động. Bah xă Tà Nung, nkual ƀon têh Đà lạt, n’gor Lâm Đồng tât n’gor Kon Tum râng nar rgum, nghệ nhân Ka The, rnoi nuĭh K’ho rhơn răm:

“Lah uĕh mpôl rdâk ƀư lĕ nta an ntŭk pâl aơ. Aơ lah ntŭk rgum lĕ rngôch ăp nău uĕh văn hóa bah lĕ rngôch ăp rnoi nuĭh oh nô ta nkual neh Tây Nguyên aơ. Aơ lah ntŭk rgum gay ma tâm mâp, tâm nđŭr văn hóa gay gĭt tay ăp nău way ơm, ăp nău uĕh bah tĭng rnoi nuĭh. Mpôl hên djôt tât ta ăp kho ao, ăp chĭng gông nău mprơ bah nuĭh K’ho, jêh nĕ ăp ndơ sa gay he tâm nđŭr đah ăp băl...”.

Nar rgum Văn hóa, Thể thao n’hanh Pâl nđih ăp rnoi nuĭh nkual Tây Nguyên rơh bôk năp, năm 2023 dơi ƀư ta n’gor Kon Tum ƀư đah âk nău uĕh. Tâm nĕ, nău ƀư văn hóa way ơm geh 6 nkô̆ nău: mbơh mpơl gưl Lễ hội nău ƀư gŭ âm văn hóa way ơm ăp rnoi nuĭh; mpơl nsơ nkoch tơih, ndơ way ơm văn hóa bah ăp ntŭk; mpơl nsơ ndơ sông sa way ơm; tâm nđŭr văn hóa nghệ thuật n’hanh mpơl nsơ kho ao ăp rnoi nuĭh nkual Tây Nguyên; mpla nsơ văn hóa rnoi nuĭh nkual Tây Nguyên tâm ntŭk gŭ rêh nkual Tây Nguyên hăn ndrel đah hun hao neh dak. Nău ƀư thể dục thể thao geh 5 môn tâm rlong, geh: Ntrôl mâng, dô̆t rse, pănh na, hao n’gâng mbĭr ngi n’hanh nsât bao bố. Nău ƀư pâl nđaih nkoch tât nuĭh ƀon lan n’hanh năch pâl nđaih âk ntŭk uĕh bah n’gor Kon Tum.

Rlău ma nău ŭch ndâk nkra tay ntŭk ntô boăt nthoi văn hóa, nkoch mbơh, mpla nsơ tât ƀon lan mpeh văn hóa way ơm bah ƀon lan ăp rnoi mpôl đêt Tây Nguyên, Nar rgum Văn hóa, thể thao n’hanh Pâl nđaih ăp rnoi nuĭh nkual Tây Nguyên rơh bôk năp hôm lah di an pâl nđaih Tây Nguyên lah nsum n’hanh n’gor Kon Tum lah êng “mpăr prêh”. N’hêl na nê̆, aƀaơ, ăp n’gor Tây Nguyên lĕ jêng ăp ntŭk, ndơ, nău rhŏ an năch; geh nău boăt nthoi đah ăp ntŭk tât dŭt uĕh. Tă bah yan lễ hội, ntop tay ăp nău ntơr ang Tây Nguyên dơi âk băl bên dăch ngai gĭt tât, nta tay âk nău dơi geh mhe an pâl nđaih ta nkual neh Tây Nguyên hun hao.