Du pơh tay, ta nkual ƀon têh Đà Lạt mbra na nê̆ ƀư tâm nđŭr phim Việt Nam rơh tal 23. N’gor Lâm Đồng uănh aơ lah nău ƀư khlay, di an n’gor mpla nsơ rup ndah, ndơ geh ơm, ndơ dơh bah nơm tât đah năch. Ƀon lan, nuĭh uănh dôl răm rhơn tât wơt n’hanh uănh ăp tác phẩm điện ảnh mhe uĕh bah điện ảnh Việt Nam tâm rơh tâm nđŭr phim rơh tal 23 ƀư ta Đà Lạt bah lơ 21 tât 25/11 tât.

Tĭng wa Phạm S, Groi kruanh UBND n’gor Lâm Đồng, Kruanh mpôl ntĭm rđău Tâm nđŭr phim Việt Nam rơh tal 23 rơh bôk năp ta n’gor ndâk ƀư tâm nđŭr phim, lŏ tâm di đah rơh nkual ƀon têh Đà Lạt mbah rhơn nkah gĭt 130 năm têh jêng n’hanh hun hao yor nê mbra wăch rgum âk năch tât uănh pâl. Aơ lah lah di an dơh n’gor Lâm Đồng nkoch, mpla nsơ tât năch, băl bên tâm dak n’hanh dak bah dih mpeh ăp ndơ geh, nău dăng bah nơm, tâm nĕ geh ntil nău điện ảnh.