Ta nău rêh ngăn ăp nar ta xã Ia Dreh (Gia Lai), ntơr uĕh ndơ cheh tanh, n’gloh nteh chĭng gong n’hanh n’gôr gră nău gơm ngơi bah kon se hŏ rlai lăp nsum, njêng du păng rup n’grêh rêh mpeh nău rêh văn hóa nsum mpôl. Ntơm bah ăp khâng rui brai ƀơch rgơm, ma mpang ti bah nuĭh Jarai đăp dêh trêng nti tay nău kan an rơh kơn bah kơi, mô dơn rdâk tay nău nđơr rlong gĭt ma hôm sui găr ntil gĭt uănh khlay êng, mât ndray drăp ndơ ơm yău ntlơi an tay rnoi nuĭh he nơm đŏng.

Nar kêng dŭt pơh, ta nhih nti Mầm non Hoa Hồng, xã Ia Dreh, n’gor Gia Lai, ntŭk ntơr uĕh ndơ cheh tanh lơn ma khuh n’gôr tay đŏng tâm nău nteh chĭng gong. Aơ lah nău kan rlong saơ gĭt nău kan cheh tanh bok brai, tanh tôk way ơm n’hanh nchreng an uănh chĭng gong bah nuĭh Jarai. Ta aơ, mô dơn ăp nuĭh hăr blău ti, ma hôm ăp nai ntĭm, ăp kon se jê̆ uĕh reh tâm ăp ndơ nsoh cheh tanh đah âk săk ntơr êng êng đŏng, dơi weh ƀư tĭng âk ntil, rnoh năm deh. Nai ntĭm Nay H’Tố Trinh, nhih nti Mầm non Hoa Hồng ntĭm nti ăp kon se jê̆ treng uănh n’hanh dơi ăp bu hăr blău nhŭp ti ntĭm cheh tanh du trong ndê na nê̆.

“Nhih nti mầm non mpôl hên ƀư ăp rơh rlong uănh saơ văn hóa rnoi nuĭh nơm an ăp mon său đah âk nău kan kơt tŭr goh chĭng gong, tanh tôk, cheh tanh bok brai…. Mpôl hên jă ăp bu hăr blău cheh tanh bok brai tât nkoch mbơh ndơ geh ƀư n’hanh trêng nti na nê̆ an ăp mon său. Lah nai ntĭm, ŭch rŏng dŭt têh bah mpôl hên lah ăp mon dơi tât bah ơm, wât dơi rnoh khlay bah nău kan cheh tanh, lah drăp ndơ ma u che ntlơi an tay, ntơm bah nê gĭt uănh khlay, mât ndray n’hanh nđơn tay an rơh kơn bah kơi tay.”

Ăp bu hăr blău cheh tanh, tanh tôk n’hanh bu hăr blău chĭng gong bah ăp ƀon Nông Siu, ƀon Bha Nga, ƀon Blak (xã Ia Dreh, n’gor Gia Lai) hŏ kơl ăp mon său rlong saơ uĕh n’hanh geh nkô̆ hôr jru mpeh văn hóa rnoi nuĭh. Wa Nay H’Kông – Chủ nhiệm Câu lạc bộ cheh tanh ƀon Nông Siu n’hao êng săk yor ndơ geh ƀư cheh tanh bah câu lạc bộ rhơn n’hao dơi râng âk nar văn hóa ta n’gor, rnoh prăk tăch ndơ nsĭt geh rlău 50 rkeh prăk, săk păng nơm dơi Ủy ban Mặt trận n’gor Gia Lai nkhôm an bằng khen. Yơn nău khlay lơn lah, bah nê nkơnh n’hơ dơi âk ntil văn hóa bah nuĭh Jarai, lơn lah ntĭm nti tay nău kan way ơm an rơh kơn bah kơi.

“Mpôl hên hŏ râng nkơnh n’hơ nău kan cheh tanh ta pe nhih nti mẫu giáo ta ntŭk. Ta aơ, mpôl hên mô dơn pla n’hơ, nkoch mbơh ndơ geh ƀư ma hôm trêng nti na nê̆ an ăp mon său ăp trong tay bôk năp bah nău kan cheh tanh. Rnôk dơi măt nơm saơ, dơi ti but pah tâm ăp blah bok cheh tanh, ăp mon său dŭt ŭch, ntơm bah nê rdâk tay nău gân djăng đah nău kan cheh tanh. Mpôl hên mpŏng rnôk dâk hao têh ndăm, ăp mon său mbra tă bah mpang ti he nơm blău cheh tanh jêng ăp blah bok kơt ăp yơ, ăp wa hăn lor hŏ trêng nti tay. Nău nđơr bah ăp mon său nsĭt tay an mpôl hên âk nău rhơn đŏng, yor ăp mon său mbra lah ăp nuĭh nđơn tay n’hanh mât ndray nău kan way ơm dja.”

     Nău kan rlong uănh saơ văn hóa rnoi nuĭh nơm ta xã Ia Dreh, n’gor Gia Lai way dơi n’gâng kan ta ntŭk n’hanh ăp nsum mpôl n’grŏ tĭng. Wa Nguyễn Thị Ly Na -  Groi kruanh Hội Liên hiệp bu ur xã Ia Dreh an gĭt, ntơm bah năm e nơh, rnôk mô hŏ n’glăp nsum, UBND nkuâl Krông Pa(ơm) hŏ n’glêh an njêng Câu lạc bộ cheh tanh ƀon Nông Siu, đah 17 nuĭh, gay mât ndray n’hanh ntik n’hao săk tơm văn hóa rnoi Jarai ta ntŭk. Nău kan bah câu lạc bộ mô dơn nsĭt tay tơm geh wăng sa an oh yuh, ma hôm ntik n’hao dơi săk tơm văn hóa rnoi mpôl đê̆ an rơh kơn bah kơi.

“Bah meng nhih nti mầm non Hoa Hồng jă mpôl hăr blău, Câu lạc bộ cheh tanh sĭt ta nhih nti gay nkoch mbơh, trêng nti tay an rơh kơn kon se gĭt tât ăp ndơ cheh tanh bah nuĭh Jarai. Mpôl hŏ grêt dăch đah ăp oh yuh tâm nê đŏng, gay mhâm ƀư mât ndray dơi rup uĕh văn hóa way ơm bah rnoi nuĭh he nơm; ŭch rŏng ndơ geh ƀư bah he dơi ăp nuĭh gĭt tât ma ăp nău kan tâm nđŭr văn hóa – njroh mprơ”.  

Ăp rơh nti rlong gĭt mha êng ta Nhih nti Mầm non Hoa Hồng, xã Ia Dreh, n’gor Gia Lai hŏ ƀư nhih nti mầm non jêng ntŭk văn hóa khuh n’gôr, ntŭk săk tơm văn hóa rnoi mpôl đê̆ mô gŭ tâm bảo tàng ma ntoh mpơl, rêng lam tĭng rse brai cheh tanh, tĭng râp chĭng n’gloh lam đŏng.