VOV4.M'nông: Ta năp nău mpet jâk đăp mpăn gŭ rêh an hang rbăn nuĭh ƀon lan plơ̆ sĭt bah ăp n'gor mpeh bah dâng lôch bah nuh srê Covid-19, nkuâl Krông Buk (Dak Lak) dôl rdâk njêng trong nchrăp tâm di gay nta joi nău kan n'hanh trong gŭ rêh đăp mpăn ta năp măt kơt geh ăp trong nkra an jŏ jong gay nta geh nău kan an nuĭh ƀon lan plơ̆ sĭt ƀon tơm.  

Lĕ nar an gŭ rgum êng plơ̆ sĭt ƀon tơm ma ndeh honda, nô Y Ngọc Niê, ta buôn Ktơng Drun, xã Cư Né, nkuâl Krông Buk dôl joi geh nău kan tâm di ta ntŭk nơm. Y Ngọc Niê an gĭt, ntơm nơh nô ƀư công nhân tâm công ty ta thị xã Bến Cát, n'gor Bình Dương. Tă bah nuh srê Covid-19 dôl tât krit nji, lôch âk khay kol khan ta Bình Dương rnôk n'gor dja ƀư lhăt ăp trong njrăng n'gang nuh srê, bol hŏ dơi chuh 2 n'glai vaccine yơn nău kan rgoh n'gơ, geh ma nău ntưp nuh srê, rnoh prăk ntêm nkrem hŏ lĕ, nô Y Ngọc sĭt ƀon tơm der nuh srê n'hanh joi nău kan dăch kêng jay.

       “Gâp dôl nchrăp rnôk nău kan hŏ đăp mpăn lơn ri mbra joi du nău kan tâm di đah he. Yor gâp gân djăng đah nău kan ƀĭt ndeh n'hanh hŏ geh bằng ƀĭt ndeh hôm jêng tât rnôk bah oi nuh srê ri gâp  mbra joi du nău kan ta công ty mô lah doanh nghiệp nê nơh gay nchuăt ndeh. Hôm ta năp măt ri gâp mbra gŭ ta jay kơl nău kan mir ba, nchrăp tâm khay klêh cà phê hôm gâp mbra gŭ klêh cà phê gay ntop geh tay wăng sa".

Tă bah rnăk wâl jêr jŏt, mô geh neh tuch tăm jêng đah aƀaơ 2 năm, nô Lương Văn Hữu, ta buôn Cư Mtâo, xã Ea Sin, nkuâl Krông Buk hăn Bình Dương ƀư công nhân. Ntơm bah kêng dŭt khay 5, nuh srê Covid-19 tât krit nji ta ăp n'gor mpeh bah dâng, công ty koh n'hŭch nuĭh kan, nô ân plơ̆ sĭt der nuh srê. Tâm rnôk kâp joi geh nău kan, nô Hữu hŏ đăng ký râng ndrel đah mpôl druh ndăm kơl pah kan njrăng n'gang nuh srê ta ntŭk.

“Gâp sĭt saơ ăp nuĭh khân păng hăn kơl ŏ r'ah ngăn, săk gâp nơm gŭ ta jay mih sial kơt aơ mô geh ndơ ƀư ơm jêng gâp râng, moh ndơ dơi kơl ri ƀư kơl ndơ nê. Gâp ŭch rŏng nuh srê ơm lĕ bah gay du nău rêh plơ̆ tay kơt ơm".

 Tĭng wa Hoàng Kiên Cường, Kruanh UBND nkuâl Krông Buk, n'gor Dak Lak, ntơm bah  khay 5 tât aƀaơ, nkuâl hŏ wơt nklăp 6.000 nuĭh ƀon lan plơ̆ sĭt bah ăp n'gor Bình Dương, Đồng Nai n'hanh nkual ƀon têh Hồ Chí Minh, lĕ rngôch lah nuĭh tâm năm pah kan, joi nău rêh da dê. Lôch rnôk dơn nuĭh ƀon lan plơ̆ sĭt, nkuâl hŏ ƀư uănh năl ngăch dăng n'hâm suan, tâm pă mbor an gŭ rgum êng tĭng di nău way gay đăp mpăn njrăng n'gang nuh srê.

        Aƀaơ, lam nkuâl geh bơi 19.800 ha cà phê bơi klêh play, đah rnoh âk nchroh nklăp lah 44.200 tấn rnglăy. Tĭng nê mbra ŭch geh nklăp 800 rbăn nuĭh nar luh klêh, bơi tâm ban đah 27 rbăn nuĭh kan tâm 30 nar. Ăp năm bah năp nơh, ăp năm nkuâl ân rgum geh rlău 6.600 nuĭh luh kan bah ăp n'gor êng ƀa ƀă gay klêh cà phê. Năm aơ, tă bah nô nău nuh srê krit nji jêng rnoh nuĭh kan dja kơt lah mô dơi rgum geh, rgâl tâm nê, nkuâl mbra ndăn nuĭh kan plơ̆ sĭt bah ăp n'gor gay nkre đăp mpăn klêh cà phê ban năm khay, nkre nta joi nău kan n'hanh nău geh wăng sa ta năp măt an nuĭh ƀon lan. Wa Hoàng Kiên Cường lah:

       “Ta năp măt đah khay klêh cà phê bơi tât ri nklăp tơm nuĭh kan mbra mô tŏng n'hanh hŏ dơi ntop mpôl kan ta ăp n'gor mpeh bah dâng sĭt ri aơ lah ndơ gay nta joi nău kan ta năp măt đŏng. Hôm mpeh jŏ jong ri lôch đăp mpăn nô nău n'hanh kân bah nuh srê ri ntrôl dăng tay pah kan ntĭm nti, tiăr nti nău kan gay  nta  joi geh nău kan an ăp mpôl kan đŏng; kuăl jă ăp doanh nghiệp ntuh kơl gay mhâm ƀư ăp doanh nghiệp lăp ri mơ rgop geh nta joi nău kan an ăp công nhân ta nkuâl, lơn lah ăp công nhân plơ̆ sĭt bah ăp n'gor mpeh bah dâng".

Tĭng nchih rgum bah Sở Lao động – Thương binh – Xã hội n'gor Dak Lak, ntơm bah khay 7/2021 tât aƀaơ, lam n'gor geh rlău 75.000 nuĭh ƀon lan bah ăp n'gor plơ̆ sĭt. Êng ntơm bah bôk khay 10 tât aƀaơ, geh bơi 26.000 nuĭh. Tâm nê lơn âk lah công nhân dôl pah kan ta ăp nkual công nghiệp ta Bình Dương, Đồng Nai, nkual ƀon têh Hồ Chí Minh. Gay ntop kơl mpôl kan dja, Sở hŏ tâm ôp đah ăp n'gor geh nău ŭch sơch lăp nuĭh kan gay buăt nthoi joi geh nău kan rnôk ăp nhih máy plơ̆ kan ƀư njêng tay lôch bah nuh srê. Êng đah ăp nuĭh kan geh nău ŭch pah kan ta ntŭk, Sở đă jrô kan ăp nkuâl, thị xã, nkual ƀon têh rgum nchih săk gay rdâk njêng trong nchrăp kơl tâm di./.  

 Nuĭh rblang: Điểu Thân