Ta nkual ƀon têh Pleiku, Gia Lai mhe ƀư Lễ mplơ̆ an tay hồ sơ cán bộ đi B n’hanh ntơm pơk pla n’hơ đah nkô̆ 50 năm đăp mpăn, dơn ngoăy neh dak:”Dâk drưm nkual neh Bazan”. Aơ lah nar kan chính trị – văn hóa mha êng, mpơl nuih n’hâm nkah gĭt jru, nchih nkah n’hâm suan bah rơh kơn hŏ râng rlăch ndăng rklaih luh rnoi nuĭh, nkre rdâk tay nău nđơr rdâk njêng n’hanh  hun hao neh dak tâm rơh hun hao mhe.

"Cán bộ đi B" lah nău way dŏng gay nkoch mpeh ăp cán bộ bah miền Bắc đah nuih n’hâm râng êng hăn rlău dor yôk Trường Sơn lăp tâm miền Nam râng tâm lơh lvang năm 1965 – 1975. Ta rơh lễ ta Gia Lai, tâm mông nar huêng khlay n’hanh rngot rhơn, 11 cán bộ đi B n’hanh rnăk wâl bah 22 cán bộ êng hŏ dơn tay ăp hồ sơ dơi mât ndray na nê̆ tâm rlău n’gul rôk năm aơ.

Ăp ndơ nkah ndray nê lah: bằng cấp, siƀŭt nchih ma ti, huy chương, phiếu mpêt nkrem mô lah chứng minh thư … lah drăp ndơ ma ăp cán bộ, nuĭh geh nti ren têh miền Bắc njuăl tay ta Ban Thống nhất Trung ương, rnôk râng lăp êng tâm Nam yor tĭng trong cách mạng. Aơ lah ăp ndơ an saơ têl rêh mpeh nuih n’hâm nsing nơm n’hanh du trong tĭng tâm rklaih luh rnoi nuĭh bah du rơh kơn “hăn trong” yor an neh dak.

Wa Phạm Văn Nguyên (82 năm deh), du hê nai ntĭm dơi rgum đă lăp tâm miền Nam năm 1972, rngot rhơn rnôk dơi ndjôt ta ti ăp ndơ nkah ndray ơm kăl e bah rơh mom ndăm:

“Ndrel đah gâp năm nê nơh geh 5 oh nô hăn ndrel 1 nar. Aƀaơ dơn tay hồ sơ, gâp dŭt rngot rhơn. Băl ndrel hăn đah gâp geh nuĭh hŏ roh hôm, mô gĭt hŏ dơn tay đŏng lah mô. Hồ sơ dja lah ndơ nkah ndray mô dơi chuêl đah gâp. Gâp hŏ gŭ ta Gia Lai 53 năm, aƀaơ dơi plơ̆ sĭt ta aơ lah nău rhơn răm bah gâp”.

Lôch ƀư lễ mplơ̆ tay hồ sơ, n’gor Gia Lai ntơm pơk pla n’hơ “Dâk drưm nkual neh Bazan”. Ƀư tât lĕ nar 30/4 tât, pla n’hơ mpơl tay njăr trong rlăch ndăn n’hanh ntơm njêng bah tahen ƀon lan Gia Lai lôch Hiệp định Giơ-ne-vơ năm 1954 tât aƀaơ. Pla n’hơ tâm pă jêng 2 gâl lah “Hăn rlău ŭnh ndrak tâm lơh tâm su”  n’hanh “Nsan hao nklang bri neh têh hvi”. Bah nê mpơl tay hang rhiăng siƀŭt ơm, rup gui khlay mpeh rnôk rklaih luh Gia Lai (17/3/1975) n’hanh rklaih luh miền Nam (30/4/1975), tâm ban kơt ăp nău nsrôih rdâk tay n’hanh hun hao bah n’gor Gia Lai, ntơm bah du n’gor mpeh yôk yang jêr jŏt tĭng kơn jêng n’gor geh rnoh ngăch hun hao âk.  

Wa Đỗ Xuân Quý, du hê nuĭh tâm rnăk cán bộ đi B, hŏ ndrel puăn rơh tâm rnăk râng pla n’hơ đah  âk nău rngot rhơn:

"Gâp dŭt rngot rhơn. Gâp leo lĕ ma rnăk wâl, kon său hăn tât ta aơ gay gĭt dơi nău way ơm bah u  che he kăl e, gay nđơn tay jâng chuat, gay mât njrăng tay neh dak Việt Nam nar lơn ma nâp dăng, rêh kơn mbro”.

Lễ mplơ̆ tay hồ sơ cán bộ đi B n’hanh pla n’hơ “Dâk drưm nkual neh Bazan”, dơi ƀư di tâm rnôk neh dak rƀŏng tât nkah ndray 50 năm nar dơn ngoăy, hŏ rgop rêng lam ăp nău dăng janh kăl e lăp tâm nău rêh mhe aƀaơ. Nar ƀư kơt du nău nkah rơh kơn nar aơ di đah kăl e, n’hanh geh nău dơn kan rgop rdâk njêng nău rêh let năp tay bah neh dak./.