Tĭng nău mbơh bâh ntŭk kan văn hoá, thể thao n’hanh pâl nđaih Lâm Đồng, tâm 4 nar rlu 30/4 n’hanh 1/5, lam n’gor geh klâp ma 620 rbăn năch, hao 21% đah khay aơ năm 2025, tâm nĕ năch dak bah dih geh klâp ma 21 rbăn nuĭh. Lĕ nău geh klâp ma 1.320 rmen prăk. Rnoh năch hao âk bâh bôk rơh rlu, âk ntŭk, ntŭk pâl rlưn n’hanh ntŭk gŭ rlu pah kan lĕ nău kan. Nău geh râng geh tât 70-80%, êng rmôt ngih năch gŭ bâh 3- 5 sao geh 85-96%, geh rnôk dŭt bêng năch. Ăp ntuk , ăp doanh nghiệp leo pâl nđaih leo kan n’hao mhe ueh ăp nău kan, ƀư ueh âk ntil ndơ, nău kan mât đăp mpăn rnă njrăng, ntŭk gŭ rêh, mbơh rnoh khlăy geh ƀư tâm ban, rnoh khlăy đăp mpăn ueh. Bâh nĕ, lah tay na nê̆ nău dơi bâh pâl nđaih Lâm Đồng, mpŏng tât hun hao nâp nâl n’hanh n’hao nău ueh pah kan.

Tĭng N’gâng kan Văn hóa, Thể thao n’hanh Pâl nđaih n’gor Dak Lak, tâm 4 nar rlu lễ 30/4-1/5, geh prăk pâl nđaih bah n’gor geh 347 rmen prăk, hao bơi 19% nkôp đah năm 2025. Săk rnglăy aơ tât bah ăp nău ƀư săk rnglăy ăp bôk nău kan ntrŭt ngăch, hăn ndrel đah trong ƀư văn hóa-pâl nđaih. Ntoh lư geh ăp nău ƀư kơt ntô̆ khinh khí cầu wăr tháp Nghinh Phong, phường Tuy Hòa, ƀư ngăn văn hóa Êđê, nghệ thuật way ơm, ntŭk ntô chĭng gông, ndơ ngêt sa way ơm n’hanh nkret gâm ka ngừ đại dương... rgop wăch rgum ntŭk tât Dak Lak.