Ơi wa Điểu Nơi, lah nŭih mĭn, joi ndrel nkoch mbơh nau ơm yau bah rnoi Bunong, wa moh nau nkoch mpeh ăp nau ueh ntoh lư tâm nau ơm yau bah rnoi nơm êh?

            NNƯT Điểu Nơi: Ăp nau ơm yau ueh bah rnoi Bunong ri âk ngăn, ntơm bah ăp nau mprơ ân tât ăp nau vay ơm. Ma nau khlay ŭch gĭt, blau ndrel mât ri nơm ân geh kơt tĭng ndrel nti tĭng. Săk gâp kăl e nơh kŏ nti âk ngăn nơm ân geh blau gĭt êng ri mô geh ôh. Nơm ân geh kơt tĭng nŭih bu ranh, nŭih bu gĭt tât nau ơm yau, nau vay bri dôih, mpeh ot ndrong. Ngăn lah ăp nau mprơ yau, lah nơm knŭng kơt tĭng nti đê̆ dơm ri mô tŏng jru ri mra mô geh gĭt tâm di ăp nau ueh, nau m’ak tâm ăp nau mprơ ơm, lŏ nơih geh nau tih tât nau ơm đŏng. Êng ăp nau mprơ ri geh âk ntil ngăn: Mprơ tâm rnôk ngêt sa n’hao sre, mprơ rnôk ƀư mir, mprơ rnôk bu năch tât, mprơ rnôk tâm jêng ur sai, mprơ rnê bu ur druh bu klô ndăm...păng geh âk nkô̆ nau êng ngăn. Rnôk aơ knŭng hôm đê̆ dơm bu ranh rnoi Bunong nơm blau tŏng ăp lĕ nau mprơ yau bah nơm.

            Mhe râng chấm thi bah rmôt chĭng gong bah n’gor Lâm Đồng năm mhe rlau, wa mhâm saơ nau mât nau ơm yau ăp rnoi mpôl bah ăp rmôt êh?

            NNƯT Điểu Nơi: Gay ma râng chấm ân rnôk tâm rlong tâm n’ur ăp rmôt chĭng gong tal bôk năp ri nơm ân geh nau gĭt ndrle nkah ăp ntil nau ma ăp rmôt bu râng tâm rlong. Bah nê, nkah kônh wa nơm ân geh mât ăp ntil ndơ goh nteh bah rnoi mpôl. Nơm mô dơi ân ăp ndơ nê roh rui, ân geh mât ân rjăp; lah mô păng mra roh lĕ yor mô geh nŭih ndơn. Kơt lah, n’hâm kŏ geh âk ntil nau nteh êng êng; jêh ri chĭng, gâr, mbuăt...nơm ân geh tâm rgop nsum ndrle mprơ nkre đŏng, kơt nê ri bu djăt bu saơ ueh lơn, m’ak lơn. Kơt lah chĭng ri ăp nau chĭng: Chĭng ntô̆ klêng, chĭng ngăn, dŭt dru, bĭch tơ ndrpơ, ndrơ yông khuôr...geh dĭng lĕ 20 nau chĭng êng êng, gâp kŏ vay ntĭm nti ân ma bu tâm Tuy Đức”.

            Ơi wa, jêh rnôk tâm rnglăp rmôt kan hành chính, n’gor Lâm Đồng rnôk aơ jêng têh hvi ngăn rđil ma lam dak, geh bri geh dak lêng. Bah năp nau tâm rnglăp nsum bah nau ơm yau, wa moh geh nau ŭch tâm kônh wa rnoi mpôl đê̆, ngăn lah rơh mom, tâm nau mât nau ơm yau ueh bah rnoi nơm?

            NNƯT Điểu Nơi: Ntơm bah rnôk n’gor nơm rnglăp jêng n’gor Lâm Đồng, gâp đah nau dơi lah nŭih bu ranh, gâp ŭch lah ê lor nơm ân geh ŭch rŏng ma nau ơm yau bah rnoi nơm, ŭch ăp nau Ot ndrong, ƀư mir jan ba, ŭch ntŭk ma nơm deh luh. Nơm mô dơi djăt, mô dơi tĭng phung rlăng, nơm ân geh djăt nau Đảng ndrel Ngih dak. Nơm geh bri ta aơ, yau ye nơm ta aơ, môch blang ta aơ ri nơm lơi dĭng ndrel djăt ôh phung rlăng. Nơm ân gĭt tu tơm nơm ta aơ ri mơ nơm đăp măpn pah kan jan sa. Ŭch ăp nau ueh bah rnoi mpôl nơm, ŭch nau ơm yau bah rnoi nơm ri nê lah nau rŏng dak”.

            Tâm nau trong hoch ơm yau ri rnôk aơ âk nau vay ơm kơt lah tanh njuh, tanh dônh tanh sah...mra geh nau roh. Wa moh geh nau ŭch gay gay ăp nau kan aơ dơi geh ndâk, ndrel mât?

NNƯT Điểu Nơi: Tâm ăp ntil nau ơm yau, ri tanh njuh lah ngoai tâm ăp nau kan ma nơm ân geh mât. Yor tanh njuh ri uănh nơih, yơn khlay lah nau tanh cheh ndrel nau khlay bah păng. Kăl e nơh, bu ur ri tanh njuh, bu klô ân blau nkra na ndrel har gay ma pănh mpa. Êp nê, ân geh blau nchiăr đŏng kơt kah nchiăr payh tâm tuch tăm, ƀư mir, rnôk aơ ndơ nchiăr đê̆ ngăn. Yor ri ma gâp ŭch Đảng, Ngih dak kơl an âk lơn ăp nau kan aơ geh ndâk tay, bu klô blau tanh sah tanh dông,  blau nchiărr loih, bu ur blau tanh njuh, tanh troi, tranh nah...gay nau kan aơ mô geh roh rui”.

            Gay nau ơm yau geh nthoi ri ân geh ăp nŭih gĭt tât ndrel pă mbơh tay ân rơh mom. Tĭng wa ri moh nau nơm ƀư gay mât nau ơm ân geh săk tam jŏ jong?

            NNƯT Điểu Nơi: Ndơn nau ơm, ri nkre rnôk aơ nơm ân ntơm tâm kruanh ƀon gay ma săch ngăn ăp nŭih geh nau ŭch kơt nti. Jêh nê đŏng lah nơm ân geh prăk nkhôm ân bu. Tâm ƀon hên ri kŏ geh âk nŭih ŭch kơt tĭng nti, yơn lah khân păng kŏ ân geh du đê̆ prăk nkhôm yor khân păng lah nŭih ƀư kan tâm rnăk vâl. Tâm ƀon hên rnôk aơ  ri bu ranh ri knŭng hôm đê̆ đă dơm nŭih. Geh âk bu ranh bu tanh njuh mô lah tanh sah tanh dông, khân păng ŭch ngăn ma nau ơm yau bah nơm, yơn gay dơi ntĭm nti ri jêr đŏng, lah nơm mô ntĭm nti ân nŭih tâm ngih ri nơm mra ntĭm nti ân kon nơm, sau nơm đŏng.

            Ơ, dăn lah ueh Nghệ nhân ưu tú Điểu Nơi./.