Ta xã Măng Đen, n’gor Quảng Ngãi ƀư pơh Văn hóa – Pâl nđaih Măng Đen 2026 đah nkô̆ “Bi ntơr nklang bri neh têh hvi”. Nău kan wăch rgum âk mpưm nuĭh ƀon lan n’hanh năch dăch ngai tât râng.

Tâm trôk nar srŏ nđik ntĭt êng, dor yôk prêh Măng Đen lhêt lhơt n’hanh ntơr uĕh nklang bri dak têh hvi. Trôk nar nđik aih kloh rsang, lơn ma ƀư ntơr uĕh kao anh đào nkơnh dang, njêng ntŭk lễ hội răm mƀak, rhơn răm âk ntơm bah ăp nar bôk năp mhe.

Măng Đen hŏ bah ơm ntĭt kơt du “ntŭk nđĭr uĕh”, ntŭk trôk n’hanh neh tâm mâp nsum, n’hâm n’hôr bah bri krŏng rlai lăp nsum tâm nău rêh rngân uĕh. Năm 2025, Măng Đen lah rjăp tay ntŭk gŭ khlay lah ngoăy tâm ăp ntŭk dŭt lăp uĕh măt uănh bah Việt Nam rnôk wơt bơi 2 rkeh tơ̆ năch, tâm lĕ rngôch rnoh âk nklăp 5 rkeh tơ̆ năch tât bah Quảng Ngãi, rgop khlay tâm nsĭt geh pâl nđaih rlău 3.700 rmen prăk bah lam n’gor.

Ta rơh lễ ntơm pơk pơh Văn hóa – Pâl nđaih Măng Đen 2026, wa Y Ngọc, Groi kruanh rnâng kan UBND n’gor Quảng Ngãi, an gĭt, n’gor ton lôch jêh, rgâl uĕh ntŭk ntuh kơl pâl nđaih; dŏng geh nău tam ăp tơm ndơ, nsrôih rdâk njêng Măng Đen jêng ntŭk rgum tât pâl nđaih bri dak, rlu rlău têh khlay, hun hao jŏ jong, tâm di đah găr mblar khlay bah nkual n’hanh lam ntŭr neh:

“Măng Đen aƀaơ mô hôm lah du ntŭk tât jê̆ chrai êng ma hŏ jêng ntŭk buăt nthoi, wăch rgum rêng tâm ntêng lêng bri – dak lêng bah n’gor Quảng Ngãi mhe. Buăt nthoi nău srŏ nđik bri neh dĭ hvi Măng Đen đah sial chiăt hâr bah gôl dak lêng Lý Sơn, Mỹ Khê; buăt nthoi ntŭk gŭ rêh văn hóa chĭng gong jêng nău nkoch đah ăp drăp ndơ ơm yău ntlơi an tay văn hóa Sa Huỳnh”.

Măng njroh mprơ dơi rdâk ƀư roh âk mông nar, tâm pă jêng 3 chương: “Ntŭk trôk neh tâm lăp nsum”, “N’hŭm kah bri neh dĭ hvi” n’hanh “Klâng nkah mpeh ntŭk mbĭch mbơi”. Ăp nău njroh mprơ săk ntơr uĕh kơt: Truyền thuyết Măng Đen, Sắc đào Măng Đen, Tình ca Măng Đen, Đêm hội cồng chiêng, Ngọn lửa cao nguyên… mpơl tay rup uĕh bri dak, văn hóa n’hanh kon nuĭh Măng Đen, nsĭt tât năch pâl nđaih du njăr trong rhơn mƀak ta bri dak têh hvi.

Wa Dương Tấn Nhựt, nuĭh ƀon lan đặc khu Lý Sơn, n’gor Quảng Ngãi tât pâl nđaih ta Măng Đen, uănh năl:

“Nkhêp geh rnôk lễ, Tết bah năm mhe, gâp saơ nău njroh mprơ dŭt rhơn nđơr. Bah nê rêng lam, rgop ntrŭt ntrôl văn hóa, pâl nđaih bah n’gor Quảng Ngãi. Quảng Ngãi n’hanh Kon Tum mhe n’glăp nsum, jêng nuĭh ƀon lan geh ndơ ma kơt nti, tâm nđŭr văn hóa đah bar nkual luh nar n’hanh nhâp nar bah n’gor Quảng Ngãi”.

Pơh Văn hóa – Pâl nđaih Măng Đen 2026 đah âk mpưm nău kan kơt: Lễ hội khinh khí cầu, măng njroh mprơ “Măng Đen nar mhe”, hội chợ ndơ ngêt sa OCOP, rơh tăch ndơ tuch tăm n’hanh dak si, ăp nău kan thể thao – rlong saơ n’hanh tour pâl nđaih bri dak, nsĭt tât an năch pâl nđaih ăp rlong saơ săk ntơr uĕh, jêr chuêl ta nkual neh Măng Đen./.