Năm 2026 dơi mĭn lah trong hăn bôk năp dŭt khlay đah n’gor Gia Lai rnôk n’gor rdâk ƀư Năm Pâl nđaih lam dak 2026, pơk luh nău dơi têh gay geh rgâl hao, mĭn lah jâng nsan ntŭk tât ta rup ndah pâl nđaih Việt Nam đah nău ŭch wơt 15 rkeh bu năch. Năm 2025, pâl nđaih Gia Lai hao jêng uĕh đah rlău 12 rkeh bu năch, hao rlău 17% nkôp đah năm bah năp; dĭng lĕ geh prăk nklăp 29.000 rmen prăk.

Năm 2026, Gia Lai nsrôih wơt 15 rkeh bu năch, hao 21% nkôp đah năm 2025; dĭng lĕ geh pâl nđaih nklăp 35.000 rmen prăk. Gay geh nău rƀŏng aơ, ndrel đah jâng hao bah năm 2025, n’gor mbra ntuh kơl ntung trong, ntŭk rlu rlău, nău rhŏ n’hanh n’hao uĕh nuĭh kan pâl nđaih. Wa Nguyễn Thị Kim Chung, Groi giám đốc N’gâng kan Văn hóa Thể thao n’hanh Pâl nđaih n’gor Gia Lai an gĭt, năm Pâl nđaih 2026 ta Gia Lai hôm dơi pơk ntrŭt yor 155 nău ƀư, tâm nĕ geh 21 nău ƀư yor N’gâng kan Văn hóa, Thể thao n’hanh pâl nđaih ƀư, 34 nău ƀư tâm rgop đah ăp n’gor, nkual ƀon têh n’hanh 100 nău ƀư yor n’gor ƀư tơm.