Quảng trường nklang nkuăl Dak Mil, Dak Nông ntơr ang măt nar, N’ha cờ chăng mănh êr mpăr tâm sial. Mông nar rhơn yan puh, rhơn neh dak rgâl mhe hôm e ntơr uĕh đah ăp nar nkah gĭt gĭt 50 năm lơh dơi Đức Lập (Dak Mil), rơh dơh pơk trong chiến dịch Tây Nguyên, rƀŏng tât dơi têh yan puh năm 1975, kơp dơn neh dak.

Tahen ơm Nguyễn Văn Thí (73 năm, ƀon tơm n’gor Nam Định), aƀaơ dôl gŭ rêh ta xă Dak Ndrot, nkuăl Dak Mil nkah gĭt tay, bôk năm 1975, Trung đoàn 28 ta Sư đoàn 10 lĕ mpôn hăn Tây Nguyên. Rơh lơh ndal bah ntŭk tahen wa lăp cứ điểm Đức Lập kêng ôi lơ 9/3 lĕ phah chrai trong njrăng rdâng mpeh Bah dâng bah Buôn Ma Thuột, nking lĕ trong neh nthoi đah Đông Nam Bộ. Wa Nguyễn Văn Thí ntô̆ n’hao nkoch:

 Di 6h5 mnĭt lơ 9/3, Trung đoàn 28 pănh phao, pháo binh ntơm pănh n’grăng tâm căn cứ Tiểu đoàn Bảo an rlăng. Du trong rdôl lơh lah du tiểu đoàn he n’hanh Tiểu đoàn ngoăy ta trong Tây Bắc lơh lăp; Tiểu đoàn 3 ta trong Đông Nam lơh hao. Tât 9h30 mnĭt rĭ he rŭn in geh ntŭk ntĭm rđău Đức Lập. Rnôk lơh jêh, tâm măng lơ 9/3, mpôl hên hăn tay tâm rgop đah ăp rmôt tahen êng hăn trong lơh in Buôn Ma Thuột.

Tahen ơm Y Mới, 82 năm deh, ta xă Đức Minh, nkuăl Dak Mil, nuĭh hăn tâm lơh đồi 722, trong sŏng mpeh Đông Nam rkum Đức Lập, sĭt ƀon: rnôk nĕ, nkô̆ nău ndal bah tahen he lĕ ƀư rlăng mô năn lơh plơng.

Rơh lơh trại Đức Lập tahen rklaih đăp mpăn lơh têh hôm. Tahen he lĕ nkhĭt n’hanh ƀư chrai dŭt âk tahen rlăng ta aơ, nhŭp rêh rlău 100 tahen rlăng, sŏk kân âk n’gâr đại pháo n’hanh 20 bôk ndeh sar rlăng ndrel âk ndeh ca bah rlăng. Geh ndâng âk sŏk lĕ dâng nĕ. Lơ 10/3 rdôl lơh sĭt Buôn Ma Thuột jêh nĕ tahen rklaih đăp mpăn he lơh dơi lĕ rngôch chiến dịch Tây Nguyên.

Rkum Đức Lập mpeh ta n’gor Quảng Đức ơm (aƀaơ ta nkuăl Dak Mil, n’gor Dak Nông), ngoăy tâm âk trong njrăng rdâng têh bah rlăng ta Tây Nguyên. Ta aơ, rlăng ndâk ƀư 5 ntŭk tahen têh, geh công sự, trôm mŭr... đah ăp rmôt tahen dŭt dăng, geh: ntŭk ntĭm rđău tahen Sư đoàn 23, 2 tiểu đoàn bộ binh, 3 đội pháo binh 105 mm, 1 chi đoàn ndeh sar, ndeh loih, 5 đại đội bảo an...

Lơh dơi Đức Lập lơ 9/3 lah rơh dơi pơk trong, rgop khlay lăp lơh dơi Buôn Ma Thuột, chiến dịch Tây Nguyên yuh puh 1975. Đah ndơ geh têh ngăn tâm rơh tâm lơh tâm su mprơh Mỹ kơl neh dak, tahen n’hanh ƀon lan nkuăl Dak Mil lĕ lap dơi an ndơ rnê nkhôm “Anh hùng lực lượng vũ trang nhân dân”.

Wa Lê Văn Hoàng, Kruanh UBND nkuăl Dak Mil, an gĭt, mât uĕh nău way ơm janh dăng,. n’gâng kan ƀon lan n’hanh nuĭh ƀon lan ăp rnoi nuĭh dôl ndrel soan ndâk njêng nkuăl lah du nău nuih n’hâm têh hao jêng bah n’gor Dak Nông.

Nkuăl rgŏ jă tay ăp tơm prăk gay jêh ăp rnoh ndơ ƀư, rƀŏng tât jêng nkuăl thôn ƀon mhe ta dŭt năm 2025; mât rnă njrăng, mât njrăng bri dak nâp nâl; ndâk njêng rmôt Đảng n’hanh trong chính trị nâp dăng lĕ rngôch; nsrôih nking n’gang ntrôl rŭch nău sa khâm sa ƀer. Nsôih ndâk njêng, ndơ̆ Dak Mil jêng nkual têh loại 3 bah năp năm 2030.

N’gul rach năm lĕ rlău, Đức Lập kăl e aƀaơ lĕ rgâl săk, lah ngoăy tâm âk nkual wăng sa hun hao ngăch bah n’gor Dak Nông. Nkah gĭt 50 năm Nar rklaih đăp mpăn Đức Lập, ntô̆ n’hao janh dăng way ơm, ăp rơh kơn aƀaơ nthoi tay u che, ndâk njêng ƀon tơm nar lơ ndrŏng, uĕh lăng mhe.