Tâm ntŭk ntô n’gŭr răm bah nteh chĭng, ăp bu ur Êđê ndrĕ ndrĕ hăn tât yăng ndrănh, rbân r’ên tâm nău njroh jă ngêt ndrănh yăng. Tĭng njoat jâng, tĭng ty mpât kơt nău ôp rhơn njuăl tât brah yang n’hanh jă năch. Nău njroh jă ngêt ndrănh yăng way geh tâm ăp ƀư brah ba mhe, ƀư brah ndrâm dak, ƀư brah săk soan, ƀư tâm nsông n’hanh ăp ƀư brah way ơm bah ƀon lan. Ntŭk ntô njroh lah jay nhih, jâng gung ƀư brah mô lah đah ăp ntŭk yăng ndrănh, ntŭk boăt nthoi kon nuĭh đah nsum mpôl n’hanh tu tơm văn hóa Êđê.

Bu ranh ƀon Y Kŭt Niê (Aê Nang), ƀon Prao, xă Mdrăk, n’gor Dak Lak an gĭt:

Tĭng nău way ơm bah nuĭh Êđê, jă ngêt ndrănh lah njroh tâm ƀon lan geh nău răm, rnôk geh ndrănh, mô dơi mô njroh rnôk rnăk wâl geh nuĭh roh. Nuĭh kăl e lah ntŭk rgum ăp bu klô bu ur rgum ndrel, ăp ƀon lan sĭt răm ndrel.

Nău njroh jă ngêt ndrănh yăng bah nuĭh Êđê dơi ƀư đah ăp nău mbrơi mbrơi, đah choat jâng rwăch yăng ndrănh. Ty rbân, tâm ăp nău kuăl jă, wơt rhơn uĕh. Bôl mô geh jêr đah trong ƀư, nău njroh lŏ geh âk tâm nău ƀư brah n’hanh nkô̆ nău ntĭt mpơl, nău ryơk đah brah yang n’hanh ăp bu năch têh. Lăp ndrel nău njroh lah nteh bah chĭng Êđê, đah nău chĭng jong, jêng ntŭk ntô uĕh tam ma răm m’ak âk nău uĕh văn hóa rnoi mpôl đêt.

Nghệ nhân Y Klôt Buôn Yă (Ea Thảo), ƀon Hra Ea Ning, xă Dray Bhăng, n’gor Dak Lak an gĭt, njroh jă ngêt ndrănh bah nuĭh Êđê lah mpơl nău uĕh bah nuih n’hâm wât năch, lah rse nthoi ăp nuĭh tâm ƀon lan, nkre lah nău rêh nuih n’hâm uĕh bah nsum mpôl. Tă nău njroh, nuĭh Êđê nkoch nău nsing nơm, nău nkah gĭt n’hanh ŭch đah nău rêh đăp mpăn, hơm răm.

Jêh rnôk lôch ăp nău ƀư brah ndrâm dak, ƀư brah săk soan mbra geh nău njroh jă ngêt ndrănh đah ŭch kônh wa ƀon tâm rgum răm m’ak n’hanh hơm răm. Nĕ lah nău kuăl jă ăp brah yôk, brah dak, drô phan, u che djăt chĭng, saơ nău njroh mbra tât răm ndrel đah kônh wa ƀon lan he.

Nghệ nhân Y Klôt Buôn Yă an gĭt tay, nuĭh njroh nso ao tanh bah nuĭh Êđê. Tĭng nău way kăl e, ta năp rnôk ngêt ndrănh yăng, tŏ dak tâm yăng dơi bâk bah ndrâm dak bah ƀon đah nông, mô sŏk bah tu dak êng, yor nĕ lah tu dak lap tam.

Lah ƀư brah đah 3 yăng ndrănh ri geh 3 nuĭh njroh, 7 yăng ndrănh ri 7 nuĭh njroh. Way rnoh nuĭh njroh bah 5 nuĭh let lơ n’hanh tĭng chrai nuĭh, mô njroh tĭng kôp. Kăl e, lor rnôk ngêt ndrănh yăng, tŏ dak tâm yăng ndrănh dơi bâk bah ndrâm dak đah nông, mô sŏk bah tu dak êng.

 Njroh jă ngêt ndrănh mô knŭng lah nău ƀư brah, ma hôm du nghệ thuật rêh, ntŭk nteh chĭng gông hăn mro n’hah brah yang nglăp ndrel jêng ngoăy. Tĭng njoat jâng, tĭng mpât ty dơi ƀư răp jăp, mpơl nău tâm rnglăp ndrel đah kon nuĭh n’hanh bri dak, brah yang n’hanh nsum mpôl. Đah nteh chĭng n’gŭr răm n’hanh ngơi gơm tâm bên bah ƀon lan, bu năch mbra saơ nău răm, n’hanh uĕh lăng tâm rnôk văn hóa bah Tây Nguyên.