Rơh Mpăr khay 3 jŭr tach ndeh păr Buôn Ma Thuột rdêng ăp năch bah nkual ƀon têh Hồ Chí Minh. Tâm rnoh aơ, geh n’ăp ăp nuĭh gŭ dak bah dih hôm e rĭng sĭt khâl Buôn Ma Thuột, ntŭk tĭng đah nơm bah hôm e jêt kơt wa Thu Mai. Wa Mai nkoch, tă tach ndeh păr xă Hòa Thắng, wa lĕ bơi nsơt ta năp ăp nău rgâl ngăch ta aơ.

 Knŭng geh đêt năm, âk năm bah năp ri gâp hăn, saơ mô di kơt aƀaơ. Aƀaơ plơ̆ tay way măt dâl, yor nău rgâl dŭt ngăch.

Tâm âk nău rgâl bah Buôn Ma Thuột, rgâl na nê̆ ngăn lah ta nkual tach ndeh păr Buôn Ma Thuột. 50 năm bah năp, bôl ntŭk aơ geh săk lah tach ndeh păr Hòa Bình, yơn lŏ âk pih ja, lok loih, ăp ntŭk jăng mìn, ndrel âk môch nting n’hanh ăp nduh phao, lah ngoăy tâm 2 ntŭk geh âk rơh tâm lơh hô ngăn tâm nar 10/3/1975. Yơn aƀaơ nkual aơ lĕ jêng ntŭk khlay bah ăp trong hăn-trong ndeh păr; bah ăp trong têh hăn ngăch nthoi Khánh Hòa-Buôn Ma Thuột, Quốc lộ 27 nthoi Dak Lak-Lâm Đồng n’hanh đại lộ Võ Nguyễn Giám hăn lăp nklang nkual ƀon têh. Deh ta Buôn Ma Thuột yơn ngai nkual ƀon têh lĕ âk năm, wa Hoàng Thị Kim Anh ndrăt đŏng n’hanh răm rhơn ta năp ăp nău rgâl hô.

Răm n’hanh rhơn yor sĭt ta aơ saơ Buôn Ma Thuột hun hao dŭt lah ngăch. Gâp mô hôm năl ăp nău bah kăl e tay.

50 năm rlet rlău, mô knŭng ăp sôt têl tâm lơh tâm su lĕ dơi bah ma Buôn Ma Thuột, bah du nkual têh hăch chrai đah way moh “Buôn Ma Thuở”, đah knŭng rlău 100 rbăn nuĭh, aƀaơ lĕ jêng nkual ƀon têh gưl 1-ntŭk cà phê âk bah Việt Nam. Xă Hòa Thắng n’hanh wăr tach ndeh păr Hòa Bình kăl e, ơm geh rlău âk rnoi nuĭh ăp ntŭk Mường ta n’gor Hòa Bình lăp njêng ƀon, ri aƀaơ lĕ ngoăy tâm âk ntŭk khoa học kỹ thuật nông lâm nghiệp têh ngăn lam dak, pă an tơm ntil n’hanh ăp trong mkra kỹ thuật-công nghệ nông-lâm-nghiệp an lam Tây Nguyên. Wa Nguyễn Quang Ngọc, nuĭh ƀon lan tơm Mường n’gor Hòa Bình deh năm 1960 ta xă Hòa Thắng an gĭt, nău rgâl ta nkual neh aơ bah rla gle jêng ntŭk uĕh mhe:

Kăl e ăp u che mô geh kơt aơ. Bah kơi aơ Ngih dak mư rgâl an ƀon lan ƀư cà phê, tâm pă neh an ƀon lan. Nĕ, tâm Hòa Thắng aơ lah âk jay aƀaơ ndâk ƀư jay lŭ lah knơm mir yơng ntil. Ƀư mir yơng ntil geh prăk. Aơ heh, Bu du năm dơi geh rmen prăk đŏng.

Xă Hòa Thắng lĕ geh rlău 1.200 rnăk. Rnôk Tây Nguyên geh âk yan săk play têh, Hòa Thắng răm nsum nău rhơn yor cà phê, sầu riêng, tiêu khlay âk ngăn mpeh nău khlay, nuĭh ƀon lan Hòa Thắng lơ ndrŏng hao ngăch. Ăp jay têh ntoh luh njok nkual mper nkual ƀon têh Buôn Ma Thuột. Nău nthoi sŏng đại lộ Võ Nguyễn Giáp lơ ƀư nkual aơ ntop mhe tay.

Bah du nkual têh tâm lơh tâm su, bah kơi n’gul rach năm Buôn Ma Thuột hao nơm jêng ntŭk âk cà phê bah Việt Nam, du ntŭk wăng sa, khoa học kỹ thuật nông lâm nghiệp bah Tây Nguyên. 50 năm bah năp, rơh tâm lơh Rklaih đăp mpăn Buôn Ma Thuột lah ntơm an yan puh lơh dăng, ri Buôn Ma Thuột uĕh lăng nar aơ lah săk rnglăy n’gul rach năm đăp mpăn n’hanh kơp dơn. Bah ta aơ, nkual ƀon têh Buôn Ma Thuột ntơm du trong hăn mhe, trong hăn bah hun hao n’hanh rgum lăp, jêng ntŭk tât bah cà phê lam ntŭr neh.