Ăp nar aơ, ta Jay rlu rlău Sắc tộc Têrêsa ta phường Tân Lợi (Dak Lak), mông nar nti njroh mprơ jêng n’gŭr răm. Tâm jrô jay, nteh đơn klông pút, nteh đơn t’rưng nteh n’glôh, rnglăp ndrel n’hâm sial bah yan puh dôl tât. Ăp băl mom nuĭh Xơ Đăng dôl nchrăp ăp nău njroh mprơ rhŏ an kônh wa n’hanh năch tâm rơh bôk năp mhe.

Dak rhak suh lĕ ao, nô A Bảo, 23 năm deh, tât bah ƀon Đăk Rơ Wa, phường Kon Tum, n’gor Quảng Ngãi-aƀaơ dôl pah kan ta Jay rlu rlău Sắc tộc Têrêsa, nkoch:

Đơn mboăt n’hôm rnoi mpôl đêt mô dơi mô geh tâm nău rêh ăp nar, pơng kơt ndơ sa nuih n’hâm. Tâm nău rêh an geh mboăt n’hôm gay geh âk nău lơn. Kơt rnôk u che bah năp đaơ gŭ ndrel tâm ŭnh năk gay djăt đơn klông pút, t’rưng...., goh an djăt; mê̆ bơ̆ goh đơn klông pút, t’rưng gay njŭng kon bĭch ƀư an nău rêh lơ ntop răm. Ngăn lah tâm ăp rơh lễ hội, nar khay puh, lễ tết, nteh đơn klông pút, t’rưng wăch rgum dŭt âk kônh wa tât djăt, dŭt lah răm.

Hôm nô Karôly, 29 năm deh, ta ƀon H’Ring, xă Cư M’gar (Dak Lak) nkoch, mboăt n’hôm rse boăt nthoi nsum mpôl, lah huêng bah ăp rơh lễ hội, yan puh tât. Yor ndrĭ ma ăp băl mom gŭ jay rlu rlău tiăr nti mât văn hóa rnoi mpôl đêt, mô knŭng lah nău ŭch, ma hôm sĭt ƀon lah rhŏ an kônh wa n’hanh năch pâl nđaih:

Gâp dŭt ŭch đơn mboăt, n’hôm rnoi mpôl bah nơm. Tâm rơh khay puh, nar lễ, tết, mpôl hên pâl đơn klông pút, đơn t’rưng nglăp ndrel chĭng gông, ndrel njroh mprơ răm đah kônh wa n’hanh năch pâl nđaih tât khâl. Aơ lah rơh an boăt nthoi nău rŏng, tâm rnglăp lơn tay tâm ƀon lan. Rnôk goh, tâm nuih n’hâm gâp saơ dŭt răm, ngăn lah ăp nar khay puh, tết dơi mâp u che, mê bơ̆, oh nô; gâp goh đơn klông pút gay ăp nuĭh njroh xoang, rnôk nĕ nău răm dơi ntop tay.

Đah nô A Tùng, 29 năm deh, ta ƀon H’Ring, nău djôt ryơk mboăt n’hôm rnoi mpôl đêt hôm lah nău kan mât ndrăy boăt nthoi văn hóa bah u che.

Đơn klông pút, đơn t’rưng dŭt n’hâm khlay tâm nău rêh nuih n’hâm bah nuĭh Xơ Đăng n’hanh du đêt rnoi mpôl đêt êng. Ăp mboăt n’hôm aơ khlay kơt chĭng gông tâm nău mât ndrăy văn hóa rnoi mpôl đêt. Rnôk u che bah năp đaơ, tâm ăp nar khay puh, lễ hội rhơn ba mhe, nar tết, mô dơi mô geh nteh đơn klông pút, nteh chĭng lăp ndrel đah nău mprơ, ƀư an nar yan puh, nả rgum, nar lê, tết ntop răm m’ak, n’gŭrr răm n’hanh rgop mât ndrăy văn hóa way ơm bah nuĭh Xơ Đăng.

Nău gơih nđơr bah ăp nuĭh mom kơt A Bảo, Karôly mô lah A Tùng mô knŭng jêng ăp nkô̆ nău mprơ uĕh, ma hôm rêng nău ntô̆ n’hao tâm nsum mpôl, wa Pê Đoan, nuĭh ƀon H’Ring, tă âk rơh uănh ăp oh sĭt rhŏ goh mprơ ta ƀon tâm ăp rơh lễ hội, răm nkoch:

Ăp oh dŭt blău, gĭt pâl đơn mboăt n’hôm rnoi mpôl đêt, gĭt mât nău uĕh văn hóa way ơm. Ăp oh ŭch jêng nti dŭt ngăch, lŏ hăn goh mprơ ta âk ntŭk kônh wa tâm ƀon ăp nuĭh rhơn đŏng.

 Nô knŭng tâm gŭ âm ăp nar, tâm ăp rơh lễ hội khlay kơt ƀư rhơn ba mhe, nteh gông rla yor ăp băl mom Jay rlu rlău Sắc tộc Têrêsa goh mprơ lĕ jêng ndơ sa nuih n’hâm rgop tay nău răm n’hanh nău boăt nthoi rjăp an ƀon lan. Wa A Vi Voan, kruanh thôn ƀon Kon H’Ring, xă Cư M’gar (Dak Lak), an gĭt:

Ăp oh hôm dŭt mom yơn gĭt uănh khlay, mât ndrăy văn hóa bah rnoi mpôl nơm, blău pâl âk chĭng gông, đơn t’rưng, klông pút, ting ning... Ƀon lan mpôl hên dŭt ntô̆ n’hao yor geh rơh mom gĭt mât văn hóa way ơm bah u che.

Bah ăp nar nti dŭt n’hâm ta Jay rlu rlău Sắc tộc Têrêsa tât ăp nar goh mprơ n’gŭr răm tâm ăp lễ hội ƀon lan, ăp băl mom nuĭh mom Xơ Đăng dôl nthoi trêng nău ŭch văn hóa rnoi mpôl đêt an rơh druh ndăm. Nĕ lah nău rŏng, lĕ đah nău kan, mpŏng ŭch gay nteh đơn klông pút, t’rưng, ting ning, chĭng gông... nteh n’glôh mro, gay nău uĕh văn hóa Xơ Đăng hôm e nâp nâl ndrel năm khay.