Tĭng nău mbơh bâh ntŭk kan văn hoá, thể thao n’hanh pâl nđaih Lâm Đồng, lĕ rnoh năch tât râng pâl nđaih, gŭ rlu ta rơh aơ geh klâp ma 650 rbăn năch, tâm nĕ năch dak bah dih geh klâp geh ma 30 rbăn năch, nău geh pâl nđaih geh klâp ma 1.200 rmen prăk. Nău geh âk dŏng ntŭk gŭ geh tât 70-80%, êng ăp ntŭk gŭ rlu bâh 3-5 sao geh 85-90%. Di rơh aơ, âk nău kan văn hoá- pâl nđaih geh ƀư kơt lah Countdown- Vơt năm mhe 2026 ta Đà Lạt, Mũi Né n’hanh nkual mpeh nhâp nar Lâm Đồng, ndrel đah ăp bôk nău kan nghệ thuật, lễ hội ta ăp ntŭk pâl nđaih. Ngăn lah, Lâm Đồng ƀư vơt rơh mpăr bôk năp bâh năm 2026, vơt geh klâp ma 200 năch pâl nđaih, ntop geh mbơh tơih rup ueh ntŭk tât đăp mpăn, ueh lăng.

Pơk bôk nău ƀư năm Pâl nđaigh lam dak-Gia Lai 2026, N’gâng kan Văn hóa, Thể thao n’hanh Pâl nđaih n’gor Gia Lai tâm rgop đah Tach ndeh par Phù Cát, Hãng hàng không Vietnam Arilines n’hanh Hiệp hội Pâl nđaih ƀư wơt ăp năch bôk năp tât Gia Lai tâm năm mhe. Rơh mpar geh mrô VN1392 bah Hãng Hàng không Vietnam Arilines ndơ̆ 185 năch tât đah Gia Lai tâm rnôk bôk năp bah năm 2026. Ta tach ndeh par dâl, năch pâl nđaih dơi wơt đah nău njroh lân răm rhơn, ăp nău mbah rhơn năm mhe, ăp ndơ an uĕh an năch pâl nđaih. Năm 2026, Gia Lai lăp dơi N’gâng kan Văn hóa, Thể thao n’hanh pâl nđaih săch ƀư Năm Pâl nđaih lam dak, đah nău ŭch mpla nsơ ndơ geh âk, nău uĕh văn hóa n’hanh ăp ndơ pâl nđaih uĕh, nsrôih wơt nklăp 15 rkeh năch, sŏk geh  35.000 rmen prăk.