Ôi 22/12, Thủ tướng Chính phủ Phạm Minh Chính ƀư tơm rơh tâm nchră lam dak mpeh hun hao ăp n’gâng kan công nghiệp Văn hóa Việt Nam. Aơ lah tâm nchră lor bôk năp geh nkô̆ khlay mha êng mpeh hun hao ăp n’gâng kan công nghiệp văn hóa Việt Nam.

Nkoch mpeh công nghiệp văn hóa lah nkoch tât ăp n’gâng kan công nghiệp ƀư njêng luh ndơ geh ƀư geh nău rup uĕh n’hanh blău ƀư njêng mhe; geh mpơl săk mô lah mô mpơl săk; ma trong mât dŏng ăp rnoh khlay văn hóa ndrel ăp ndơ geh ƀư n’hanh rhŏ dŏng geh nău gĭt blău bôk rngok, geh nkô̆ khlay lam rêh jêng kon nuĭh n’hanh văn hoá gay nsĭt geh ăp tơm wăng sa. Gay công nghiệp văn hóa dak he ơm hun hao ngăch, nâp dăng, an ƀư geh nău tam, ân geh nău rgâl âk ntơm bah nău gĭt mĭn êng tât dâk kan, rgâl mhe nău mĭn, đăt ndal tâm trong ƀư, rdâk njêng n’gâng kan công nghiệp văn hóa Việt Nam “Blău ƀư mhe – Săk tơm – uĕh êng- way kan- tâm rlong” Thủ tướng dăn đă, ăp đại biểu tâm ôp, tâm nchră, tâm nkoch đah nuih n’hâm sŏng dăng, dơn ngoăy, uănh năl na nê̆ ăp nău dơi hŏ geh, nchiăng khan, mpăng đêt tâm hun hao công nghiệp văn hóa tâm bah ri aơ, nkô̆, nău tă ơm gĭt kơt nti./.