VOV4.M'nông: Ôi 15/11, Sở Công thương nkual ƀon têh Hồ Chí Minh ntơm pơk bôk nău kan n'hŭch rnoh khlay rgum Shopping Season 2021 đah nkô̆ “Dah dăng suan ma rvăt, tâm rlong rvăt năp" gay ntrŭt ntrôl dŏng âk ndơ tâm dak, buăt nthoi geh tơm ndơ tăch ndơ rvăt dŏng, ntop kơl doanh nghiệp dâk hao tay nău kan ƀư njêng, tăch rgâl tâm rơh "kơt ơm mhe".

Geh 586 doanh nghiệp nsing nơm râng bôk nău kan n'hŭch rnoh khlay rgum Shopping Season 2021, đah rnoh hŭch ntơm bah 30-70%, lah âk rmôt ndơ tăch: Puăch ka, dak si nkrơ̆, bok ao mhe, ndơ điện tử...Ƀư ntơm bah nar 15/11 tât 31/12, nar ƀư wăch rgum bah ăp rêng tơm pă an ndơ tăch ta nkual ƀon têh, ăp ntŭk ndranh tăch ndơ điện tử. Êng Hội chợ n'hŭch rnoh khlay ƀư ntơm bah nar 21/11 tât 21/12 ta Jay tâm rlong Phú Thọ đah 450 ndrơng ndơ puăch ka, ndơ ngêt, rhŏ dŏng ngêt sa, pâl rlưn, pâl nđaih, ndơ nsoh bok ao, điện tử…

Nuĭh rblang: Điểu Thân