Tĭng nau kơp, 9 ngih rƀŭn văn hoá geh đah rnoh prăk 20 rmen. Ăp ntŭk nkra rnoh hvi nklăp 130 m2, prêh 17 mét. Ăp ngih rƀŭn nkre kơt tĭng nau nkra ơm, nkre tâm di ma nau ơm ueh bah rnoi mpôl ăp rnoi tâm nkuăl n’har bri Gia Lai ndrel Quảng Ngãi. Nchrăp, dĭng lĕ 9 ngih mra jêh ndrel leo dŏng tâm khay 9 năm 2026.

Ntoh nau tâm nar ndậk, Thượng tướng Trương Thiên Tô, Kruanh N’gâng kan Chính trị tahen ƀon lan Việt Nam mbơh: Nau kan ndâk ngih rƀŭn văn hoá tâm ăp xã n’har bri Tây Nguyên ntoh ntoh n’hâm kơl an bah Đảng, Ngih dak ndrel tahen đah kônh wa ăp rnoi mpôl đê̆, gay ƀư nâp nau tâm rnglăp lam ƀon lan, ndâk njêng nâp “nuih n’hâm ƀon lan” ndrel ma nau kan mât nâp đăp mpăn chính trị, neh dak, rnă njrăng tâm nkuăl. Thượng tướng Trương Thiên Tô, đă:

‘Rơh tât, đă ăp ntŭk kan, rmôt kan, n’gor tâm rgop ƀư ân rjăp, rgum ntrŭnh gay ntŭk kan aơ jêh tâm di nau đă, ƀư ân ueh săk tam nau dŏng, tŏng dơi nau ŭch rƀŭn rgum nau ơm bah ăp ƀon lan; ntŭk ntrŭnh ƀư aơ tâm di nau ntrŭnh đă, đăp mpăn nau nâp ueh lah nau kơl an bôk năp ndrel đăp mpăn ân rjăp, mô dơi ƀư ndăn gay ngăch jêh ma mô njrăng tât nau nâp ueh”.

Tâm nau rêh ơm yau ueh bah Tây Nguyên, ngih rƀŭn rgum lah ntŭk gay rgum ƀon lan, ntŭk geh ƀư nau ngêt sa têh, rƀŭn nchră ndrel ƀư ăp nau vay ơm êng êng. Yơn lah, tâm âk xã n’har bri, ntrong ngih rƀŭn rgum hŏ jur djơh lĕ mô lah ê geh nau nkra ngih vâl ân nâp nâl, ê tŏng dơi nau ŭch rƀŭn rgum nchră nau bah ƀon lan. Nau kan ăp rmôt kan bah N’gâng kan neh dak ndâk 9 ngih rƀŭn văn hoá mra pơk trong nơih gay ma nŭih ƀon lan tâm nkuăl n’har bri mpeh ba lơ Tây Nguyên rgum rgum, ƀư nau kan ân geh ueh, nâp nâl lơn. Ntoh măt Đảng uỷ, n’gâng kan rđau tahen Binh đoàn 15, Thiếu tướng Hoàng Văn Sỹ, Rđau tahen Binh đoàn lah rjăp:

‘Aơ mô êng knŭng lah nau ntơm ndâk ƀư ntŭk rƀŭn rgum kơl an nau kan nsum bah ƀon lan, ma aơ hôm lah nau ntoh nuih n’hâm nau kan n’hêl jŏ jong bah tahen tâm nau kan hăn ndrel ma nŭih ƀon lan. Bah nê, ƀư rjăp lơn tay nau tâm rnglăp tâm dăch dơh đah cán bộ tahen lam rmôt ndrel kônh wa ăp rnoi mpôl. Binh đoàn 15 dăn ton lah mra tâm rgop ueh rjăp đah rmôt tahen ndrel gưl uỷ n’gâng kan ƀon lan gay ntrŭnh ƀư ân geh săk tam ăp nau kan, ê lor lah ndâk 9 ngih rƀŭn đăp mpăn tŏng nau dơi ê nkra, nau ngăch, nau ueh, nau nâp tĭng nau nchrăp ngluh đă ƀư”./.