Tĭng ƀư Bôk nău kan ndâk njêng thôn ƀon mhe, Đảng bộ xă Tà Nung mĭn aơ lah nău kan chính trị khlay, soan ntrôl hun hao wăng sa-rêh jêng. Tâm nĕ, trong kan ntĭm nti chính trị nău mĭn lĕ dơi mbơh ƀư rĭng, nta an tâm ban ŭch tâm nău wât n’hanh nău ƀư bah cán bộ, đảng viên n’hanh ăp gưl nuĭh ƀon lan ƀư tĭng ăp rnoh ndơ ƀư thôn ƀon mhe.

Bah meng nĕ, xă Tà Nung lĕ rgŏ jă dŭt n’hâm ăp tơm prăk gay ntuh kơl hun hao ntung trong. Tât aƀaơ, trong hăn thôn ƀon lĕ soih, lĕ rngôch trong thôn ƀon lĕ bê tông, kơl nău hăn nsong n’hanh rdêng ndoh ndơ dơh. Ăp ndơ ƀư dak bât dơi nkra, tŏng ăp tŏ djrah, rgop n’hao săk rnglăy tơm tăm. Nkre, ngih sam ƀŭt, ngih dak si, ngih văn hóa dơi ntuh kơl ndâk ƀư, tŏng nău ŭch dŏng, nti nsơm n’hanh mât uănh săk soan nuĭh ƀon lan.

Tâm ntil nău wăng sa, xă ntrŭt đă nuĭh ƀon lan rgâl tơm tăm, mpa rong tĭng trong nkra njêng ndoh ndơ, kơt dŏng khoa học, kỹ thuật an tuch tăm. Năm 2024, rĭng geh bôk nuĭh bah xă geh 60 rkeh prăk. Lơn lah, ntrong ƀư tuch tăm lŏ mir công nghệ mhe hăn ndrel đah pâl nđaih ntŭk gŭ rêh lĕ nsĭt săk rnglăy wăng sa, nta an nău kan đăp mpăn an âk nuĭh pah kan ta ntŭk.

Tâm ban đah hun hao wăng sa, xă uănh khlay đŏng mât ndrăy n’hanh mât uĕh nău way ơm rnoi nuĭh. Âk nău ƀư văn hóa, njroh mprơ dơi ƀư ƀa ƀơ, jêng ntŭk pâl uĕh an nuĭh ƀon lan. Ăp ntrong leo “Lam ƀon lan tâm rnglăp ndâk njêng nău rêh uĕh lăng”, “Ƀon lan tuch tăm, tăch rgâl blău”, “5 mô, 3 kloh uĕh, 5 mô 3 geh” dơi mbơh ƀư jru hvi, rgop ndâk njêng nău rêh uĕh lăng, hao mhe. 

Ăp nău kơl đăp mpăn nău rêh jêng dơi ƀư săk rnglăy, đăp mpăn ăp nuĭh ƀon lan dơi gĭt da dê đah nău rhŏ dak si, ntĭm nti n’hanh ntop kơl joi nău rêh. Aƀaơ xă Tà Nung mô hôm rnăk ach o. Rnoh nuĭh ƀon lan râng rwăt bảo hiểm y tế geh 97%. Lĕ rngôch kon se tâm rnoh năm deh dơi tât ngih sam ƀŭt, uĕh blău ntĭm nti mô rlu dơi hao prêh.

Tĭng wa Kră Jăn Ha Diệp, Groi Bí thư Đảng ủy xă Tà Nung, ăp săk rnglăy dơi geh lah an saơ nău nsrôih mô rlu bah lĕ trong chính trị n’hanh ƀon lan. Gay mât tay n’hanh ƀư uĕh ăp nău geh tâm ndâk njêng thôn ƀon mhe, xă n’hao ƀư tơm, lĕ đah nău kan bah gưl ủy, n’gâng kan ƀon lan, mặt trận n’hanh ăp nsum mpôl chính trị- rêh jêng, lơn lah nău ƀư tơm bah nuĭh ƀon lan. Ăp nău ntrŭnh, nău kơl an dơi nkoch trêng jru hvi, geh nău tâm ban âk tâm ƀon lan.

Ndrel đah ntrôl dăn hun hao wăng sa lŏ mir tĭng trong nâp nâl, ƀon lan uănh tât lơn tay nău wăch rgum doanh nghiệp an ntuh kơl. Tà Nung n’hao kuăl jă ăp tơm prăk gay ntuh kơl lôch jêh ntung trong, uănh khlay mât njrăng ntŭk ntô gŭ âm, ndâk njêng nkual ƀon lan ang-kloh-uĕh.

Đah nău ndrel ty bah lĕ trong chính trị n’hanh ƀon lan, xă Tà Nung dôl ntơm jêh nău rƀŏng geh tâm di thôn ƀon mhe n’hao prêh n’hanh thôn ƀon mhe ntrong leo lor. Nău rƀŏng têh ngăn lah n’hao uĕh nâp nău rêh an nuĭh ƀon lan, đăp mpăn hun hao nâp nâl.